"YENİ ADDIMLAR ŞƏFFAFLIĞIN TƏMİN EDİLMƏSİNƏ XİDMƏT GÖSTƏRƏCƏK"

Bu fikri bizimlə söhbətində Bakı Şəhər Dövlət Yol Polisi İdarəsinin ictimaiyyətlə əlaqələr şöbəsinin rəisi, polkovnik-leytenant Vaqif Əsədov xüsusilə vurğuladı

Bu gün Bakı şəhərində milyona yaxın müxtəlif nəqliyyat vasitəsi var. Təbii ki, nəqliyyat vasitələri çox olanda hərəkətin təhlükəsizliyinin təmin edilməsi də böyük əhəmiyyət kəsb edir. Çünki hərəkət iştirakçıları, sürücülər və piyadalar mövcud qaydalara əməl etməyəndə ağır yol nəqliyyat hadisələrinə və qəzalara münbit şərait yaranır. Son vaxtlar Bakı şəhər Dövlət Yol Polisi İdarəsi hərəkətin təhlükəsizliyinin təmin edilməsi sahəsində böyük tədbirlər həyata keçirir. Bu və ya digər məsələlərə aydınlıq gətirmək üçün biz Bakı Şəhər Dövlət Yol Polisi İdarəsinin ictimaiyyətlə əlaqələr şöbəsinin rəisi, polkovnik-leytenant Vaqif Əsədovla telefon əlaqəsi yaratdıq. O dedi:

- Hərəkətin təhlükəsizliyinin təmin edilməsi üçün xeyli müddətdir ki, idarə rəhbərliyi tərəfindən yol polisi əməkdaşlarına ciddi tapşırıqlar verilib. Yəni Bakı şəhərində baş verə biləcək yol-nəqliyyat hadisələrinin və qəzaların qarşısının alınmasında yol patrul xidməti əməkdaşlarının məsuliyyəti böyükdür. Ona görə də son vaxtlar şəhərin müxtəlif istiqamətlərində hərəkətin təhlükəsizliyinin təmin edilməsi ilə bağlı reydlərin keçirilməsinə start verilib. Artıq bu məqsədlə çoxlu sayda reydlər keçirilib və yol hərəkəti qaydasını pozan piyadalar cərimə edilib. Çox təəssüf ki, apardığımız təbliğat və maarifləndirmə işlərinə baxmayaraq, əksər piyadalar yeraltı və yerüstü keçidlərdən istifadə etmir, nəqliyyat vasitələrinin sıx hərəkət etdiyi küçə və prospektlərdən keçməyə can atırlar. Bu da bir çox halda piyadaların vurulması ilə nəticələnir.

Bir faktı qeyd edim ki, 2011-ci ilin son 40 günündə, yəni yanvarın 1-dən fevralın 10-a qədər olan müddətdə 8 mindən artıq yol hərəkəti qaydası pozuntusu aşkar edilib. Bu zaman 198 piyada cərimə edilib, 432 sərxoş sürücü haqqında tədbir görülüb, eyni zamanda yol qəza hadisələrinə səbəb olan və avtomobilləri yüksək sürətlə idarə edən 301 sürücü saxlanılıb. Bununla yanaşı, işıqforun qırmızı işığından keçən 1440, sürücülük vəsiqəsi olmadan nəqliyyat vasitəsini idarə edən 402 sürücü müəyyən edilib. Bir çox sürücülər isə kimlərəsə arxayın olaraq, avtoxuliqanlıq etməkdən belə çəkinməyiblər. Bu cür avtoxuliqanlardan 9-u yol polisi əməkdaşları tərəfindən saxlanılıb və onlar barəsində ciddi tədbirlər görülüb.

Ümumiyyətlə, Bakı Şəhər Dövlət Yol Polisi İdarəsi nəqliyyat vasitələrini yüksək sürətlə idarə edənlərə, sərxoş sürücülərə və eləcə də avtoxuliqanlara qarşı daha sərt mövqey tutub. Ona görə ki, bu cür kobud qayda pozuntusuna yol verən sürücülər ağır qəzalara şərait yaradırlar.

Onu da qeyd etmək istəyirəm ki, bu ilin 40 günü ərzində Bakıda 129 yol qəza hadisəsi baş verib. Qəzalar zamanı 31 nəfər ölüb, 129 nəfər isə xəsarət alıb. Bu da ötən ilin müvafiq dövrü ilə müqayisədə 7 yol qəza hadisəsinin və 12 xəsarətin çoxalması deməkdir. Ölüm faktı isə ötən illə müqayisədə bir fakt aşağı enib. Elə bu rəqəmlərin özü təhlükəsizliyin təmin edilməsində müəyyən irəliləyişlərin olduğunu göstərir. Amma bununla yanaşı, Bakı Şəhər Dövlət Yol Polisi İdarəsi hərəkət iştirakçılarının təhlükəsizliyinin təmin edilməsi istiqamətində davamlı olaraq tədbirlər həyata keçirir. Piyadaların vurulması hallarının əsas səbəblərindən biri günün qaranlıq saatında yolların işıqlandırılmaması ilə bağlıdır. Belə ki, Nobel prospektindən bir neçə elektrik dirəyinin ayrı-ayrı sürücülər tərəfindən nəqliyyat vasitəsi ilə vurub aşırması həmin istiqamətdə günün qaranlıq saatında yolun işıqlandırılmaması ilə nəticələnib. Bu da piyadaların bir çox halda təhlükə ilə üzləşməsinə və avtomobillə vurulmasına gətirib çıxarır. Elektrik dirəklərinin yenidən təmir edilib bərpa edilməsi üçün biz əlaqədar təşkilatlara təqdimat göndərmişik. Onu da qeyd edim ki, bir çox sürücülər qəza zamanı aşırdıqları dirəkləri vaxtında düzəltdirmək istəmir və bu məsuliyyətdən boyun qaçırırlar. Aydındır ki, bu cür hallar da işimizə mənfi təsir edir, yolların işıqlandırılması prosesində problemlər yaradır.

Əlbəttə, hərəkətin təhlükəsizliyi tək yol polisindən asılı deyil. Bu məsələdə sürücü, piyada və hərəkət iştirakçıları diqqətli olmalıdır. Adi bir diqqətsizlik ağır qəzanın və faciənin baş verməsinə səbəb olur.

Ölkə prezidentinin yol polisi ilə bağlı imzaladığı yeni sərəncam korrupsiyanın və rüşvətxorluğun qarşısının alınmasında böyük önəm kəsb edir. Başqa sözlə demiş olsaq bu sərəncam yol polisi və sürücülər arasında şəffaflıq yaradacaq, hər hansı məsələnin və yol hərəkəti qaydasının pozulması zamanı əlavə mübahisələrə və münaqişələrə son qoyacaqdır. Ən azından ona görə ki, yol hərəkəti qaydasını pozan sürücü cəriməni yol polisinə deyil, banklara və plastik kartlarla ödəyəcək. Təbii ki, burda da yol polisi ilə sürücü arasında heç bir problem və anlaşılmazlıq yaranmayacaq.

Ən nəhayət hər hansı bir yeniliyin tətbiqi başqa sözlə demiş olsaq işin müsbət inkişafına təkan verir. Əlbəttə, cərimələrin dövlət büdcəsinə ödənilməsi bütün hallarda baş verə biləcək neqativ halların və çatışmazlıqların aradan qaldırılmasına səbəb olacaq. Bütün bunlarla yanaşı, Bakı Şəhər Dövlət Yol Polisi İdarəsinin əməkdaşları öz vəzifə borclarına bundan sonra da məsuliyyətlə yanaşacaq, hərəkət iştirakçılarının təhlükəsizliyinin təmin edilməsində daha səmərəli fəaliyyət göstərəcək. Gərək bu işdə bizə kütləvi informasiya vasitələri, müxtəlif televiziya kanalları, o cümlədən ictimaiyyət də yaxından köməklik göstərsin. Bax, onda birgə fəaliyyət nəticəsində hərəkətin təhlükəsizliyinin təmin edilməsi üçün çox şeyə nail ola bilərik.

Faiq QİSMƏTOĞLU

Ədalət.- 2011.- 18 fevral.- S. 4.