"İndi deyəcəklər ki, Yunis Hüseynov Kristian Ronaldonu bəyənmədi"

Yəqin ki, Yunis Hüseynov haqqında artıq təqdimat yazmağa ehtiyac yoxdur. Həyatının 33 ilini "idmanın şahı"na həsr etmiş "supersolaxay" hazırda işsizdir. Amma futboldan kənar olsa da, futbolsuz qalmayıb. Dediyinə görə, tez-tez "Neftçi"nin köhnə bazasında dostlarla, veteran həmkarlarıyla görüşür, gənclik illərini yada salıb "qurdlarını öldürürlər". Yunis müəllimlə görüşümüz də məhz bu məkanda baş tutdu. Elə "Karvan"da işlədiyi dönəmdə onunla birgə çalışmış veteran qapıçı Nadir Şükürov və məşqçi Zakir Mahmudov də yanındaydı.

"Mahir Şükürov hazırda yaxşı futbolçudur"

- Bir ildən artıqdır ki, futbolsuzsunuz. Hazırda nə işlə məşğulsunuz?

- Çempionatın oyunlarına baxıram. Konkret heç nə ilə məşğul deyiləm. Düzdür, Gəncə Texnologiya Universitetini bitirsəm də, əsas işim futboldu. Hələlik gözləyirəm.

- Müsahibədən əvvəl bildirdiniz ki, yayda da təkliflər var idi və indi də var. İndiki halda hara getmək ehtimalınız daha çoxdur?

- Bilirsiniz ki, indi futbolçu da, məşqçi də menecerlə iş görür. Menecerlərim bir sıra ölkələrlə danışıqlar aparırlar. Yayda ölkəmizdən də təklif oldu, qəbul etmədim.

- Aşağı liqa təmsilçisi olduğuna görə?

- Xeyr, premyer-liqa komandası idi. Ölkə xaricindən olan iki təklifin birində anlaşılmazlıq oldu, o biri isə məni qane etmədi.

- Məşqçilərimizə adətən Qazaxıstan klubları iş təklif edirlər...

- Hə, elə o ölkədə yaxşı bir klub idi. İrandan da təklif gəldi. Amma yenə də söhbətlər gedir.

- İndi danışıq apardıqlarınız necə, yerli komandalardır?

- Xeyr.

- Haradır?

- Onun açıqlamaq istəmirəm.

- Qazaxıstan, Rusiya...?

- Yox.

- Deməli, işə başlayacağınız halda əsas köməkçiləriniz Nadir Şükürov və Zakir müəllim də sizinlə gedəcək.

- Əlbəttə.

- Bu yaxınlarda mütəxəssislər və jurnalistlər arasında keçirilən sorğuda "Müstəqillik dövrünün ən yaxşı futbolçusu" adına layiq görüldünüz. Siz bu yerdə kimi görürsünüz?

- Bizdə o qədər güclü futbolçular olub ki...Nazim Süleymanov, Vəli Qasımov, Vidadi Rzayev... Kiminsə adını çəksəm o birilər məndən inciyər. Bu haqda azarkeşlər desə daha yaxşı olar.

- Mütəxəssis fikri də maraqlıdır.

- Dediklərimin üzərində qalıram.

- Qəribədir ki, dediyiniz futbolçuların əksəriyyəti Gəncə futbol məktəbinin yetirmələridir...

- Çünki Gəncə futbolu hər zaman güclü oyunçularla yadda qalıb.

- Bəs indiki futbolçulardan kimləri bəyənirsiniz?

- Mahir Şükürov hazırda yaxşı futbolçudur. "Qarabağ"ın hücumçusu Rauf Əliyev, millinin qapıçısı Kamran Ağayev, "Qarabağ"ın "6" nömrəsi Rəşad Sadiqov, onun komanda yoldaşı Əfran İsmayılov, "Gəncə"dən Ceyhun Sultanov daha çox xoşuma gəlirlər.

"O vaxt formamız az olduğuna görə heç bir oyunda dəyişmirdik"

- Öz dövrünüzün ən yaxşı solaxay futbolçusu olmusunuz. İndi isə hətta sol cinahda oynayan futbolçular da sağayaqlılardır...

- Solaxay oyunçumuz var. Amma sırf sol ayaqla yaxşı səviyyədə oynayanını görmürəm. Araz Abdullayevi deyirlər. Hələ ki, çempionatda ondan da baxımlı bir oyun görməmişəm.

- Fransaya 10:0 uduzduğumuz qarşılaşmada iştirak edirdiniz?

- Bəli.

- Bilirsiniz bu sualı niyə verdim? Samir Ələkbərov həmkarlarımıza müsahibəsində deyib ki, həmin qarşılaşmadan sonra rəqib oyunçularla formalarımızı dəyişmək istəyirdik. Məşqçilər qışqırdı ki, "gələn oyuna formamız yoxdur..."

- O vaxt formamız az olduğuna görə heç bir oyunda dəyişmirdik. Ümumiyyətlə, rəqiblə forma dəyişməyim yadıma gəlmir. Komandanın 30 dəst forması olsa dəyişmək olardı.

- Adətən veteran futbolçular deyir ki, indiki şərait o vaxt olsaydı, daha yaxşı nəticə göstərərdik. Sizcə belədir?

- Bizim dövrün futbolçularında ustalıq yüksək idi. Nəyə görə? Çünki SSRİ dağılmışdı və hamısı yüksək liqadan gələn futbolçular idi. Axı, o zaman digər komandalar da güclüydü. Məsələn, Rumıniya dünyada üçüncüydü, Fransa dünya çempionuydu. Amma deyə bilmərəm ki, bu şərait olsaydı, dağı dağ üstünə qoyardıq Lakin daha yaxşı nəticə vermək olardı. Çünki azərbaycanlı futbolçu seçimi çox idi. Təsəvvür edin ki, bütün komandalarda yerli oyunçular çıxış edirdi.

- Yeri gəlmişkən, bu gün yığma komandada legionerlərin oynamasına ehtiyac varmı?

- Əlbəttə yox.

- Məsələn, dayaq yarımmüdafiəçisi olan Aleksandr Çertoqanovun mövqeyində kim oynaya bilər?

- Rəşad Sadiqov. Hətta deyərdim ki, Rəşad Çertoqanovdan on qat artıq oyunçudu. Düzdür, bütün ölkələrin millilərində legioner futbolçular olur. Məsələn, Türkiyədə Kolin Kazım, Portuqaliyada braziliyalı Deku var. Amma bunlar elə səviyyədə olan futbolçulardır ki, yerlilərdən birbaş üstündür, fayda verir. Onu da etiraf edək ki, keyfiyyətli yerli oyunçularımız azdır. Məsələn, Volodimir Levinin yerində oynaya biləcək o qədər yaxşı müdafiəçilərimiz var ki... Elə dünən baxdım ki, "Simurq"da 16 yaşlı perspektivli müdafiəçi var. Vurğun Hüseynov, Tural Nərimanov, Saşa Yunisoğlu kimi oyunçularımızı oynatmaq olar.

- Sizcə, yığma komandada çatışmayan əsas cəhət hansıdır?

- Seçim azdır. Amma oyunla bağlı nəsə deyə bilmərəm, düzgün alınmaz. Çünki Foqtsun oyun planı, futbola baxışı var.

- Bəs azarkeş, yaxud vətəndaş kimi?

- Azarkeş kimi millimizə hər zaman azarkeşlik edirəm, vətəndaş kimi də onun uğurlarını çox istəyirəm.

- Məncə, klublarında ehtiyatda qalan oyunçulara daha çox güvənilməsi zəif cəhətlərdəndir...

- Bayaq dediyimi təkrarlayıram. İstərdim ki, millimiz qrup mərhələsinə düşsün.

- Bir qədər siyasi cavab oldu deyəsən. Siyasətlə aranız necədir?

- Siyasətdən uzaq adamam. Amma vəzifəli dostlarım var.

- Kimlərdir?

- Adını çəkməyək. Gəl siyasətdən danışmayaq, futboldan danışaq.

- Onsuz da futbol da bir siyasətdir... Azərbaycan futboluna hansı istedadlı oyunçuları bəxş eləmisiniz?

- Uşaq məşqçisi olmamışam ki, kimlərisə yetişdirəm. Amma Cəmşid Məhərrəmov, Ruslan Əmircanov, Tural Nərimanov, Samir Abdulov, Cavid İmamverdiyev, Emin Cəfərquliyev, Orxan Həsənov kimi oyunçular böyük futbolda ilk addımlarını mənim yanımda atıblar.

- Azarkeşlik elədiyiniz komanda var?

- Barselona.

- Hər zaman azarkeşlik etmisiniz?

- Bəli. "Barselona"nın oyununa baxanda həzz alıram. Onlarda 50-60 metrlik ötürmələr yoxdur. Olsa da, oyun ərzində 3-4 dəfə olur. Ondan güclü futbol yoxdur və olmayıb da.

- Belə çıxır ki, uğur qazanmaq üçün məşqçinin yaşı önəmli deyil. Çünki baş məşqçi Qvardiolanın cəmi 39 yaşı var...

- Əlbəttə. Məşqçi öz taktikasına uyğun futbolçu seçirsə, deməli istədiyi oyunu göstərə biləcək.

- Fikrinizcə, başqa bir məşqçinin rəhbərliyi altında "Barselona" eyni oyunu göstərə bilərmi?

- Bilər. Oyunçuların keyfiyyəti həddən artıq güclüdür. Amma komandaya elə bir məşqçi gətirirlər ki, onların potensialından düzgün istifadə etməz və komandaya ziyan verər. Taktika saxlanılsa, yenə uğur qazanarlar.

- Bəyəndiyiniz oyunçu kimdir?

- Messi, Xavi, İnyesta.

- Bəs Kristian Ronaldo?

- Heç xoşum gəlmir ondan. Yaxşı futbolçudur e. İndi deyəcəklər ki, Yunis Ronaldonu bəyənmədi... Hərənin bir fikri ola bilər. Messi oyunu təkbaşına həll edə bilər. Ronaldonun oynaması üçün ona meydan verilməlidir. Messi isə balaca bir yerdə çox şey edə bilən oyunçudur.

- Futboldan başqa hobbiniz varmı?

- Bədii ədəbiyyat yox, futbolla bağlı olan kitabları hər gün oxuyuram. Evdə 20-30 futbol kitabım var. Həftədə iki dəfə də futbol oynayıram.

- Adətən idmançılar karyeralarını bitirəndən sonra siqaret çəkirlər...

- Mən 26 ildir siqaret çəkirəm.

- Problem yaratmırdı?

- O vaxt az çəkirdim. Düzdür, səhv eləmişəm. Cavan olanda fikirləşirsən ki, qaçıram və onun zərəri bədəndən çıxır.

- Futbolçularınızdan kimisə buna görə cəzalandırmısınızmı?

- Görməmişəm ki, cəzalandırım. Futbolçunun meydançada özünü göstərməsi 2-3 siqaretlə ölçülmür. Söhbət peşəkardan gedir. Amma bu o demək deyil ki, siqaret çəkmək yaxşıdır.

- Mən Rauf Mehdiyevlə Aslan Kərimovun çəkdiyini eşitmişəm...

- İndi futbolçuların çoxu siqaret çəkir. Amma çəkməyənlər də var.

- Kimlər çəkmir?

- İnanıram ki, həm Rəşad Sadıqov, həm də Rəşad Sadiqov çəkmirlər. Rauf Əliyev, Əfran İsmayılov, Vüqar Nadirov, Ceyhun Sultanov çəkmir. Siqaret çəkmək vərdişdir.

- Niyə gənc oyunçularımız 20-22 yaşlarında geriləməyə başlayırlar. Ortada İlqar Qurbanov, Vaqif Cavadov faktları var. "Ulduzluq xəstəliyi"dir, yoxsa başqa səbəb var?

- Peşəkar deyillər. Söhbət ulduzluqdan gedə bilməz. Çünki ulduz Messidir, Ronaldodur, Xavidir, Ronaldinyodur, İnyestadır. Robinyodur ki, bütün dünya tanıyır. Azərbaycanda nə ulduz? Yaxşı futbolçu ola bilər.

- Futbolçu kimi çılğın olmusunuz?

- Bəli. Çünki uduzmağı sevməmişəm. Amma rəqib oyunçulara hər zaman hörmətlə yanaşmışam.

"Mənim yerimə İqor Ponomaryovu apardılar"

- Fikrimcə, uğur qazanmamağımızın bir səbəbi də budur ki, futbolçularımız tanınmış rəqibləri "böyüdürlər". Söhbət xarici komandalarla, yığmalarla oyunlardan gedir.

- Məndə ömrü boyu elə şey olmayıb. Fikirləşmişəm ki, o deməlidir ki, Yunis Hüseynova qarşı oynayıram. Məsələn, sovet dövründə sol cinahda yarımmüdafiədə oynayanda "Dinamo" Kievdə Litovçenko çıxış edirdi. SSRİ yığmasının oyunçusu idi. Əgər oturub fikirləşsəydim ki, mən bu cür güclü futbolçuya qarşı nə edəcəyəm, o zaman oyunumu itirərdim. Düşünmüşəm ki, hücum etməliyəm və diqtə edən mən olmalıyam.

- Ötənlərin tanınmış futbolçularından kimlərə qarşı oynamısınız?

- Bloxin, Kipiani, Çivadze, Sulakvilidze, Belanov, Şengeriya, Dasayev kimi əfsanələrə qarşı oynamışam. 1986-88-ci illərdə SSR-nin olimpiya yığmasında çıxış etmişəm.

- Amma 1988-ci ildə olimpiya çempionluğunu qazanan heyətdə olmamısınız...

- Xeyr. Mənim yerimə İqor Ponomaryovu apardılar. Avropadan isə Zinəddin Zidana, Rumıniyanın mundialın bürünc medalını qazanan heyətinə, Fransanın dünya çempionu olan heyətinə qarşı oynamışam.

- Milli karyeranızı nə zaman bitirdiniz?

- İnanırsınız, yadıma gəlmir. Amma 1999-cu ildə - 34 yaşımda futbolçu karyeram başa çatdı.

"Gələcəkdə namaz qılmaq istəyirəm"

Bəzən tanınmış futbolçular açıqlama verirlər ki, filan məbləğ qarşılığında yenidən futbola qayıda bilərəm. Sizə belə bir təklif edilsə, yenidən futbol oynayardınız?

- Mümkün deyil. O boş-boş şeylərdir. Yaş öz sözünü deyir.

- Övladlarınızdan idmana həvəsi olan varmı?

- İki qızım var. Hər ikisi şahmatla məşğuldurlar.

- Dindarsınız?

- Xeyr, namaz qılmıram. Amma gələcəkdə namaz qılmaq istəyirəm. Bu hər bir müsəlmanın borcudur.

- Nə zamansa sizə hansısa futbolçunu tapşırıblarmı? Çünki bizdə belə məsələlər dəbdir.

- Yalan sözlərdir. Mənim rastıma gəlməyib. İnanmıram ki, belə şeylər olsun. Heç bir məşqçi özünə düşmən deyil. Hər kəs istəyir ki, yaxşı nəticə versin.

- Məşqçilikdə ən yüksək dərəcə olan "PRO" kateqoriyasına sahibsiniz. Sizin məşqçiniz digər mütəxəssislərin məşq prosesiylə hansı cəhətinə görə fərqlənir?

- Hər kəsin öz məşq prosesi var. Məsələn, impravizəni, topla çalışmaları sevirəm. Futbolçu məşqdə topla daha çox olmalıdır. Təmrinləri tez-tez dəyişirəm. Oyunçu seçimində də topla gözəl davrananlara üstünlük vermişəm.

- Bəs fiziki hazırlıq?

- Onu oyunçuya məşqçi verir. Amma topla davranış sırf texnikadır.

- "Karvan"a gətirdiklərinizdən ən yaddaqalan oyunçu kim idi?

- Bamba, Bəşir Müqədi, Muzika var idi. Sonradan ayrı-ayrı yaxşı klublarda oynadılar. İndi hamısı gedib.

"Xaricdə işləyəsi olsam 4-5 azərbaycanlı futbolçu var ki, onları özümlə aparmaq istərdim"

- Çalışdıracağınız komandaya yenidən həmin oyunçuları aparmaq fikriniz varmı?

- Ola bilər. İşləyəcəyim kluba formada olan futbolçu apara bilərəm.

- Məsələn?

- Elə bir kluba gedərəm ki, imkanları mən istədiyim futbolçuya yetməz. Xaricdə işləyəsi olsam, 4-5 azərbaycanlı futbolçu var ki, onları özümlə aparmaq istərdim.

- Bəlkə 1-2-nin adını çəkəsiniz?

- Vaxtı gələndə deyərəm.

- Uşaqlıq illərinizi necə xatırlayırsınız?

- 6-cı sinfə kimi riyaziyyatdan həmişə "5" almışam. Ondan sonra artıq hər gün küçədə futbol oynayırdım. Gəncənin "Qlavnı" adlanan yerində, bazarın yanında böyümüşəm. Uşaqlığım o yerlərdə keçib. Sonra iki il güləşə getmişəm. 1977-78-ci ildə Gəncədə məşhur futbol məşqçisi olmuş rəhmətlik Kostyanın yanına getdim.

- Azərbaycan futbolunun 100 illik yubileyi yaxınlaşır. Sizcə 100 illik tarixi olan futbolun durumu qaneedicidirmi?

- Onun cəmi 19 ilini müstəqil oynamışıq. Yəqin ki, inkişaf olacaq.

- Niyə bizim çempionatda oynayan futbolçular millilərindən kənarda qalırlar?

- …

- İdman adamları adətən istirahətə vaxt tapmırlar. İstirahətinizi harada keçirirsiniz?

- Yayda Qaxa gedirik. Uşaqlar nənəsigildə dincəlirlər, hərdən də Gəncədə. Mən də azacıq istirahət edirəm. Amma işlədiyim vaxtlarda heç o da qismət olmurdu.

- Əməkhaqqınız nə qədər idi "Karvan"da?

- Normal olub, qane edirdi. Deyə bilərəm ki, orada işlədiyim müddətdə məvacibim artan xətt üzrə gedib. Allah bərəkət versin.

- Futbol aləmində olan insanlara arzularınız...

- Hamısına ilk növbədə cansağlığı arzu edirəm. Qarşıdan ən gözəl fəsil - yaz gəlir. Ölürəm yaz fəslindən ötəri. Əsas da çiçəklər açan vaxtı.

İntiqam VALEHOĞLU

Ədalət.- 2011.- 18 fevral.- S. 5.