Türk Xalqlarının Vətəndaş Cəmiyyəti Forumu təsis olundu

Bakıda 5 qeyri-hökumət təşkilatı Türk Xalqlarının Vətəndaş Cəmiyyəti Forumunu (TXVCF) təsis edib. APA-nın məlumatına görə, təsisçilər "Demokratik Azərbaycan Naminə", "Demokratik İslahatçı Gənclər", "Sağlam İnkişaf və Maarifləndirmə", "Yeni Həyat" Humanitar və Sosial Dayaq və "Bakı Gənclər Klubu" ictimai birlikləridir.

Forumun əlaqələndiricisi Vüsalə Hüseynova yaratdıqları yeni qurumun siyasi təşkilat olmadığını deyib. O bildirib ki, forum türkdilli xalqların vətəndaş cəmiyyəti institutlarının bir qurumda cəmlənməsi niyyəti ilə yaradılıb: "Forum bütün türkdilli dövlətləri və respublikaları əhatə edəcək. Artıq bizə müxtəlif türk respublikalarındakı QHT-lərdən foruma qoşulmaq məqsədilə 88 müraciət məktubu daxil olub". Qurumun məqsədi türk respublikalarındakı müxtəlif problemləri qabartmaq, ortaq türk dili və türk əlifbasının yaradılmasına cəhd göstərmək və digər məsələlərdən ibarətdir. Forum həmçinin Qarabağ problemini də xüsusi olaraq gündəmə gətirəcək. Qurum bu il Türk Xalqlarının Vətəndaş Cəmiyyətlərinin I Bakı Forumunu keçirmək niyyətindədir.

Tədbirdə RF Tatarıstan Respublikasının Azərbaycandakı daimi nümayəndəsi Nail Zaripov, Türkiyənin Azərbaycandakı səfirliyinin nümayəndəsi İsmayıl Çalışkan da çıxış edərək yeni qurumu dəstəklədiklərini bildiriblər.

Ədalət.- 2011.- 18 fevral.- S. 6.