LAÇIN, AY LAÇIN

Amma nə gözəl, amma nə doğma

Gələcəyə nə qədər ümidli olsaq da, nikbinliyimizi necə təmkinlə qoruya bilsək də, söhbət növbəsi düşmənlərimizin işğal etdiyi rayonlardan düşərkən xəyal bizi haralara aparmır... Onda qala bu söhbət hələ bir o gözəl, ürəyimizin bir parçası doğma Laçından düşə. Laçın yasaqlığı, Qarabağ yaylası, Qızılboğaz zirvəsi, iti axarlı dağ çayları, axına qarşı üzən forellər, buz bulaqlar, meşələr, yaylaqlar... Kiçik, amma nə gözəl, amma nə doğma Laçın şəhəri. Sanki əl-ələ verərək dağlardan-düzlərə, düzlərdən-dağlara yallı gedirmiş kimi 120 kənd-oba, böyük bir yurd üzü, yurd ocağı...

Laçın, ay Laçın...

Bəsdir daha! Xiffət kövrəldib, kövrəldib uzaqlıq gətirər həmişə. Bunları özümə deyirəm, özümə irad tuturam. Axı doğma Laçınımızı, doğma Qarabağımızı nə vaxtsa düşməndən azad edəcəyimizə, özü də yaxın vaxtlarda azad edəcəyimizə daha çox inananlardan biri elə özüməm.

Hər sabahın xeyir olsun, Taxtakörpü!

Laçınlılar Ağcabədi rayonunun Taxtakörpü qəsəbəsində daha sıx məskunlaşıblar. Rayonun mərkəzi idarəetmə qurumları da burada yerləşir. Elə 70,5 min nəfər əhalinin 13 min nəfəri də Taxtakörpüdə yaşayır. Qalan laçınlılar isə respublikanın 58 şəhər və rayonlarında məskunlaşaraq yaşayıb çalışır, qələbə sevinci ilə yurda qayıdış günlərini gözləyirlər.

Ancaq indi hər bir köçkün ailənin, eləcə laçınlı məcburi köçkünlərin məskunlaşdıqları yerlərdə həyat şəraitinin yaxşılaşdırılması, təhsil, səhiyyə və digər sosial tələbatlarının yüksəldilməsi olduqca vacib məsələdir və dövlətimiz bu istiqamətdə mühüm tədbirlər həyata keçirir. Laçın Rayon İcra Hakimiyyətinin başçısı Ramiz Cəbrayılov və onun formalaşdırdığı icra komandası gecəli-gündüzlü çalışıb gələcəyə nikbinliklə baxır. 2010-cu ildə laçınlı məcburi köçkünlərin məskunlaşdığı ərazilərdə abadlıq-tikinti, mənzil-məişət şəraitinin yaxşılaşdırılması istiqamətində xeyli iş görülmüş, sosial-iqtisadi və mədəni sahələrdə bir çox tədbirlər həyata keçirilmişdir.

2010-cu ildə Taxtakörpü qəsəbəsində Dövlət Sosial Müdafiə Fondunun rayon şöbəsi üçün yeni inzibati bina tikilib istifadəyə verilmiş, qəsəbədə və respublikanın digər rayonlarında fəaliyyət göstərən 20 ümumtəhsil məktəbində, 3 səhiyyə və 6 mədəniyyət müəssisəsində cari və əsaslı təmir işləri həyata keçirilmişdir. Dünyaya Baxış Beynəlxalq Humanitar Təşkilatının maliyyə dəstəyi ilə Taxtakörpüdə hər biri 100 yerlik iki uşaq bağçası tikilmişdir. Həmin təşkilat tərəfindən müxtəlif məsələlərlə bağlı əlavə olaraq 26 mikrolayihə həyata keçirilmişdir.

Taxtakörpü qəsəbəsində laçınlı şəhidlərin adlarının əbədiləşdirilməsi üçün Xatirə Kompleksi ucaldılmışdır. Burada Gənclər parkı yaradılmış və həmin parkda 600-dək müxtəlif ağac və gül kolları əkilmişdir.

Ərazidə məskunlaşmış məcburi köçkünlərin elektrik enerjisi ilə bağlı problemlərinin həll olunması məqsədilə Dövlət Proqramına əlavələrə müvafiq olaraq rayonun müstəqil elektrik şəbəkəsi müəssisəsi yaradılmışdır.

2010-cu ilin aprel ayında Taxtakörpü qəsəbəsinə təbii qaz xəttinin çəkilməsinə köməklik göstərilməsi ilə bağlı Azərbaycan Respublikası Nazirlər Kabinetinə və Dövlət Neft Şirkətinə müraciət edilmiş, məsələnin müsbət həllinə nail olunmuşdur. Artıq Taxtakörpü qəsəbəsinə təbii qaz çəkilməsində son tamamlama işləri aparılır

Burada bir şəhər qurulur

Azərbaycan Respublikası Prezidentinin sərəncamı ilə təsdiq edilmiş "Qaçqınların və məcburi köçkünlərin yaşayış şəraitinin yaxşılaşdırılması və məşğulluğunun artırılması üzrə Dövlət Proqramı"na əlavələrin icrası olaraq Laçın rayonundan olan 313 məcburi köçkün ailəsinin müvəqqəti məskunlaşdığı Taxtakörpü, 239 laçınlı ailəsinin məskunlaşdığı Ağcabədi rayonu ərazisindəki "Alman" və "Yasıyol" fin tipli qəsəbələrindəki sakinlərin mənzil-məişət şəraitinin yaxşılaşdırılması məqsədilə 552 ailə üçün yeni qəsəbənin tikintisinə başlanılmışdır. Rayon icra hakimiyyəti başçısının birinci müavini İlham Quliyev bizimlə söhbəti zamanı məlumat verərək bildirdi ki, yeni qəsəbənin salınması üçün 627 hektar torpaq sahəsi ayrılıb. Hazırda qəsəbənin tikintisi başlanılmaqla davam etdirilir. Burada mənzillərlə yanaşı 15 sinif otaqlı yeni məktəb binası, 70 yerlik uşaq bağçası, ambulatoriya, iki su deposu da tikilir.

Əvvəllər inşa olunan köçkün qəsəbələrindən fərqli olaraq, bu yaşayış massivində bütün daxili yollar asfalt olacaq və hər bir ev qazlaşdırılacaq. Qəsəbənin içməli su ilə təchizatı üçün 2 sutəmizləyici qurğu quraşdırılacaq. Bu həm də ətrafda yaşayan məcburi köçkünlərin də içməli su təminatını yaxşılaşdıracaq.

Məcburi köçkünlərin Sosial İnkişafı Fondu ilə aparılmış məqsədyönlü tədbirlər nəticəsində 2010-cu ildə Bakı şəhərində yerləşən 7 saylı, Sumqayıtdakı 10 saylı yataqxana binaları təmir edilmiş, Taxtakörpü ərazisindəki Ərdəşəvi, Qarakeçidi obalarında, Beyləqan rayonunun Binnətli kəndində, Oğuz rayonunun Kərimli kəndində avtomobil yolu çınqıl örtüklə bərpa olunmuş, Şəki rayonunun Bolludərə kəndində, Ağsu rayonunun Xanbulaq kəndində içməli su xətləri yeniləri ilə əvəzlənmişdir.

120 yaşlı Minkənd məktəbi

Rayonun tarixində əlamətdar hadisələrdən biri 2010-cu ilin fevral ayında Prezident İlham Əliyev cənablarının xeyir-duası ilə rayonun qocaman təhsil ocaqlarından biri - Minkənd orta məktəbinin 120 illik yübileyi yüksək səviyyədə qeyd edilmişdir. Yubiley münasibətilə ölkə başçısının müvafiq sərəncamları ilə 2 nəfər müəllim "Tərəqqi" medalı almış, 1 nəfər müəllim isə "Əməkdar müəllim" fəxri adına layiq görülmüşdür. Minkənd kənd orta məktəbinin 120 illik yubileyi ilə bağlı sənədli film çəkilmiş, məktəbin tarixi və fəaliyyəti ilə əlaqədar məlumat kitabçası hazırlanmışdır. 2010-cu ildə respublikanın müxtəlif elm, təhsil və digər sahələrində çalışan laçınlı ziyalıların rayon icra hakimiyyətində görüşü, eləcə də Ombudsman Elmira Süleymanovanın, Azərbaycan Yazıçılar Birliyinin sədri Anarın görüşləri keçirilmişdir. Azərbaycan Respublikası Mədəniyyət və Turizm Nazirliyi Taxtakörpü qəsəbəsində məskunlaşan məcburi köçkünlər üçün respublikanın tanınmış sənət adamlarının iştirakı ilə "Qış nağılı" adlı bayram tədbiri təşkil etmişdir. Ötən ilin dekabr ayının 26-da qəsəbənin mədəniyyət evində "Ulu sazın sehri" adlı tədbirin keçirilməsi və Azərbaycan Aşıqlar Birliyinin sədri Zəlimxan Yaqubun tədbirdə iştirakı yaddaqalan mədəni-kütləvi tədbirlərdəndir.

Məzahir ƏHMƏDOĞLU

Ədalət.- 2011.- 18 fevral.- S. 7.