NUMEROLOGİYA,

YAXUD ƏDƏDLƏR HAQQINDA ELM

(əvvəli ötən şənbə saylarımızda)

Rəqəmlər gündəlik həyatımızda

Adamlar inanır ki, onların həyatında həm yaxşı, həm də pis günlər olur. Şübhəsiz, onlar pis günün təsirindən qaçmaq üçün günləri necə seçmək lazım olduğunu bilmək istərdilər.

Numerologiyada hər günün doğum tarixi rəqəmi və ad rəqəmi olduğu kimi, özünə xas olan vibrasiya rəqəmi də var.

Belə bir doğum tarixi rəqəmini götürək: 5 mart 1946. Alınan say belədir: 28=10=1; sonra insanın ad rəqəmini götürək: g6 və verilən günün rəqəmini götürək, tutaq ki, 11 fevral 2011= 8. Alınan rəqəmləri toplayırıq: 12=3 və açar rəqəmi olan 3.

Bundan sonra günlərin aşağıda verilmiş cədvəlinə baxın.

Günlərin rəqəm cədvəli

1 2 3 4 5 6 7 8 9

10 11 12 13 14 15 16 17 18

19 20 21 22 23 24 25 26 27

28 29 30 31

1- Bir məqsəd üçün müəyyən və aydın fəaliyyət günüdür. Hər hansı problemin dərhal və səmərəli həlli vaxtıdır. Yeni praktik işlərə, xüsusən, müqavilə və sazişlərin bağlanması, notarial sənədlərin hazırlanması, hüquqi, həmçinin təcili həll edilməli yüngül işlərə başlamaq üçün yaxşı gündür. Bu gün imkanlar geniş olur.

2- Birbaşa müdaxiləni və təcili məşğul olmağı tələb etməyən məsələlərin planlaşdırılması və qiymətləndirilməsi günüdür. Bütün mümkün çətinliklərə bir də sənin qətiyyətsizliyin əlavə oluna bilər. Ziddiyyətlər günüdür: əvvəli yaxşı başlayan bir iş pis qurtara bilər, yaxud əksinə, pis başlanğıcı olan bir iş yaxşı nəticə verər. Bu gün yaxşı olar ki, fəal işlərdən kənar olasız, qoy başqaları işləsin, yox, əgər işiniz imkan verirsə, bu sizə rahatlıq gətirirsə, işə qoşula bilərsiz.

3- Müxtəlif işlər, həmçinin köhnə yarımçıq işləri qurtarmaq üçün əlverişli gündür. Bizneslə məşğul olmaqla hərdən istirahət də edin. Yeni layihələr, fəal əməkdaşlıq, şərikli müəlliflik, partnyorluq üçün yaxşı gündür. Bu gün başqalarına mane olmayın. Əlbir fəaliyyət ən çətin məsələlərin düzgün həllini tapmağa kömək edər. Müxtəlif görüşlər, xüsusən işgüzar səfər və səyahətlər, həmçinin şənlik və əyləncələr üçün münasib gündür.

4 - Gündəlik qayğılar, kiçik işlər üçün yaxşı gündür. Yaxşısı budur ki, bu gün evdə qalıb çoxdan beyninizdə olan bir ideyanın üzərində düşünün. Əyləncə vaxtı deyil. Bu gün yalnız işləmək lazımdır. Əsas işləri buraxıb xırda işlərlə özünüzü aldatmayın. Onsuz da bunun faydası olmayacaq.

5 - Güc, qüvvət və sərgüzəştlər gətirən, qəfil və gözlənilməz hadisələrlə dolu gündür. Düşündüyünüz məsələnin real və diqqətəlayiq olduğuna inanaraq riskə gedin. Yalnız ciddi surətdə əsaslandığınız , zəruri olduğuna inandığınız yeni bir işə başlaya bilərsiz. Yalnız xoş niyyətlə səyahətə çıxın. Bu gün çoxdan gözlədiyiniz uğur üzünüzə güləcək, çoxdan başladığınız iş sərfəli nəticələr verəcək.

6 - Xeyirxahlıq, qarşılıqlı anlaşma, harmoniya, rahatlıq və könüllü işlər günüdür. Təcili və qətiyyətli hərəkətlərdən, tələsik qərarlardan çəkinin, yeni işlərə başlamayın. Təsərrüfat işləri, konfrans, ictimai yığıncaqlar üçün, həmçinin dostlarla, doğmalarla görüşmək üçün münasib gündür. Amma bu gün adicə bir inamsızlıq sizin üçün müdhiş nəticələr verər, hər hansı risk təhlükəlidir. Uzun müddət üzərində işlədiyiniz və hazırladığınız bir iş üçün bu gün kuliminasiya nöqtəsi ola bilər.

7- Düşünmək, təlim və intellektual məşğələlər, elmi-tədqiqat işləri, həmçinin bütün növ bədii və incəsənət işləri üçün əlverişli vaxtdır. Yarımçıq işi davam etdirmək, məsləhət və tövsiyə almaq yaxşı olar. Bu gün çox vaxt xoşbəxtlik gətirir.

8- Böyük və mühüm işlər günüdür, sürətli hadisələr əlverişli nəticələr verir, vacib və ciddi işlər tez və asanlıqla həll edilir, maliyyə və sərmayə sazişləri yaxşı mənfəət gətirir, iri işlər xırda təşkilatları, trest, şirkət və federasiyalarda birləşdirməyi tələb edir.

9- Mükəmməl gündür. Perspektivli işlər, mühüm planlar, həmçinin əlaqələri möhkəmləndirmək üçün yaxşıdır. Şəxsi uğurlar günüdür. Xüsusən ədəbiyyat və incəsənət adamlarını bu gün şöhrət gözləyir. Kommersiya və maliyyə işləri üçün gözəl imkanlar açılır.

Beləliklə, əziz oxucu, əvvəlcə öz doğum tarixinin, sonra familiya və adının vibrasiya rəqəmini tap, daha sonra sənin üçün düşərli olan fəaliyyət gününü müəyyən et.

Gələn şənbə nömrəmizdə isə sizi Pifaqorun rəqəmli qoroskopu və İnsan taleyi ilə bağlı məlumatlarla tanış edəcəyik.

(Ardı var)

Ədalət.- 2011.- 12 fevral.- S. 10.