GƏNCLİYƏ MƏHƏBBƏTLƏ

Ömrü çiçək qədər oldu, ah!

Kimdən küsdü cavanlığım?

C.Novruz

Şərəfli həyatının bahar təravətli gənclik illərini, ən gözəl zamanlarını Azərbaycanın milli mədəniyyətinin, maarifçiliyinin tərəqqisinə, inkişafına həsr etmiş professor Əkrəm Cəfər 20-30-cu illərin sənət aləminə lirik, romantik ovqatlı şeirlər müəllifi kimi qədəm qoymuş, dövrün ədəbi-bədii mühitində Məhəmməd Əkrəm, Əkrəm Cəfərzadə imzaları ilə tanınmışdır. Turançılıq ənənələrinə sadiq Cavid ədəbi məktəbinin yetirməsi olan Əkrəm Cəfər "Maarif və mədəniyyət", "Şərq qadını" kimi nüfuzlu dərgilərdə sayılıb-seçilən istedadlı şair-publisist məramı ilə fəaliyyət göstərmişdir. Məhəbbət nəğməkarı Mikayıl Müşfiqin, habelə, Səməd Vurğunun əziz dostu, qardaşı, sirdaşı olmuş gənc Əkrəm bədii söz sənətinin alovlu tərcümanı olaraq "Rəsmin", "Zövq içində təhəssür", "Həyat səsləri", "Hüseyn Cavidə açıq məktub", "Bir xəyal", "Sevgimin nəğməsi" kimi ədəbi dairələrin diqqətini cəlb etmiş onlarla bir-birindən dəyərli poeziya nümunələri qələmə almışdır.

"Kardeş edebiyyatın hocalarından biri" (N.Hikmət) olan Əkrəm Cəfər XX yüzilin filologiya aləmində əsasən böyük şərqşünas alim kimi tanınsa da, ömrünün son illərinə qədər bədii yaradıcılığını davam etdirmiş, heca, sərbəst, əruz vəznli poetik janrlarda hətta, irihəcmli ədəbi-bədii əsərlər yaratmışdır.

Biz yaxın vaxtlarda, ustadın poeziya qovluqlarını araşdırarkən, onun gəncliyə, bahara, məhəbbətə, hicran-vüsal fəlsəfəsinə həsr edilmiş lirik-romantik şeirlərinə rast gəldik. Respublikamızda hər il olduğu kimi, bu il də qeyd olunan Gənclər günü münasibətilə Əkrəm Cəfərin poeziya çələngindən bəzi nümunələri istəkli oxucuların nəzər-diqqətinə təqdim edirik.

SOKRAT CƏFƏR

Ədalət.- 2011.- 22 fevral.- S. 7.