Səfir Hulusi Kılıc: "Xocalı qətliamı dünyada törədilmiş ən dəhşətli faciələrdən biridir"

Türkiyənin Azərbaycandakı səfirliyində TRT telekanalının Bakı təmsilçiliyinin Xocalı faciəsinin 19-cu ildönümü ilə əlaqədar çəkdiyi "Duyun artıq" sənədli filminin təqdimatı keçirilib. APA-nın məlumatına görə, filmin quruluşçu rejissoru Nailə Əkbərova, quruluşçu operatoru Vüqar İbadov, rejissor assistenti Aybəniz Rəfiyevadır.

Təqdimat mərasimində çıxış edən TRT-nin Bakı təmsilçiliyinin rəhbəri Yüksel Dəyərcan bildirib ki, 1992-ci ildə fevralın 25-dən 26-na keçən gecə törədilən bu faciəyə TRT "Duyun artıq" deyir: "Erməni vəhşiliklərini bütün dünyaya çatdırmaq hər birimizin borcudur. Biz bu cür münasibətə yetər deyirik. Bu gün sizlərə təqdim etdiyimiz bu film TRT ekranlarında nümayiş etdirilib. Film vasitəsi ilə çox məqamları aşkara çıxarmaq və tamaşaçılarımıza çatdırmaq istəmişik".

Türkiyənin Azərbaycandakı səfiri Hulusi Kılıc bildirib ki, bu film vasitəsi ilə türk dünyası və dünya ictimaiyyəti bir daha Xocalı qətliamını izləyib. Səfir bu günə qədər susmağın kifayət olduğunu qeyd edib: "Biz artıq barış, əmin-amanlıq istəyirik. Biz bütün bunlara yetər deyirik. Bu ədalətsizliyə, haqsızlığa son qoyulmalıdır. Xocalı qətliamı dünyada törədilmiş ən dəhşətli faciələrdən biridir".

Tədbirdə millət vəkilləri Gülər Əhmədova, Məlahət İbrahimqızı və başqaları da çıxış edərək öz fikirlərini bölüşüblər. Çıxışlardan sonra 30 dəqiqəlik film nümayiş etdirilib. Filmdə Xocalı faciəsinin şahidləri, millət vəkilləri, tarixçilər danışdırılıb. Eyni zamanda filmdə Xocalı faciəsindən görüntülər də yer alıb. Filmin rejissoru Nailə Əkbərova deyib ki, ekran əsərinin çəkilişi bir həftə davam edib.

Ədalət.- 2011.- 23 fevral.- S. 7.