"RÜBAİLƏR"

Mənə elə gəlir ki, Ömər Xəyyam imzasını tanımayan, onun rübailərindən xəbərdar olmayan tək-tək adamla qarşılaşmaq və yaxud da mövcudluğuna rast gəlmək mümkündür. Çünki Ömər Xəyyam şərq aləmində özünün orijinal və hikmət dolu rübailəri ilə həmişə gündəmdə olmuş, hətta onun bir çox rübailəri zərb məsələlərə, hikmətli sözlər yüksəkliyinə qalxmışdı.

"Araz" nəşriyyatı bu ilin ilk ayında 200 səhifədən ibarət olan rübailər kitabını nəfis şəkildə çap edərək oxucuların ixtiyarına təqdim edib. Kitabın naşiri və redaktoru Əlirza Sailovdu. Xüsusi qeyd etmək lazımdır ki, kitab həm də rəssam işi ilə paralel bir şəkildə oxucuya təqdim edildiyindən rübailərlə bir tamlıq yaradır. Məsələn:

Əfsus gəncliyimin

dövranı getdi,

Ömrümün xoş bahar

zamanı getdi.

Gənclik dedikləri o

quş bilmirəm,

Nə zaman tərk edib

bu canı getdi.

Və yaxud:

Ağıl bu qədəhə

söyləyərək sən,

Öpür məhəbbətlə

min yol üzündən.

Onu gör nə zərif

yaratmış fələk,

Sındırıb məhv edir

sonra qəfildən.

Və yaxud:

Bəs deyilmi bunca

xalqı incitmək,

Yazıq insanların

ətini didmək.

Tutaq ki, sənindi

bütün bu dünya,

Axırı nə olar-

Fənaya getmək!

Doğrudan da xüsusi zövqlə hazırlanmış və səhifələrin özündəki bir aura kitabı oxumaq üçün adamda bir daxili təlabat hissi yaradır. Vərəqləri çevirdikcə kitabdan qopub ayrılmaq olmur. Bu da onu göstərir ki, böyük və qüdrətli söz bütün zamanlar üçün əbədiyaşardır, ölməzdir. Məsələn:

Məndən də Xəyyama

yetirin salam,

Ona söyləyin ki,

xamsan, ey Xəyyam!

Nə vaxt dedim

şərab içməsin arif?

Mən meyi xamlara

etmişəm haram.

Və yaxud:

Kövsərdir gördüyüm

hər axar bulaq,

Gözəl bir cənnətdir

hər çiçəkli bağ.

Cəhənnəm sözünü

burax, cənnətdə,

Bir gözəl dilbərlə otur,

kefə bax.

Bu gün Azərbaycan oxucusunun qapısını açmağa haqqı olan kitabların sırasında zənnimcə, Ömər Xəyyamın "Rübailər"inin yeri görünür. Tələsib bu kitabı əldə etmək onunla müəyyən məqamlarda baş-başa qalıb dünyanı unutmağa dəyər.

Ədalət.- 2011.- 12 fevral.- S. 17.