TALIŞ DAĞLARINDAKI "İSTİ-SU"

İndi bu sanatoriya-istirahət mərkəzinin qaynar çağlarıdır

(əvvəli ötən sayımızda)

Günün "qəhrəmanları"

Müalicəvi əhəmiyyəti misilsiz olan isti su vannalarından qəbul etmək istəyənlər burda üstünlük təşkil edir. 20 otaqdan ibarət bu hissədə həmişə kimsə var. Kükürd qoxuyan isti vannadan sonra bir az sərinlənmək üçün soyuqdan qorunmaq şərti ilə burda ayaqüstü bir stəkan çay içmək olar. Həkim söhbətini davam etdirir:

- Bəzən vaxtları az olan müsafirlərimiz nadir hallarda bir gündə iki vanna qəbul edirlər. Sizin dostunuz, bizim daimi müsafirimiz Hüseyn müəllim həmin o kateqoriyadandır. Əslində bu düzgün deyil. Deyəsən dünən sizi də özünə qoşub...

Şirvan şəhər sakini, iş adamı, özəl həyatı "məcaralarla" dolu olan Hüseyn Bayramov yüngülcə dizimdən vurub qulağıma pıçıldayır: "Bu həkim üçüncü vannanı bilməyib, bilsəydi yəqin təcili yardımla bizi Masallı rayon Mərkəzi Xəstəxanasına göndərərdi. Açığı, mən çox vaxt elə belə də edirəm. Sən də qorxub eləmə, ölüb eləsən "Yasin"ini özüm oxuyacam. Bilirsən axı, mənim həm də gözəl avazım var"...

Şükür Allahım, bədbəxt hadisənin bir addımlığından belə Hüseyn öz zarafatından qalmır. Doğrusu mən həkimdən daha başqa şey eşitməmək üçün sağollaşıb otağıma qalxıram. Artıq gecə yarıdır...

Bura həm də istirahət zonasıdır

Heç şübhəsiz ki, kifayət qədər geniş əraziyə, 160 yerlik mehmanxanaya, sosial, iaşə obyektlərinə malik olan "İsti-su" -ya gələnlərin hamısı müalicə üçün gələnlər deyil.

İstirahət etməyə, təbiətin qoynunda qayğısız günlər yaşamağa gələn ailələrə, kollektivlərə burda hər cür şərait yaradılmışdır. Viləş çayındakı çimərlik, dəryaçada gəmi ilə gəzinti, idman meydançası daim qonaqların ixtiyarındadır. Burdakı müsafirlər hətta qonşu Yardımlı, Astara, Lənkəran, Lerik rayonlarına belə turist səfərlərinə aparılırlar. Bir sözlə, burdakı xidmət növlərinin hamısı insanların mədəni istirahətlərinə hesablanmışdır.

Dağların ətəklərinə səpələnmiş, hər cür şəraiti olan otaqların, iaşə xidmətlərinin xidmət haqları da elə baha deyil. 4-5 nəfərlik ailə burda 450-500 manata bir həftə dincələ bilərlər.

2011-ci il turizm ilidir

"İsti-su" sanatoriyasının axşamları daha maraqlı olur. Masallı sakinlərinə xidmət edən kiçik tutumlu avtobuslar cəmi 30 qəpiyə bura tələsənləri mənzil başına çatdırırlar. Viləş çayının sahilində istirahət edənlərə müxtəlif xidmətlə bərabər at sürməyə, hətta dağ boyda dəvələrlə səyahət etməyə şərait yaradılır.

"İldırım" firmasının prezidenti Hacı İldırım Allahyarovla da görüşümüz burda təsadüfən oldu. Neçə illər öncədən tanıdığım İldırım müəllim istirahət edənlərə qoşulub at yarışına baxırdı. "Bu cavanların belə at çapmalarına baxanda gəncliyim yadıma düşür. Ancaq, şükür Allaha, heç indi də pis deyiləm. Ancaq deyəsən gənclik arxada qalıb axı.

2011-ci il Azərbaycanda "Turizm ili" elan edilib. Mənə qədər özün gəzib görmüsən, ancaq aşağıdakı "mədə suları" bulağını görməmisən. Bir orada baş çəkərsən. Çalışırıq ki, "İsti -su" sanatoriyasından heç kəs narazı qalmasın. Hələ yay qabaqdadır, imkan tapan kimi yenə gələrsən. Onda özüm səni qonaq edəcəm".

Doğurdan da yay hələ yeni başlayıb. Demək "İsti-su" sanatoriyasına yenə də yön salmaq olar. Axı bu dəfə Hacı İldırımın şəxsən özü qayğıma qalacaq.

Səxavət Məmmədli

Ədalət.- 2011.- 14 iyul.- S.3.