DAĞLAR QOYNUNDA QƏRAR TUTMUŞ YURDLARIMIZ

Onlardan biri də Daşkəsəndi

Özünün coğrafi ərazisini, təbii mənzərələrini və bütövlükdə qeyri-adi mühitinə görə dünyanın istənilən guşəsi ilə müqayisədə qalib gəlmək haqqı olan Azərbaycan həm də qədim yurd yerləri, mədəniyyət mərkəzləri, sənaye, kənd təsərrüfatı ünvanlı müəssisələri ilə bütün zamanlarda tanınıb və bu gün də tanınmaqdadı. Biz öz tariximizə yanaşma baxımından müəyyən laqeydliklərə yol verdiyimiz üçün bəzən özümüz özümüzü bəzən yaxşı tanımırıq. Yaxşı tanımadığımıza görə onu yaxşı tanıdıb təqdim edə də bilmirik. Amma şükürlər olsun ki, Azərbaycan müstəqillik əldə edəndən sonra öz tarixini, öz milli-mənəvi dəyərlərini tanıtmaq, təqdim etmək baxımından respublikamızda Dövlət Proqramı çərçivəsində bütün parametrləri nəzərə alınmaqla geniş elmi təqdimat işləri, həmçinin də təbliğat yönümlü fəaliyyət öz miqyasını xeyli genişləndiribdi. Görünən bu işlərin ümumi mənzərəsində Daşkəsənin də, bu qədim yurdumuzun da öz payı, öz yeri var.

Dağlar qoynunda yerləşən Daşkəsən təbiəti, coğrafiyası baxımından digər regionlarımızdan xeyli fərqlənir. Burada yeraltı, yerüstü sərvətlər, dağ çayları, sərin bulaqlar, bir-birinə söykənən qayalar adamı ilk baxışdan özünə cəlb edir. Təbii ki, bu qədim yurdun dağ qeyrətli, dağ ürəkli insanları da Daşkəsəni qorumaq, yaşatmaq, təbliğ etmək, tanıtmaq, xüsusilə milli müstəvidə müasirləşdirmək istiqamətində ardıcıl işlər aparırlar. Daşkəsən rayon İcra Hakimiyyətinin başçısı Əhəd Abıyevin rayonun cari ilinin 6 ayının yekunlarına dair keçirilən müşavirəsində çıxış edərkən bildirmişdi ki, son illərdə təbiət şıltaqlıqları rayona, əhalimizə müəyyən zərərlər vursa da, bu, ictimaiyyətimizi, adamlarımızı sarsıtmadı, əksinə, bizim torpağa bağlılığımızı bir az artırdı. Qurub-yaratmaq, dağılanları yeniləri ilə əvəz etmək, bərpa etmək, əvvəlkindən də gözəl bir şəkildə araya-ərsəyə gətirmək istəyimizi bir az da coşdurdu. Bu işdə respublika rəhbərliyinin, xüsusilə Azərbaycan prezidenti cənab İlham Əliyevin diqqət və qayğısı rayonun həyatı ilə yaxından maraqlanması bizə son dərəcə böyük dəstək oldu. Təkcə son üç ayda rayonda xeyli iş görülüb - deyən rayon rəhbəri onu da vurğulayıb ki, biz daxili imkanlar hesabına da müəyyən problemləri həll etməyə müvəffəq olmuşuq. Belə ki, şəhər məscidi əsaslı təmir edilmiş, şəhərin görkəmli, diqqəti çəkən yerlərində yeni iaşə və məişət xidməti göstərəcək binanın tikintisinə başlanmışdır. Sel suları nəticəsində dağılıb sıradan çıxmış obyekt və qurğular, müxtəlif su-kanalizasiya sistemləri təmir olunmuş və bu istiqamətdə də işlər davam etdirilməkdədir. Ümumiyyətlə, dağlar qoynunda yerləşən rayonumuzu gözlənilməyən təbii fəlakətlərdən qorumaq üçün kompleks layihə işlənib hazırlanıbdı.

Bu gün Daşkəsəndə həyat qaynayır. Artıq "Daşkəsən filiz saflaşdırma" ASC, Azərbaycan Şəkər İstehsalat Birliyi, Daşkəsən Əhəngdaşı Mədəni öz fəaliyyətini genişləndirir. Çovdar qızıl yatağında artıq istismarla bağlı hazırlıq işləri sürətləndirilir. Bu müəssisələr tam gücü ilə fəaliyyətə başlayandan sonra burada 300 nəfərdən artıq daşkəsənli daimi işlə təmin ediləcəkdi, rayonun ayrı-ayrı yaşayış məntəqələrin də qəzalı vəziyyətdə olan 35-dən artıq yaşayış evinin bərpa və təmiri üzrə layihə smeta sənədləri də hazırlanaraq müvafiq dövlət qurumlarına təqdim edilmişdi. Rayon icra hakimiyyətinin təşəbbüsü və rəhbərliyi altında 7 məktəb binası tikilmiş, onların əsaslı təmir və avadanlıqlarla təmin edilməsi üçün aidiyyəti qurumlara müraciətlər ünvanlanmışdı. Ümumiyyətlə, Daşkəsəndə təhsil, səhiyyə ocaqlarının tikintisi, təmiri, bərpası bu gün ən aktual məsələlərdən biridi.

Azərbaycan prezidentinin məlum regionların inkişafına dair Dövlət Proqramı çərçivəsində abadlaşan, yenidən qurulan Daşkəsən turizmin inkişafı üçün də böyük imkanlara malikdi. Elə rayon rəhbərliyi də bu istiqamətdə müəyyən addımları atmağa müvəffəq olubdu. Yaradılan şərait, xüsusilə Daşkəsənin özünün relyefi insanları bu bölgəyə son illərdə daha tez-tez cəlb edir, səsləyir. Prezident Adminstrasiyasının "Daşkəsən rayonunda kənd təsərrüfatının 2011-2015-ci illər üzrə inkişaf proqramı" layihəsi ilə bağlı təkliflər rayonda ətraflı müzakirə edilib hazırlanaraq paytaxta göndərilmiş və bu proqramın tezliklə maliyyələşdiriləcəyinə böyük ümidlər bəslənilir. Təbii ki, bu layihə gerçəkləşdiriləndə Daşkəsən bir az da gözəlləşəcək, bir az da göz oxşayan, könül açan bir guşəyə çevriləcəkdir.

Bu gün ölkənin ümumi inkişaf müstəvisində öz yeri, öz payı olan Daşkəsən zəhmətkeş, təşəbbüskar, dünyanın müasir tələblərini yüksək səviyyədə mənimsəyən təcrübəli insanların rəhbərliyi və əməyi ilə inkişaf edir. yollar çəkilir, işıq, rabitə xətləri yeniləşir, sosial-məişət obyektləri, məktəblər, xəstəxanalar insanların istifadəsinə verilir. Bu da onu göstərir ki, təbiətin ən gözəl guşələrindən birində yaşayan insanlar öz zəhmətləri ilə, öz təşəbbüsləri ilə bu gözəlliyi bir az da cilalayır, bir az da möhtəşəm edirlər. Deməli, gözəlliyi qorumaqla yanaşı, onu daha da gözəl etmək insanın gücü daxilindədi. Daşkəsənlilər də ölkə rəhbərinin diqqət və qayğısı ilə məhz bu istiqamətdə uğurla irəliləyirlər. Necə deyərlər, sükanı belə saxlayın, uğurları bir az da artırın.

Əbülfət MƏDƏTOĞLU

Ədalət.- 2011.- 23 iyul.- S.4.