UĞURLU BİR LAYİHƏ

Onun təqdimatı Atatürk Mərkəzində oldu

Dünən Azərbaycanın ictimai-siyasi həyatında özünəməxsus yeri olan və hər dəfə də bir-birindən uğurlu, diqqət çəkən müzakirələrin, təqdimatların ünvanına çevrilən millət vəkili, AMEA-nın müxbir üzvü, professor Nizami Cəfərovun rəhbərlik etdiyi Atatürk Mərkəzində yeni bir layihənin bəhrəsi olan "Türk dünyası birliyi ideyası və Heydər Əliyev" kitabının geniş təqdimatı keçirildi.

İctimaiyyət nümayəndələrinin, mətbuat işçilərinin, elm adamlarının qatıldığı bu tədbirdə xüsusilə bir məqam mənim üçün vacib göründü. Bu da həmin təqdimat mərasimi çərçivəsində "Türk Birliyi: dünən, bu gün, sabah" adlı konfransın keçirilməsi idi.

Konfransı giriş sözü ilə Atatürk Mərkəzinin sədr müavini Osman Mustafayev açaraq tədbir iştirakçılarını salamladı. O, mərkəzin yaranma tarixindən, onun məram və məqsədindən danışmaqla keçirilən konfransın və təqdimatın əhəmiyyətini də xüsusilə vurğuladı. Sonra söz kitabın təsisçi redaktoru, Türk Gənclər Birliyinin rəhbəri, şair Əkbər Qoşalıya verildi.

Oxucular tərəfindən imzası həmişə maraqla qarşılanan Əkbər Qoşalı layihə barəsində, araya-ərsəyə gətirilmiş kitabın əhəmiyyətindən, bu layihənin ideya müəllifi, məqalələr toplusunun elmi redaktoru, professor, doktor Nizami Cəfərovun, layihə rəhbəri Dəyanət Osmanlının fəaliyyətindən bəhs etdi və bildirdi ki, bu cür layihələr türk dünyasının bir-birinə inteqrasiyasını daha da sürətləndirir, əməkdaşlıq, qardaşlıq əlaqələrini daha da genişləndirir. Tədbir aparıcısı Əkbər Qoşalı konfransın daha maraqlı və canlı keçməsi üçün sözü layihə rəhbəri Dəyanət Osmanlıya verdi. O da öz növbəsində görülən işin əhəmiyyətindən, ona bu yolda verilən dəstəkdən ürək dolusu danışaraq iştirakçılara təşəkkürünü bildirdi.

Konfransda çıxış edən filologiya elmləri doktoru, tənqidçi alim Rüstəm Kamal və digərləri 4 ay müddətində həyata keçirilən layihənin orta və ali müəssisələrdə oxuyan yeniyetmə və gənclər üçün nəzərdə tutulduğunu vurğuladı. O, toplunun elmi, filoloji və mənəvi keyfiyyətlərini şərh etməklə təşkilatçıların Azərbaycan Respublikası Prezidenti Yanında Qeyri-Hökumət Təşkilatlarının Dövlət Dəstəyi Şurasının maliyyə dəstəyi ilə ictimai birlik olan "Türk dünyası info"ya olan qayğı nəticəsində çox gərəkli ideyanın gerçəklənməsinə nail olduqlarını vurğuladı.

Ümumiyyətlə, konfransa qatılanlar bu gün ölkədə aparılan uğurlu siyasətin bir qolu olan QHT-lərə dövlət dəstəyi nəticəsində araya-ərsəyə gətirilən bir-birindən maraqlı layihələrin zəruri olduğunu, onlara ehtiyac duyulduğunu vurğulamaqla bu cür işlərin davamlı olmasını arzu etdilər. Fikir mübadiləsi ilə başa çatan konfransda iştirakçılara layihənin nəticəsi olan məqalələr toplusu da hədiyyə edildi.

Əbülfət MƏDƏTOĞLU

Ədalət.- 2011.- 16 iyul.- S.2.