İnam Atanın (Asif Atanın) sonevi ziyarət olundu

Ata tərəfdarları "Ata Sonevini Ziyarət Günü" Mərasimini keçirdilər

İyunun 5-i (5 Şölə) Mütləqə İnam dünyabaxışının yaradıcısı, dahi Azərbaycan filosofu İnam Atanın (Asif Atanın) öldüyü gündür. Bu münasibətlə 5 iyun 2011-ci ildə Mütləqə İnam Ocağının evladları və Ocaqsevərlər onun Ağstafadakı sonevini ziyarət ediblər. Ata tərəfdarları onun öldüyü gündə ənənəvi olaraq 13-cü dəfə "Ata Sonevini Ziyarət Günü" Mərasimini keçiriblər. Bu barədə Mütləqə İnam Ocağının Yükümlüsü İşıqlı Atalı bildirib.

Sonevlikdə Ocaq Bayrağı asılıb. İştirakçılar Ataya rəmzi müraciət sözü deyiblər: "Ziyarətinə gəldik-işimizlə, içimizlə, İnam Ata!"

Tədbirdə "Özündəki Mütləqlə Səhər Təması", "Ataya Səhər Ricası" deyilib, Mütləqə İnam Ocağının yas qaydasına uyğun olaraq "Ölümlə görüş", "Aqibət" içsəsləri, "Matəm üstə Mütləqlə Təmas" oxunub.

Tədbiri giriş sözüylə Mütləqə İnam Ocağının Yükümlüsü İşıqlı Atalı açıb: "Mütləqə İnam Ocağı hər il bu günü ənənəvi mərasimlə qeyd edir. Ata bəşərin aqibətinə düşmüş xilasdır. Onun insan uğrunda uca işi bəşəriyyət üçün fədakarlıq örnəyidir. Dünyanın, həyatın, insanın ali mənasını ifadə edən Müqəddəs Kitablar, Ocaq kimi ruhani qurum yaradan Atamız əslində ölməzdir. Biz deyirik ki, İnam Ata, ulusun sənin istədiyin kimi yaranmaqdadır. Atanın Mütləqə İnamı ilə güclüyük, yenilməzik".

Ocağın Ruhani Başçısı Safruh deyib: "Atanı 37 ildir tanıyıram, sevirəm, oxuyuram, öyrənirəm, haqqında söz deyirəm. İstəyirik ki, insanların, xalqın içində ruhanilik, həqiqətə sevgi, həqiqət qarşısında ayağını geriyə qoymaq halı yaransın. Atanın adıyla bağlı keçirilən tədbir, alınan nəfəs o istəyə xidmət edir. Biz buna nail olmaq cəbhəsindəyik. Buna çatmaqdan ötrü insan özünü yaratmalıdır, şüarçılıqdan çıxmalıdır, mənanı canlı insanlarda görməyi bacarmalı və sevməlidir".

Ruhani Başçı ötən bir ildə Ocağın gördüyü zəngin işlərdən də danışıb.

Tədbirdə "İnam Ata və ölümsüzlük", "İnam Ata və xalqı" mövzularında düşüncələr dinlənilib.

Yazıçı-publisist Əlisahib Əroğul Ataya sayğısını belə ifadə edib: "İkinci dəfədir ki, Atanın sonevini ziyarət edirəm. Atanın zəngin irsini öyrənirəm. Görürəm ki, Ata insan, xalq, bəşər uğrunda canından keçib".

Fəlsəfə elmləri doktoru, professor Adil Əsədov deyib ki, Asif Atanın kitabları onun həyatına önəmli təsir göstərib: "Filosof odur ki, o, yeni söz deməyə insanların həyatına yeni məna verməyə çalışır. Asif Ata İnam yaradıcısıdır. Onun ardıcılları dünyabaxışını ləyaqətlə yaşadırlar".

Vaxtilə Atanın təhsil aldığı Ağstafa şəhər 3 saylı orta məktəbin direktoru Aydın İbrahimoğlu söyləyib: "Atanı dəyərli filosof kimi əsərlərindən tanımışam. Fəxr edirəm ki, Asif Ata bizim məktəbin məzunu olub".

Şəmkirli Ocaqsevər Möhsün Tağıyev Atayla görüşünü xatırlayıb: "Atanın böyüklüyünü vaxtında anlaya bilmədim. Bu gün Ata sonevini ziyarət etdiyim üçün özümü xoşbəxt sayıram".

Yolnur Atalı: "Atanı tapdım- xoşbəxtliyimi tapdım. Ataya sevgim - ona aşiqliyimin səcdə məqamıdır".

Şair-publisist Vüqar Vaqifoğlu Ata İnamına bağlılığından danışıb: "Asif Atanın böyük dühası qarşısında baş əyirəm".

Şair Ayaz İmranoğlu Ataya həsr etdiyi şeirini oxuyub.

Davud Səidoğlu: "Ata insanlığa səcdə yaratdı"-deyib.

Yolruh Atalı çıxışında İnam Atanın ölməzliyinin mahiyyətini açıb.

Doğma Atalı, Amalnur Atalı da Atayla bağlı fikirlərini söyləyiblər.

Ziyarət törəni "Ata Ruhunu ürəyimizdə aparırıq!", "Atamız var olsun!" səcdələri ilə başa çatıb.

Tədbirdən sonra ziyarətçilər Atanın vaxtilə təhsil aldığı Ağstafa şəhər 3 saylı orta məktəbdə də olublar.

Ədalət.- 2011.- 7 iyun.- S.6.