QARABAĞ HESABATI

Qarabağ göyləri bir az dumandı,

Bu duman çəkilər, ay anam-bacım.

Koroğlunu doğan Yurd anaları,

Mübariz yetirər, ay anam-bacım.

Demirəm başına qaralar bağla,

Demirəm həmişə yas tutub ağla.

Az qalıb, sökülər dan Qarabağda,

Ümid bar gətirər, ay anam-bacım.

Son qərar sənindi, yadların deyil,

Baxma uzaqlarda o, bu nə deyir.

Söylə Qarabağdan sabahın xeyir!

El-oba al geyər, ay anam-bacım.

Dəryadan ilxı çıxar

ağzından od püskürər.

Dəlidağlı oğullar

minər dəli atlar,

Çapar yağının üstə.

Qılıncı ildırımdı

qalxanı dəmirağacı.

Leşi leş üstünə,

başı baş üstünə

Xain düşmənin.

Ruhumda dolaşan

bu qeyrətimlə

Qalxaram ayağa

sel kimi, torpaq kimi

gedərəm üstünə şərin, nakəsin

Ağac-ağac,

bayraq-bayraq gedərəm.

Qarşımda dayanmaz

Nə bənd, nə bərə.

"Əlvida" deyərəm

Qarabağsız günlərə.

Son söz bizimdir

hərzə-hədyan danışana

Gədə-güdə söhbətinə

elə baxma

canım Qarabağda

son söz bizimdir!

O söz deyiləcək -

qədim-qayım söz

Mən sənə demirəm

ömür boyu döz

Deyiləcək günü var,

söz də güllə kimidir

Məqamı var, anı var.

O söz mənim sözümdür,

O söz sənin sözündür.

Son söz sənindir, sənin

Sənindir, Azərbaycan!

Varlığı şah sənəddi

Onsuz açılmaz sabahım.

Keçmişimdən əmanətdi,

Gələcəyə hesabatım,

Qarabağım, Qarabağım

Yolunda başım sadağa,

Qoy eşitsin yaxın-yadım.

Ünvan budur -- Qarabağa!

Gələcəyə hesabatım,

Qarabağım, Qarabağım.

Dağları arxamdı mənim,

Onsuz işləməz saatım.

Dosta dost, düşmənə qənim,

Gələcəyə hesabatım,

Qarabağım, Qarabağım

İMANOĞLU Rasif

Ədalət.- 2011.- 10 iyun.- S.7.