TƏRƏQQİSİ İLƏ GÖZ OXŞAYAN İSMAYILLI

İSMAYILLIYA GƏLSƏN, QAYIDIB YENƏ GƏLƏRSƏN

...Regionlara səfərim çərçivəsində son mənzilim ölkəmizin "Sənətkarlar paytaxtı" kimi elan edilmiş İsmayıllı rayonu oldu. Vaxtım az olsa da, burada keçirdiyim müddətdə şəhərin giriş qapısından mərkəzinədək hər bir guşəsinə diqqət yetirdim. Gördüklərim məni hədsiz sevindirdi. 6-7 il bundan əvvəlki şəhərə bənzəmirdi İsmayıllı. Belə ki, rayon ərazisində yerləşən və tarixin qiymətli abidələri olan Qız qalası, Cavanşir qalası, Mustafaxan qalası, Niyal qalası ilə yanaşı, şirinsulu mineral bulaqları, yaşıl donlu meşələri, müqəddəs məkanı olan Babadağ ziyarətgahı və gözoxşayan digər mənzərələri İsmayıllının nəinki "Sənətkarlar paytaxtı" həm də "turizm səltənəti" kimi məşhurlaşmasına səbəb olub. Coğrafi mövqeyinə görə dağ rayonu olan İsmayıllı Böyük Qafqazın cənub yamacında yerləşir. Girdiman və Göyçay çaylarının sağ və sol sərhədlərini təşkil edir. Hal-hazırda ərazisi 2074 kv olan rayonun meşə ərazisi də 66 min hektardır.

Bu baxımdan qədimliyinə və fauna, flora zənginliyinə görə Talıstan, Topçu meşələri xüsusilə seçilir. Rayonun bir çox kəndləri şirin su ehtiyatından əziyyət çəksə də Qalacıq, Aşıqbayramlı və Diyallı kəndləri isə mineral bulaqlarla zəngindir.

Ölkəmizin dünyada talerant bir ölkə kimi tanınmasında payı olan İsmayıllı yerli əhalisi ruslardan ibarət olan özünəməxsus İvanovka kəndi ilə hər birimizə məlumdur. Qədimdən indiyə qədər müxtəlif xalq sənətkarlığı ilə məşğul olan ismayıllılar bu sənəti qoruyub saxladıqları üçün cari ildə 20 rayon arasından "Sənətkarlar paytaxtı" kimi ad qazanmışdır. Bu baxımdan xalq sənətkarlığının əsas beşiyi hesab olunan Basqal qəsəbəsi də artıq öz tarixi şöhrətini geri qaytarmaqla yanaşı həm də sakinlərin işsizlik problemini həll etmiş olacaq. Onu da qeyd edək ki, Basqal sənətkarları tərəfindən toxunan kəlağayılar, ipək parçadan hazırladıqları çadra və çarşablar hər zaman nadir sənət incisi kimi turistlərin diqqət mərkəzindədir. Ümumiyyətlə isə Basqal ölkəmizin orta əsr şəhər mədəniyyəti elementlərini özündə qoruyub saxlayan qəsəbələrindəndir. Beləliklə, qədim tarixə, zəngin adət-ənənələrə, qonaqpərvərliyə və füsünkar təbiətə malik olan İsmayıllı rayonu son 5-6 ildə həyata keçirilən Regionların inkişafına dair Dövlət proqramına əsasən öz mənzərəsini xeyli abadlaşdırmışdır.

Belə ki, salınan asfalt yollar, səkilər, abadlaşdırılmış küçə və meydanlar, bank filialları, digər sosial və iqtisadi obyektlər adı çəkilən proqramın reallaşdırdığı uğurlu layihələrdir. Bir sözlə bu şəhərdə də Bərdə də olduğu kimi qədimlik ilə müasirliyin harmoniyasını gördüm. İsmayıllıya yolu düşən hər bir kəs mütləq bu gözəlliklərin canlı şahidi olmaq üçün yenidən bu diyara səyahət edəcək.

SOSİAL İQTİSADİ İNKİŞAFIN YARATDIĞI MÖCÜZƏLƏR

Ümumiyyətlə, Dövlət Proqramının uğurlu icrası nəticəsində son 7 ildə ölkəmizin ümumi daxili məhsulu təxminən 3 dəfə, iqtisadiyyatımızın potensialı isə 14 faiz artmışdır. Eləcə də proqramın rayon üzrə uğurlu icrası iqtisadiyyatın daha da möhkəmləndirilməsinə gətirib çıxarmışdır. Təsadüfi deyildir ki, bu illər ərzində iqtisadiyyatın gücü 3-4 dəfə artmışdır. Dövlət proqramının birinci mərhələsində görülən işlər gələcək uğurlar üçün əlverişli zəmin yaratmışdır. Sonrakı 3 ildə əldə olunmuş nailiyyətlər bunu deməyə əsas verir. Görülən tədbirlər nəticəsində rayon iqtisadiyyatının əksər sahələrində dirçəliş hiss olunmuş, uzun illərdir ki, həllini gözləyən bir çox problemlər öz həllinə qovuşmuşdur. Son üç ildə rayonda abadlıq-quruculuq işlərinə xüsusi diqqət ayrılmış, ən çox maliyyə vəsaiti də bu istiqamətdən olan layihələrə xərclənmişdir. Bu dövrdə tikilib istifadəyə verilmiş obyektlərdən yeniyetmə və gənclərin sevimli məşq yeri olan Olimpiya idman kompleksini, rayon prokurorluğu və texniki peşə məktəbi üçün yeni inzibati binalar, şəhərin mərkəzində çoxmərtəbəli yaşayış binası, yeni yay kinoteatrı, tarix-diyarşünaslıq muzeyini, iki otel kompleksini, idman əyləncə klubunu, iki bank və bir sığorta təşkilatını qeyd etmək yerinə düşər.

Genişmiqyaslı abadlıq-quruculuq işləri rayonun mərkəzində, küçə və yollarında, parklarında da davam etdirilmişdir. Belə ki, şəhərin mərkəzinədək keçən əhəmiyyətini itirmiş kanal aidiyyəti orqanların razılığı ilə doldurulmuş, üzərində yaşıllıq zolağı salınmışdır. Şəhərə arxitektura baxımdan gözəllik və tarixilik bəxş edən qala divarı hörülmüş, "Şəhidlər Xiyabanı"nın ətrafına dekorativ hasar çəkilmişdir. Heydər Əliyev parkında, muzeyində və onun ətrafında olan tikililərdə yenidənqurma işləri aparılmışdır və yeni əzəmətli giriş portalı quraşdırılmışdır.

Onu da qeyd edək ki, həmin parkın ərazisində ölkəmizdə ilk dəfə olaraq yapon mütəxəssislərinin səyi nəticəsində "Yapon bağı" salınmışdır və gənclərin istirahəti üçün yeni mərkəz diskoteka inşa olunmuşdur. İkinci dünya müharibəsində həlak olanların xatirəsini əbədiləşdirən abidə və "şəhidlər xiyabanı" yeni üslubda təmir edilmiş və vahid "Xatirə kompleksi" yaradılmışdır. Həmin kompleksin, eləcə də şəhərin 4 küçəsində müasir işıqlandırma sistemi quraşdırılmışdır. Həmçinin şəhərin 10 müxtəlif küçələrinə və 5 kəndinə asfalt vurulmuş, 5 küçəsinə isə çınqıl döşənmişdir. Qəzli çayının üzərində isə yeni körpünün salınması da əldə olunan uğurlardandır.

Eləcə də şəhərdə bir neçə binanın dam örtüyü dəyişdirilmiş, fasadları rənglənmişdir. Eyni zamanda rayonun təhsil, səhiyyə və mədəniyyət sahəsi üzrə də xeyli işlər görülmüşdür. Belə ki, son 3 ildə rayonda 6 kəndin orta məktəbi üçün yeni binalar tikilmiş, 4 kənd məktəbində isə əsaslı təmir işləri həyata keçirilmişdir. Cari ildə isə Soltankənd orta məktəbinin yeni binası üçün tikinti işləri davam etdirilir. İsmayıllı rayonu təhsilin keyfiyyətinə görə fərqlənən rayonlardandır. Əldə olunan nəticələr bunu deməyə bir daha əsas verir. Məktəblilər hər il keçirilən intellektual müsabiqələrdə və fənn olimpiadalarında iştirak edərək yüksək yerlər qazanırlar. Rayonun təhsil işçiləri də hər il keçirilən "ən yaxşı ümumtəhsil məktəbi" və "ən yaxşı müəllim" müsabiqələrində iştirak edərək uğurlu nəticələr qazanırlar.

Qeyd edək ki, cari ildə də həmin mötəbər müsabiqələrdə iştirak etmiş rayonun 4 ümumtəhsil məktəbi və 3 nəfər qabaqcıl müəllimi müsabiqənin mərhələlərini müvəffəqiyyətlə keçərək yüksək ballar toplayıblar. Rayonun təhsil sistemində sadalanan uğurlarla yanaşı hələ də öz həllini gözləyən bir çox problemlər qalmaqdadır. Belə ki, təhsil sistemləri tam olaraq nə istiliklə, nə də texnika, avadanlıqlarla təchiz edilməyib. Xüsusilə rayonun bir çox yaşayış məntəqələrində uşaq bağçalarının açılmasına ciddi ehtiyac var. Fəaliyyətdə olan 10 bağçadan 8-nə yeni bina tikilməlidir. Təhsilin keyfiyyəti isə daha da yüksəldilməlidir.

(ardı gələn sayımızda)

Ədalət.- 2011.- 23 iyun.- S. 3.