Əli Əhmədov: "Azərbaycanda korrupsiyaya qarşı mübarizə bundan sonra da davam etdiriləcək"

"Azərbaycanda son bir neçə ay ərzində korrupsiyaya qarşı mübarizə istiqamətində səylər əhəmiyyətli dərəcədə güclənib. Bu mübarizə həm inzibati forma və metodlarla, həm də qanunvericilik bazasının təkmilləşdirilməsi ilə aparılır". APA-nın xəbərinə görə, bunu Korrupsiyaya Qarşı Mübarizə Komissiyasının üzvü, Yeni Azərbaycan Partiyasının (YAP) icra katibi, partiyanın sədr müavini Əli Əhmədov deyib.

O bildirib ki, Azərbaycan xoşagəlməz korrupsiya hallarına qarşı mübarizənin öndə gedən dövlətlərindən birinə çevrilib: "Hesab edirəm ki, bu siyasət bundan sonra da davam etdiriləcək". Ə.Əhmədov onu da deyib ki, Azərbaycanda korrupsiya və digər bu kimi xoşagəlməz halların mövcudluğu bəzi mətbu orqanlarda məqsədli şəkildə təqdim olunan kimi deyil.

"Əgər Türkiyə tərəfi rəsmi şəkildə Yeni Azərbaycan Partiyasına bu ölkədə keçiriləcək seçkinin gedişini izləmək üçün dəvət göndərərsə, biz bu prosesdə iştirak edərik". Məsələ ilə bağlı jurnalistlərə açıqlamasında Yeni Azərbaycan Partiyasının (YAP) icra katibi, sədr müavini Əli Əhmədov deyib. O bildirib ki, Azərbaycanın rəsmi strukturları olan Milli Məclis və Mərkəzi Seçki Komissiyası Türkiyədə keçiriləcək parlament seçkilərini izləyəcək: "Çünki bu qurumlara dəvət olacaq".

Ə.Əhmədov Türkiyənin dost və qardaş ölkə olduğunu xatırladaraq bildirib ki, 12 iyun seçkilərində xalq hansı partiyanı dəstəkləyərsə, bu, həm Azərbaycan xalqı, həm də YAP üçün məqbul olacaq: "Ancaq bunu da vurğulamalıyam ki, YAP-la Ədalət və İnkişaf Partiyası (AKP) arasında çox yaxşı ilişkilər var. Biz mütəmadi olaraq müxtəlif səviyyələrdə toplantılar keçirir, müzakirələr aparırıq. Onu da məmnunluq hissi ilə deməliyəm ki, qardaş dövlət Türkiyədə AKP hökumətinin rəhbərliyi altında həm iqtisadiyyatın, həm də digər sahələrin inkişafında yüksək nəticələr əldə olunub. Türkiyə son illərdə sürətlə inkişaf edib. Bu ölkə hazırda dünyanın ən çox inkişaf etmiş 20 ölkəsindən biridir. Digər sahələrdə də inkişaf var. Bütün bu nailiyyətlərin əldə olunmasında isə Türkiyədə hakimiyyətdə olan AKP-nin çox böyük xidmətləri ayrıca qeyd olunmalıdır. Hesab edirəm ki, türk seçicilər bütün bunların hamısını nəzərə alacaq".

Ədalət.- 2011.- 2 iyun.- S. 2.