DÜNƏNİNƏ BƏNZƏMƏYƏN MÜASİR YEVLAX

İLHAM ƏLİYEV: "YEVLAX BU GÜN AVROPANIN ƏN QABAQCIL ŞƏHƏRLƏRİNDƏN BİR ADDIM DA GERİ QALMIR"

(əvvəli ötən sayımızda)

Rayonun elektrik enerjisi və təbii qazla təminatı məsələsi də qüvvədə olan problemlərdəndir. Qeyd olunan zaman kəsiyində əhalinin keyfiyyətli və fasiləsiz elektrik enerjisi ilə təmin edilməsi istiqamətində ardıcıl tədbirlər görülmüşdür. Hal-hazırda Yevlaxın bütün məntəqələri tam sutka boyu elektrik enerjisi ilə təmin edilir. Elektrik verilişindəki fasilələri aradan qaldırmaq məqsədilə keçən il iki elektrik xətti və 33 transformator əsaslı təmir olunmuş, 112 elektrik dirəyi dəyişdirilərək 12 yeni transformator quraşdırılmışdır. Analoji inkişafı rayonun təbii qazla təmin edilməsi sahəsində də müşahidə etmək olar. İl ərzində rayonun 10 yaşayış məntəqəsi, 3 küçəsi, bütövlükdə isə indiyə qədər Yevlaxın 49 qəsəbə və kəndlərindən 20-si təbii qazla təchiz edilmişdir. Cari ildən isə rayonun Cırdaxan, Balçılı, Ağqıraq, Salahlı və Xaldan zonası kəndlərinin qazlaşdırılması istiqamətində tədbirlər görülür. Proqramın sonunadək bütün kəndlərin, qəsəbələrin qazlaşdırılması nəzərdə tutulub. Əvvəlki illərə nisbətən əhaliyə göstərilən rabitə və poçt xidmətlərinin səviyyəsində yüksəlmə qeydə alınmış, 2009-cu illə müqayisədə keçən il bu sahə üzrə artım 40 faizi ötüb keçmişdir. Həmçinin rayonun 5 kəndində yeni poçt binaları və ümumi 311 telefon çəkilişi həyata keçirilmişdir.Qeyd olunan dövrdə təhsil, səhiyyə və mədəniyyət sahəsi üzrə də ciddi irəliləyişlər qeydə alınmışdır. Şəhərdə təhsilin maddi-texniki bazasının möhkəmləndirilməsi, müasir təhsil sisteminin və düşüncə tərzinin formalaşması məqsədilə bir sıra işlər görülmüşdür. Belə ki, son iki ildə Yevlaxda 3 yeni məktəb binası tikilmiş, 4 orta məktəb binasında, şəhər Uşaq-Gənclər idman məktəbində və bir uşaq bağçasında əsaslı təmir işləri aparılaraq istifadəçilərin ixtiyarına təhvil verilmişdir. Keçən il orta məktəbi bitirmiş məzunlardan 255 nəfəri tələbə adını qazanmış, onlardan 2 nəfəri 600-dən, 28 nəfəri isə 500-dən çox bal toplamışdır. Rayon müəllimlərindən 4 nəfəri "Əməkdar müəllim" fəxri adına layiq görülmüş, 1 nəfəri isə "Tərəqqi medalı ilə təltif olunmuşdur. Lakin rayonun təhsil sistemində hələ də bir çox problemlərin, qalması o cümlədən təhsil üzrə əldə olunmuş nəticələrin qənaətbəxş olmaması narahat doğuran məqamlardandır. Son iki ildə Yevlaxda 9 kənd xəstəxanası həkim məntəqəsinə çevrilmiş, 3 kənddə isə yeni tibb məntəqəsi yaradılmışdır. Mərkəzi xəstəxanada isə yeni ginekologiya və cərrahiyyə şöbəsi təşkil edilmişdir. Hal-hazırda isə 235 çarpayılıq Regioanal klinik xəstəxananın tikintisi davam etdirilir. Ərazi Vərəm dispanserinin tikintisi isə proqramın sonunadək reallaşdırılması planlaşdırılır. Rayonun səhiyyə sahəsində xidmətləri olan üç nəfərə isə "Əməkdar həkim" adı verilib. Qeyd olunan dövr rayonun mədəni və idman həyatında da bir çox tədbirlərin keçirilməsi ilə yadda qaldı. Yeni yaradılan Elektron kitabxana və əsaslı təmirdən çıxmış Uşaq kitabxanası, Meyvəli kənd kitabxanası, klubu yeni avadanlıqlarla təchiz edilərək istifadəçilərin ixtiyarına təhvil verilmişdir. Gələcək illərdə isə şəhərdə Uşaq Yaradıcılıq Mərkəzi və Uşaq musiqi məktəbinin tikintisi planlaşdırılan layihələrdəndir. Həmçinin rayonun mədəni həyatındakı fəaliyyətinə görə isə 3 nəfərə "Əməkdar mədəniyyət işçisi" fəxri adının verilməsi ürək açan məqamlardandır. İl ərzində də rayonun idman həyatında yeniyetmə və gənclərin iştirakı ilə 50-dən çox tədbirin keçirilməsi onların vətənpərvər, sağlam və mədəni ruhda böyüməsinə xidmət göstərmişdir. Lakin hələ də Yevlaxda Olimpiya İdman kompleksinin olmaması, bu sahənin kəsir tərəfidir. Adı çəkilən kompleksin yaxın illərdə tikilməsi planlaşdırılan obyektlər sırasında olması sevindirici həldır. Artıq sənaye şəhəri kimi xüsusi ad çıxarmış Yevlax həm də aqrar rayondur. Bu sahə üzrə 4 toxumçuluq təsərrüfatı fəaliyyət göstərir. Əvvəl ki, illə müqayisədə ötən ildə obyektiv səbəblər üzündən taxıl istehsalı 13 ton azalmış, 72 ton ət, 291 ton süd, 498 ton çox pambıq istehsal olunmuşdur. Bundan əlavə aparılan quruculuq -abadlıq işləri nəticəsində son 7 ildə Yevlaxda 380 ədəd müğtəlif təyinatlı ticarət, xidmət obyektləri tikilmiş və yenidən qurulmuşdur. Görülən işlərdən aydın olur ki, Yevlax çox sürətlə inkişaf edir, dirçəlir. Təbii ki, bütün bunlar ölkə prezidentinin həyata keçirdiyi düzgün islahatların məntiqi nəticəsidir. Bu inkişafı isə daim diqqət mərkəzində saxlayan prezident tez-tez regionlara səfər edir, görülən işlərlə yaxından tanış olur, yeni tikilmiş obyektlərin açılışında iştirak edir, lazımi tövsiyyə və göstərişlərini verir. Məhz Yevlax rayonu da bu baxımdan çox şanslı rayonlardandır. Son 7 ildə rayona 5 dəfə səfər edən Prezident İlham Əliyev rayonda olarkən, sakinlərlə görüşərkən onlara ürəkdolusu gözaydınlıqlar, uğurlar diləyib. Maraqlısı budur ki, bu görüşlərdən üçü son iki ilin payına düşür. Hətta 2010-cu ildə İlham Əliyevin rayona iki dəfə baş çəkməsi ilin ən böyük töhfəsi kimi rayon tarixinə yazılıb.Prezident 2009-cu ilin martın 2-də rayona səfəri çərçivəsində 4 iri obyektin, yəni Yevlax Xalq Teatrı binasının, "EL-TV" regional televiziya Şirkətinin, Uşaq Xəstəxanasının və Şahmat məktəbinin açılışında iştirak etmişdir.

Keçən ilin oktyabr, noyabr aylarındakı səfərində isə Prezident 13 belə obyektin açılışında iştirak etmişdir. Bu obyektlərdən 4-ü orta məktəb, o cümlədən "Bayraq" meydanını, MTN-nin Yevlax şəhər şöbəsini, Yevlax Regional Miqrasiya İdarəsini, Əhalinin Sosial Müdafiəsi Mərkəzini, "Bank of Azərbaijan"ın Yevlax filialını, "azərtoxum" MMC-nin toxumçuluq müəssisəsini, Bulvar istirahət kompleksində inşa olunmuş Fəvvarəni, şəhid və Qarabağ müharibəsi əlilləri üçün yaşayış binasını və məcburi köçkün ailələri üçün inşa edilmiş yaşayış binaları kompleksini də qeyd etmək yerinə düşər. Görülən işlər tək bununla yekunlaşmır, son beş ildə şəhərin prospekt, küçə və meydanlarında, xiyaban və parklarında, səkilərində, yaşayış məhəllələrində abadlıq-quruculuq, kənd yollarında isə əsaslı təmir işləri aparılmışdır. Hal-hazırda isə Yevlaxda müxtəlif təyinatlı 27 obyektin tikintisi istiqamətində ciddi işlər görülür, proqramın sonunadək tikilməsi nəzərdə tutulan növbəti 25 obyektin layihəsi planlaşdırılır.

Bəli, Yevlax tikilir, qurulur, yeni layihələrin icrasına başlanılır və hər bir tədbir,atılan addım rayon sakinlərinin həyat səviyyəsinin yüksəlməsinə və şəhərin müasirləşməsinə gətirib çıxardır. Təsadüf deyil ki, rayonda olarkən həmsöhbət olduğum yevlaxlıların da hər tərəfli qayğıya və inkişafa görə çox sevindiklərinin canlı şahidi oldum.

İnanırıq ki, hər bir yevlaxlı bu cür inkişafın davamlı olması üçün əsl vətəndaş kimi üzərlərinə düşən vəzifənin öhdəsindən layiqincə gələcək.

Sonda isə prezident İlham Əliyevin sitatı ilə bu rayona olan xoş arzulara mən də qatılıram": Mən ümid edirəm ki, növbəti dəfə Yevlaxa gələndə burada daha yeni gözəl işləri görəcəyəm. Sizə, bütün yevlaxlılara bu işlərdə yeni uğurlar arzulayıram. Bir daha sizi təbrik edirəm".

Günel İsayeva

Ədalət.- 2011.- 2 iyun.- S. 7.