"Azərbaycanın dərdi bizim də dərdimizdi"

Türkiyə səfirliyinin dini işlər üzrə müşaviri Sadıq Əraslan: "Qarabağın işğaldan azad ediləcəyi gün uzaqda deyil"

"Türkiyə ilə Azərbaycan vahid bir bədən kimidi. Bu bədənin bir əzası ağrıyırsa hökmən digər əzalar da ağrını hiss edir. Ağdam, Şuşa, Kəlbəcər, Laçın, Füzuli, Xocalı işğal altındadırsa Ədirnə, Qaziantep, Bursa, Sivas narahatlıq keçirir. Can Azərbaycanın ərazi bütövlüyünə qəsd olub. İnsanlar doğma torpaqlarını ermənilərdən azad etmək üçün döyüşüb, şəhid olub, sağlamlıqlarını itiriblər. Azərbaycanın dərdi bizim də dərdimizdi. Mən özüm Qaziantepdənəm. Doğulduğum şəhər savaşlarda 6 min şəhid verib. Ona görə də sizin dərdinizi başa düşürəm".

Bu sözləri Türkiyə Cümhuriyyətinin Azərbaycandakı səfirliyinin dini işlər üzrə müşaviri Sadıq Əraslan deyib. Bakıya yeni təyin olunan müşavir Xocalı soyqırımının ildönümü münasibəti ilə düzənlənən tədbirdə erməni vəhşiliyi barədə danışarkən baş verənlərin dünya ictimaiyyətinə çatdırılmasının vacibliyini vurğulayıb: "Xocalı soyqırımı haqqında Azərbaycana təyin olunmamışdan öncə çox eşitmişəm. Belə qətliam tarixdə görünməyib. İslam dini dünyanın müxtəlif ölkələrinə yayılarkən müsəlmanlar heç kimə zor tətbiq etməyiblər. Yalnız onlara hücum olarkən savaşmağa məcbur olublar. Lakin din xadimlərinə, qocalara, qadınlara, uşaqlara, xəstələrə, savaşda iştirak etməyənlərə heç vaxt silah qaldırmayıblar. Amma ermənilər dinc əhaliyə qarşı amansızlıq ediblər. Xocalıda qocaların, qadınların, uşaqların vəhşicəsinə qətlə yetirilməsi, hamilə qadınların xüsusi amansızlıqla öldürülməsi, dinc sakinlərin əsir götürülməsi insanlığa yaraşmayan hadisədir. Bunu bütün dünya bilməli və işğalçıya qarşı fikrini bildirməlidi".

Sadıq Əraslan Azərbaycan torpaqlarının tezliklə işğaldan azad ediləcəyinə inandığını bildirib: "Qardaş Azərbaycan xalqı öz əzəli torpaqlarını düşməndən təmizləmək iqtidarındadı. Dövlət rəhbərləri, sadə insanlar bu məsələdə yekdildirlər və haqq işində qalib gələcəklərinə inanırlar. Bu inamı görəndən sonra bir daha əmin oldum ki, Qarabağın işğaldan azad ediləcəyi gün uzaqda deyil".

Anım mərasiminin təşkilatçısı Seyid Camal Əzimbəyli Xocalıda törədilən vəhşiliyin insanlığa yaraşmayan hərəkət kimi qiymətləndirib: "Xocalıda baş verən amansızlığın dünyada analoqu yoxdu. Uca Rəbbimiz bu cinayətə qol qoyanları cəzasına çatdıracaq. Haqqın qarşısında zülm heç vaxt duruş gətirə bilməyib. Bu dəfə də belə olacaq. Qarabağda şəhid olan insanların ruhu bizi düşmən üzərində qələbəyə səsləyir. Azərbaycan dövləti, xalqı öz qüdrətini, torpağını düşməndən azad etmək əzmini göstərəcək. İşğalçı Ermənistan da bunu yaxşı bilir. Bu gün minlərlə insan Ali Baş komandanın çağırışını gözləyir".

Qarabağ qazisi Etimad Əsədov, Mədəniyyət və İncəsənət Universitetinin türkiyəli tələbəsi Müsavat Qaradaş öz çıxışlarında erməni vəhşiliyini pisləyib və Qarabağın işğaldan azad olunması üçün döyüşə getməyə hazır olduqlarını bildiriblər. Məktəbli Mirrəsul Əzimbəyli yazdığı "Dərdimiz Xocalı" şeirini oxuyub.

Sonda Xocalıda şəhid olanların ruhuna ehsan verilib.

Turan İSMAYILZADƏ

Ədalət.- 2011.- 1 mart.- S. 5.