BABA DAĞIN ZİRVƏSİNDƏN BAXANDA

... Bu şəhər nəhəng bir cama bənzər

Biz Bakı-Qazax magistralından Qaraməryəm-İsmayıllı yoluna burularkən hava ilıq və günəşli idi. Heç 20 km. məsafə qət etməmişdik ki, sanki yaz ağzından əsl qış nağılına düşdük. Hər tərəf bəyaz örtükdə, üstəlik yenə qar başlamışdı. İndi gör bir az da yuxarılarda - Qalacıqda, Buynuzda, Basqalda, Lahıcdag nə gəstgahdı. Belə qar, qışın son akkordları qorxulu deyil. Əksinə, bar-bərəkətdi deyirlər.

Vətənimin hər qarış torpağı əzizdir, müqəddəsdir. İsmayıllının da adı, dadı bir başqadır. Burada qədimliklə müasirlik bir-birinə elə qovuşub ki, az qala keçmiş xatirələrini də düz-əməlli sıralaya bilmirsən. Dağlar, meşələr, qayalar, göllər, yaylaqlar qədim və əzəmətli. Nəhəng bir cam kimi şəfəq saçan, gözəllikdən aşıb-daşan İsmayıllı şəhəri isə modern görkəmdə, urbanik inkişafda. Bütün bunlar, bütün bu gözəlliklər, şəhər səliqəsi, düzəni son dövrlərin töhfələridir. Dostum Rahib Seyidovun kabinetində söhbət edərkən bu gerçəkliyin qürurunu bölüşürük. Elə xatirələrimiz də eyni səmtlərdən qanadlanır.

Rəhbərlik və camaat əlbir olanda

Mən layihə ilə əlaqədar rayon icra hakimiyyətində olmalıyam. Rəhbərliklə görüş vaxtına qədər qarşı meydanda gəzişib narın yağan qarın dadını çıxarıram. Arada müvafiq sandığım sakinlərlə söhbətə cəhd edirəm. Hərdən alınır. Eşitdiklərim bir az qəribə görünsə də, olduqca xoş gəlir mənə. Şikayətlənən yoxdur. Varsa da, mənə rast gələnlər olana şükr edirlər. Həm də rayonlarının son illərdəki inkişafından qürur duyduqlarını dilə gətirirlər. Ölkə rəhbərliyinə, Prezident İlham Əliyev cənablarına minnətdar olduqlarını bildirirlər.

Başqa məqamlar da var. Rayon icra hakimiyyətinin başçısı Nizami Ələkbərovun camaatla daha yaxın olması, ona müraciət edən sakinləri hər dəfə eyni səmimiyyətlə dinləyib lazımi tədbirlər üçün göstərişlər verməsi, məmurlar komandasını müntəzəmliklə rayona, vətəndaşlara xidmətə səfərbər etməsi həmişə rəğbətlə qarşılanır. Xüsusilə başçının camaatla əl-ələ verib rayonun inkişafı üçün həyata keçirdiyi tədbirlər, bu tədbirlərin uğurlu nəticələri.

Dağlar, meşələr, qalalar

Böyük Qafqazın cənub yamacında yerləşən İsmayıllı rayonunun ərazisi 2074 kv-dir. Rayonda mərkəz İsmayıllı şəhərindən başqa Lahıc və Qubaxəlilli qəsəbələri, 108 kənd var. Əhalisi 81.000 nəfərdir. Girdiman və Göyçay çayları sanki sağ və sol sərhədlərini təşkil edir. Mineral bulaqları zəngin olan Qalacıq və Diyallı kəndlərində, eləcə Aşıqbayramlı gölündə, digər xırda çay və göllərdə şirin su ehtiyatları boldur. Rayonun meşə ərazisi 66.799 hektardır. Topçu və Talıstan meşələri daha qədim və zəngindir. Faunasına da bir çox qiymətli heyvan və quş növləri daxildir. Rayonda ekologiyanın qorunmasına xüsusi diqqətlə yanaşılır, nəzarət güclüdür.

Rayon ərazisində bir çox qədim dövr abidələrinin qalıqları qorunur. Bunlardan Qız qalası, Cavanşir qalası, Mustafaxan qalası, Niyal qalası və s. daha çox tanınan abidələrdəndir. Uzun illərdir ziyarətgaha çevrilmiş məşhur Baba dağı da İsmayıllı rayonunun ərazisindədir və zirvənin hündürlüyü 3623 metrdir.

Sosial iqtisadi inkişafın yüksələn xətti

Rayon haqqında bu qısa məlumatlardan sonra keçid edək Dövlət Proqramının icrası ilə əlaqədar görülən işlərə, əldə olunan nəticələrə. 2010-cu ildə rayonda ümumi məhsul buraxılışı 106296.3 min manat, əvvəlki ildən 871.3 min manat çox olmuşdur. 49108.1 min manatlıq kənd təsərrüfatı məhsulları istehsal edilmişdir.

Əsas kapitala investisiyalar 33262.5 min manat olmuşdur. İl ərzində 8260.2 min manatlıq əsas fondlar istifadəyə verilmişdir. Rayon üzrə pərakəndə əmtəə dövriyyəsi 62062 min manat olmuşdur.

2010-cu ildə rayon Əhalinin Sosial Müdafiəsi Mərkəzində, Dövlət Sosial Müdafiə Fondunda yeniliklər baş vermiş, yaxşı nəticələr qazanılmışdır. Poçt və telekommunikasiya, digər ənənəvi xidmətlər sahəsində irəliləyişlər diqqəti cəlb etmişdir. Əhalinin su, elektrik enerjisi və qaz yanacağı ilə təmin olunması istiqamətində mühüm tədbirlər həyata keçirilmişdir. Son illər rayonun 28 kəndinə qaz xətti çəkilmiş, sakinlərin məişət şəraiti yaxşılaşmışdır.

Prezident İlham Əliyevin 2009-cu il oktyabr ayının 29-da İsmayıllıya səfəri zamanı verdiyi tapşırıq, tövsiyyə və məsləhətlər 2010-cu il üçün rayon rəhbərliyinin fəaliyyət proqramı olmuşdur. Prezidentin sərəncamı ilə İvanovka zonasına içməli su çəkmək üçün ayrılmış 3,5 milyon manat vəsaitə uyğun olaraq layihə hazırlanmış və işə başlanılmışdır. 2010-cu ildə su kəmərinin çəkilişində əsas işlər başa çatdırılmışdır.

Rayon icra hakimiyyəti yeni infrastruktur layihələrinin icrasında yalnız büdcədə nəzərdə tutulmuş vəsaitlə kifayətlənmir, qeyri-hökumət təşkilatları, beynəlxalq maliyyə qurumları, iş adamları ilə işgüzar əlaqələr yaradır. Bunun nəticəsi olaraq mühüm tədbirlər həyata keçirilmişdir.

İsmayıllı - turizm səltənəti

Azərbaycan Respublikasının Prezidenti İlham Əliyev Nazirlər Kabinetinin 2010-cu ilin yekunlarına həsr olunmuş iclasında 2011-ci ili "Turizm ili" elan etməsi ölkənin turizm mərkəzlərindən olan İsmayıllı rayonu üçün xüsusi əhəmiyyət daşıyır. Bununla əlaqədar təbii ki, rayonda genişmiqyaslı işlər görüləcək. Bu il istifadəyə veriləcək 202 yerlik müasir otel kompleksdə həmin tədbirlərin tərkib hissəsidir. Şəhərin Nəriman Nərimanov, Ələkbərzadə və Ərəstun Mahmudov küçələrində, "Xatirə kompleksi" əhatəsində yeni işıqlandırma sisteminin quraşdırılması, Qalacıq, Sumağallı, İstisu və Çayqovuşan kəndlərində enerji şəbəkəsinin yenidən qurulması və sim-kart sisteminə keçilməsi ötən ilin uğurları sırasındadır.

Özəl sektorun, sahibkarlıq fəaliyyətinin inkişafı Prezident İlham Əliyevin müəyyən etdiyi iqtisadi siyasətin əsas istiqamətlərindəndir. Buna istinad edən rayon rəhbərliyi sahibkarlığın inkişafı üçün münbit şərait yaratmışdır. Turizm və istirahət mərkəzlərinin tikintisində və onların fəaliyyətinin təşkilində bu hal özünü daha qabarıq göstərir.

Rayonun təhsil, səhiyyə və mədəniyyət sahələrində də uğurlar əldə olunur. 2010-cu ildə qazanılan nəticələr sevinc doğurur. Xüsusilə təhsil sahəsindəki uğurlar bir ənənə şəklini almaqdadır.

Azərbaycan Respublikası Mədəniyyət və Turizm Nazirliyi tərəfindən "Sənətkarlar paytaxtı" elan olunmuş İsmayıllı rayonunda bu il çoxsaylı tədbirlər keçiriləcəkdir. Burada təbii ki, Lahıc və Basqal nümunələri yenə də ümumi təntənəni müəyyənləşdirəcəkdir.

Məzahir ƏHMƏDOĞLU

Ədalət.- 2011.- 1 mart.- S. 7.