DAK Türkiyədə "Xocalı həftəsi" keçirdi

Dünya Azərbaycanlıları Konqresinin (DAK) təşəbbüsü ilə Türkiyədə "Xocalı həftəsi" keçirilib. DAK mətbuat xidmətindən APA-ya verilən məlumata görə, DAK rəhbərliyi səfər çərçivəsində Ankarada Türkiyə Böyük Millət Məclisində (TBMM) siyasi partiyalarının təmsilçiləri ilə görüşüblər. Görüşdə Türkiyə-Azərbaycan münasibətləri, Dağlıq Qarabağ münaqişəsi, qondarma erməni soyqırımı və digər məsələlər müzakirə edilib.

Bundan əlavə, Azərbaycan Milli Məclisinin PKK problemini, Türkiyə Böyük Millət Məclisinin isə Xocalı faciəsini soyqırımı aktı kimi qəbul etməsi, o cümlədən Azərbaycan-Türkiyə diasporunun birgə hərəkət etməsinin zəruriliyi müzakirə obyekti olub. Səfər zamanı DAK rəhbərliyi Milliyyətçi Hərəkat Partiyasının (MHP) sədri Dövlət Baxçalı ilə də görüşüb. Görüşdə türk dünyasında, Azərbaycanda, Türkiyədə və özəlliklə də Güney Azərbaycanda baş verən proseslər əsas müzakirə mövzusu olub. D.Baxçalı Türkiyədə baş verən proseslər, MHP-nin Azərbaycan Respublikası və Güney Azərbaycan siyasəti barədə ətraflı məlumat verib. Bundan əlavə, həmin gün Ankara şəhər Etimesgut bələdiyyəsi və Azərbaycanın Türkiyədəki səfirliyinin birgə təşkilatçılığı ilə Xocalı soyqırımı barədə sərgi keçirilib. Etimesgut bələdiyyəsinin sədri Ənvər Dəmirəl və Etimesgut kaymakamı Rəcəb Ərkılıç çıxışlarında Xocalı soyqırımını bəşəriyyətin ən böyük faciəsi adlandırıblar.

Sonda Xocalı soyqırımı haqda film nümayiş etdirilib və faciə qurbanlarının ruhuna ehsan verilib. Eyni zamanda DAK nümayəndə heyətinin bir qrup üzvü MHP-nin qurucusu, başbuğ Alparslan Türkeşin Ankaradakı məzarını ziyarət ediblər. DAK rəhbərliyi Cümhuriyyət Xalq Partiyasının sədri Kamal Kılıçdaroğlu ilə görüşüb. Görüşdə Azərbaycan-Türkiyə münasibətləri, Güney Azərbaycandakı son durum və İranda Azərbaycan türklərinə qarşı aparılan assimilyasiya siyasəti, soydaşlarımızın milli azadlıq mücadiləsi K.Kılıçdaroğlunun diqqətinə çatdırıb. K.Kılıçdaroğlu isə öz növbəsində bütün qaldırılan məsələlərə öz müsbət yanaşmasını açıqlayaraq, Güney Azərbaycan məsələsində hamının diqqətli olmasının vacibliyini söyləyib. Xocalı faciəsinə də münasibət bildirən CHP sədri ermənilərin törətdikləri bu soyqırımı pisləyərək, Qarabağın əzəli Azərbaycan torpağı olduğunu daha bəyan edib.

Ədalət.- 2011.- 2 mart.- S. 5.