Valideynlər uşaqlar haqqında nəyi bilməlidir

(əvvəli ötən saylarımızda)

20 aprel -21 may arasında doğulan uşaqların xarakteri

Bu uşaqlar BUĞAlardır. QOÇlarda olduğu kimi, BUĞAlara da diqqətlə və ehtiyatla yanaşmaq lazımdır, burada yumşaq rəftar gərəkdir, kobudluqdan, döyməkdən, hədə-qorxu və zor tətbiq etməkdən qaçmaq lazımdır. BUĞAlar tez qızır , hirslidir, tez özündən çıxır, tərs, inadcıl və qəzəblidir. Onları bir qayda olaraq təbdən çıxarmaq çətindir, amma qeyzləndimi, uzun müddət sakitləşə bilmir. Yaşıdlarına qarşı səmimi və vicdanlıdır, dostluqda və sevgidə vəfalı və sadiqdir.

Təhsilə az meyl göstərirlər. Burada valideynlərin səyi əbəsdir, mütləq mütəxəssis tərbiyəçi və müəllimin köməyi gərəkdir, müəyyən psixoloji yanaşma məharəti tələb olunur. Bu onunla izah olunur ki, BUĞAlar realist olur, təcrübəyə üstünlük verirlər, həyata söykənməyən nəzəriyyələri qəbul eləmirlər. Buna görə də onlara mənən təsir etmək çox çətin olur. Mənəmlik, xudbinlik, qısqanclıq və inamsızlıq, güclü vasvasalıq həyatda onlara mane olur. Onlar gah həddən artıq adamayovuşmaz, inadcıl, gah da hədsiz çəkingən və utancaq olurlar. Onların uşaq istəkləri, inadkar və israrlı hərəkətləri erkən yaşlardan özünü göstərir, bu şıltaqlıqlar sonra var-dövlətə, dəbdəbə və zənginliyə aludəçilik gətirir. Onlar bir tərəfdən maddi sərvətlərə yiyələnsələr də digər tərəfdən çox bədxərc və israfçı olurlar.

BUĞA əsl rəssamdır, artistdir. Yetkinlik üçün ona yalnız həyat təcrübəsi lazımdır, buna isə onun səbri çatar, o gözləməyi bacarır. BUĞA təbiətən melanxolikdir, tez-tez özünə qapılır, ona görə də ciddi və fikirlidir, düşünüb-daşınır, digər tərəfdən isə o, şən, diqqətcil və həssas ola bilir.

Onlarla işbirliyinə girən adam bilməlidir ki, onları aldatmaq olmaz. Sizin sözünüzlə əməliniz bir olmalıdır. BUĞAlar belə şeyləri sanki bələkdən bilirlər. Bunu nəzərə almayan valideynlər onların gözündən düşə bilər. Məlum olmuşdur ki, belə uşaqlar erkən yaşlardan özlərinə pul yığmaq istəyir, müəyyən məqsədlə qənaət və ehtiyat yaratmaq fikrinə düşürlər. İnamla demək olar ki, bütün BUĞAlar pul və maddi dəyərlərlə bağlı işlərdə müvəffəqiyyət qazanırlar. Onların daxilində sanki radar qurğusu var, pul və yaxşı qazanc olan yeri tez görürlər. Hər halda onların valideynləri arxayın ola bilər, qocalıqda pula görə korluq çəkməzlər. Belə uşaqların qəlbində yaxın və doğmalara sədaqət yuva salır. Bəzən buraxdıqları yüngül səhvlərə baxmayaraq, onlar sevdiklərinə xəyanət etmirlər.

Qız-BUĞAlar erkən yaşda da olduqca cazibədar və gözəl olurlar. Amma Allah eləməsin, onların xətrinə dəyəsən, yaxud hövsələdən çıxarasan, bu zaman onların qəzəbi tüğyan edir, belə hallarda onlar təhlükəli ola bilirlər.

BUĞAlar inam və dünyagörüşlərini hələm-hələm dəyişmir. Öz fikirlərini isə bacarıqla, ləyaqətlə, bəzən də qəzəblə müdafiə edirlər.

BUĞAlarda öz yaşayışını, gələcəyini və qocalığını təmin etmək zərurəti illər keçdikcə artıb möhkəmlənir. Məqsədə çatmaq üçün onlar ən sadə, lakin sınanmış vasitələrdən istifadə edirlər. Başa düşmədiklərini sadəcə rədd edirlər. Onlar üçün özlərinin fikri müstəsna dərəcədə doğrudur, onlara özünəinam, səbat və dönməzlik xasdır.

Onların ömür yolunu erkən yaşdan müəyyən etmək olar, bu yolun üstündə maddi dəyərlərə, ictimai fəaliyyətə, yaxud ədəbiyyat və incəsənətə, elm və tətbiqi sənətə meyl və maraq durur. Gələcək peşə, sənət və hobbilərini onlar bu sahələrdə seçirlər. BUĞAlarla qarşılaşanda nəzərə almaq lazımdır ki, onlar müsahibinin niyyətini o dəqiqə başa düşür, sən fikrini deyib qurtarmamış onların qərarı artıq hazır olur. Yadda saxlayın ki, onlar çox həssas olur, yaltaqlıq və tərif onların xüsusilə xoşuna gəlir. Onlar səmimi və vicdanlı, işgüzar münasibətlərdə etibarlı tərəfdaş olurlar.

Ən zərif yerləri - boyun, boğaz, ağız, udlaq, xirtdək, qalxanabənzər və badamcıq vəziləri, alın boşluqları, eşitmə orqanları və limfalardır. Geniş yayılmış soyuqdəymə, kataral, xüsusilə, yuxarı tənəffüs yollarının iltihabından xəstələnirlər. Cinsiyyət orqanları, uşaqlıq yolu xəstəliklərindən, şəkər, qastrit, ponos və karlıqdan əziyyət çəkirlər.

Belə uşaqlara 9-11 yaş arasında xüsusi diqqət vermək lazımdır.

21 may-21 iyun arasında doğulan uşaqların xarakteri

Bu uşaqlar ƏKİZLƏRdir. ƏKİZLƏR olan yerdə həyat qaynayır, onlar hər şeyə maraq göstərir, civə kimi həmişə hərəkətdə olur, aləmi bir-birinə qarışdırırlar. Onları sakitləşdirmək, barışdırmaq olmur. Onlar bir dəqiqə belə sakit otura bilmir, nə ata-analarına, nə də ətrafdakılara rahatlıq vermirlər.

ƏKİZLƏR təbiətən ikili xarakterdədir. Onlar bir tərəfdən həqiqi, praktik və konkret olana, digər tərəfdən, ideya və əqlin gücünə inanırlar. Onlar yaxşı müşahidəçidir, hərəkətlərində fəal, dinamik, işində çevik, və diribaş olur, ona görə deyirlər ki, onların qızıl əlləri var. Onların ağlı iti və genişdir, lakin hədsiz çox şeyə maraq göstərirlər, bu xasiyyət sonrakı illərdə onların əsəb sisteminə və psixikasına mənfi təsir edir. Onlar tez-tez çıxılmaz vəziyyətlərə düşür, başladıqları işi çox vaxt axıra çatdırmırlar.

Təhsil və təlimə, iş və ünsiyyətə səthi münasibət, hisslərindəki ötərilik, ağılın emosiyalara üstün gələ bilməməsi onlara çox mane olur. ƏKİZLƏRə zəngin fantaziya, aydın və canlı təsəvvürlər, kəskin ağıl və hazırcavablıq, ixtiraçılıq qabiliyyəti xasdır. Müsahib kimi onların tayı yoxdur. Bir qayda olaraq onların iradəsi zəifdir, çox vaxt işlərini axıra çatdırmırlar, maneələr də ki nə qədər istəsən var.

İxtilaf və ziddiyyətlərdən, daxili dünyası ilə əsl həqiqət arasında gedən mübarizədən irəli gələn sarsıntılar həmişə ƏKİZLƏRə əzab verir. Bu cür uşaqlar gözəl yalan danışırlar. Bilə-bilə yox, sadəcə ona görə ki, onların beyni sonsuz arzularla, fantaziyalarla doludur. Oxumaq onlar üçün asandır. Lakin tez və asanlıqla mənimsədikləri biliyi asanlıqla və sürətlə də unudurlar.

Təhsil və sənət seçimində ƏKİZLƏRə təsir etmək çalışmaq faydasızdır, çünki bir qayda olaraq arzu və niyyətlərini dəfələrlə dəyişirlər.

Heç bir rejim və qaydaya tabe olmamaq üçün ƏKİZLƏR elə bir sənət seçir ki, orada sərbəst olsunlar, onları məcbur etməsinlər, işlərinə məhdudiyyət qoyulmasın. Onların gələcək fəaliyyət sahələri bunlardır: elm və texnika, ədəbiyyat və incəsənət, jurnalistika və nəşriyyat işləri, poeziya və musiqi, balet və idman, tətbiqi sənət və dizaynerlik.

Texnikada ƏKİZLƏRin həvəs göstərdiyi sahələr- atom və kosmik texnikası, aviasiya və gəmiçilik, rabitə, radio-televiziya, nəqliyyat və s. Onlar gördükləri işlə peşəkarcasına məşğul olurlar.

Onlarla ünsiyyət yaratmaq üçün yumşaq rəftar və yumor gərəkdir, onlara sərbəstlik verilməlidir.

Orqanizmlərinin ən zəif yeri- əlləri və qollarıdır. Tənəffüs orqanları da xəstəliyə həssasdır. Xəstəlikləri nəfəs yollarının iltihabı, bronxit və plevrit, əsəb sistemi ilə bağlıdır.

Digər xəstəlikləri: nevrasteniya və nevralqiya, nevroz və psixoz. Onlara müxtəlif maniyalar, fobiya (daimi xof), sayıqlama, epilepsiya, kleptomaniya (oğurluğa meyl), nitqin və yaddaşın xarab olması da xasdır.

(ardı var)

Ədalət.- 2011.- 5 mart.- S. 14.