"HƏLƏ NEÇƏ DƏFƏ
DOĞULACAĞAM"
Qəlbimdə lay-lay, bəlkə
də qalın-qalın kitablara sığmayan
qövsü-qüzeh xatirələr uyuyur. Çoxu da
könül dünyamda əzizləyə-əzizləyə
yaşatdığım, həmişə hörmətini uca
tutduğum, ehtiram bəslədiyim söz-sənət
adamlarından səs-soraq verir. Bu sənətkarların
yubileyləri, anım günləri gələndə
yaddaşımı silkələyir, uzaq-yaxın illərin təəssüratlarını,
epizod və əhvalatlarını qələmə alır, qəzet
və jurnallarda dərc etdirirəm. İki il qabaq bu xatirələrin
bir xeylisi "Yada düşdü" kitabımda dərc
edildi və ürəyimi xoş duyğularla doldurdu. Bu da məni
çox sevindirdi, qanadlandırdı. Yaşımın 75-ə
çathaçat ərəfəsində
"Yaddaşımda yaşayanlar" adlı iri həcmli
kitabımın üzərində işimi başa vurdum.
Topluda görkəmli şair və
yazıçılarımızdan Süleyman Rəhimov, Əli
Vəliyev, Süleyman Rüstəm, Səməd Vurğun,
Mehdi Hüseyn, Mir Cəlal, Rəsul Rza, Ənvər Məmmədxanlı,
İlyas Əfəndiyev, İsmayıl Şıxlı,
Hüseyn Arif, Nəbi Xəzri, Bəxtiyar Vahabzadə, Əli
Kərim, Məmməd Araz, Tofiq Bayram, Vilayət Rüstəmzadə,g
bir sözlə 32 xatirə baş-başa verib. Bu, 75 illiyim ərəfəsində
böyük sənətkarlarımızın ölməz
ruhuna ehtiramdolu salamlarımdır. Təzə kitabımdan bir
xatirə yarpağını hörmətli oxuculara təqdim
edirəm.
Müəllifdən
Qələm dostum
Paşa Əlioğlu səmimi avtoqraf yazılmış əl
boyda, ağumsov bir kitabçanı mənə uzadaraq,
özünəməxsus bir utancaqlıqla:
- Avtoreferatımdır,
- dedi. - Müdafiəyə hazırlaşıram, hökmən
sizə xəbər eləyəcəyəm
- Bəri başdan təbrik
edirəm, - deyə onun əlini sıxdım.
O, razılıqla başını
tərpətdi. Birdən özüm də bilmədən:
- Kaş, Əli bu
günü görəydi, sənin müdafiəndə
iştirak edəydi, - dedim və tezcə də
peşmanladım.
Paşa dinmədi, bəlkə
də dinə bilmədi. İkimiz də susduq, gözlərimiz
yol çəkdi
Xəyalım
çırpındı, düşüncələrim pərən-pərən
oldu.
Xalq şairi Rəsul
Rzanın: "Əli, mənim qardaşım yox idi. Sən mənə
qardaş əvəziydin", - deyən, hıçqıran
ağlar səsi, göynəkli sözləri hər dəfə
yadıma düşəndə gözlərim yaşarır, qəlbim
qan ağlayır.
...Bakının Vaqif
küçəsində (indiki H.Seyidbəyli), Yazıçılar
evinin çox da böyük olmayan həyətində unudulmaz
şairimiz Əli Kərimlə vida mərasimində gözəl
sənətkarımız, Azərbaycanın xalq artisti Yusif Vəliyevin
qəhərli səsi ürəkləri
yandırıb-yaxır - "şeirlə musiqi bir
ucalırdı". Şairin dünyaya, insanlara,
övladlarına son sözü - "Vəsiyyət"
şeiri o bomboz, yaz gününün qəlbində
tufanlı, tüstülü bir ocaq qalamışdı. O
vaxtdan çox illər keçib. O ayrılıq, həsrət
tonqalı ürəyimizin başında yanır, hey
yanır...
Gecələr
yazmaq,
oxumaq eşqi gələndə
Paşanın,
Azərin,
Orxanın,
asın təbəssümümü
divar lampası kimi
başı üstdən
üç canımın,
üç
igid oğlanımın
Paşamın,
Azərimin,
Orxanımın.
Əli Kərimin
ömründən üç pöhrə
ayrılmışdı - üç çinar pöhrəsi.
Övladlarının anası, ömür-gün
yoldaşı Elza xanım onun adına layiq üç
oğul böyüdüb - Paşa, Azər, Orxan.
Üçü də istedaddır, üçü də ali
məktəb bitirib - Bakıda, Moskvada, Kiyevdə.
Övladları Əli Kərimin ruhunu sevindirə-sevindirə
ömür kitablarına atanın çin olan
arzularını yaza-yaza sabahların sorağı ilə
yaşayırlar.
Torpağın
qulağı kardır, deyirlər. Ancaq torpaq altında da
şairlər sevinir, qəm çəkir, dərdlənirlər.
Dəli bir inam deyir ki, dünyaya göz açan nəvələrinin
müjdəsi, muştuluğu günəş şəfəqləri
ilə birgə onun məzarına süzülüb axıb,
"qulağına" çatıb, gənc babanı
sevindirib. Vaxt necə də amansızdır! Elə bil
şimşəyə dönüb illər - çaxıb
gedir, axıb gedir. Göz açıb yumunca il üstünə
il gəlir, yaş üstünə yaş. Heç inana
bilmirsən ki, xalqımızın sənətkar oğlu,
böyük şairi Əli Kərim 60 yaşı
"adladı"...
Onun tay-tuşları,
yaşıdları altmışa çatanda öz yubileylərini
- doğum bayramlarını ağ saçlarla
qarşıladılar. Əli Kərim isə 38 yaşında
bizdən necə ayrılmışdısa,
yaddaşımızda eləcə qalıb - gur saçlı,
üz-gözündən abır-həya, həyat eşqi
yağan, mərd-mərdanə bir kişi kimi. O, beləcə
ömür edir, beləcə yaşayır...
Öz-özümdən
soruşuram: "Əli Kərimi ilk dəfə nə vaxt
görmüşəm?". Xəyalımda toran
sökülür, 1955-ci ilin qızmar avqust günlərinə
qayıdıram. Universitetə qəbul imtahanları verdiyim
çağlara...
Bir gün
qaynayıb-daşan qələbəliyin içində həyəcan
və sevinc dolu bir səs eşidildi: "Uşaqlar, bir
baxın, Əli Kərim gəlir!"
İzdiham aralandı.
Maraq dolu baxışlar altında qısaqol yay köynəyi
geyinmiş, orta boylu, ağır yerişli bir gənc ona
dikilmiş nəzərlərin leysanında "çimə-çimə",
sıxıla-sıxıla içəri həyətdən
keçib pillələrə sarı getdi. Biz gələcək
filoloqların nəzərində o, yer üzünün ən
xoşbəxt adamı idi. Hər birimiz necə də onun
yerində olmaq istəyirdik!..
Əli Kərim sənət
aləmində təzəcə pərvazlanır,
özünün ilk "qızıl qönçələr"ini
toxuyurdu. Bir il sonra o, Moskvada M.Qorki adına Ədəbiyyat
İnstitutunda təhsilini başa vurub Bakıya qayıtdı.
Və günlərin birində bizim filologiya fakültəsinin
tələbələrinə qonaq gəldi. Onun "Qaytar ana
borcunu" və "İki sevgi" kimi manifest şeirlərini
ilk dəfə o görüşdə eşitdim. Həmin
gündən Əli Kərim bir sənətkar kimi qəlbimə
köçdü, qəlbimdə qaldı.
Mən anamı lap kiçik olanda itirmişdim. Ömrüm boyu
içimdə bir həsrət yanır, həmişə də məni yandırırdı.
Yadımda həmin o munis
görüşdən "Ana" şeirinin son misraları,
dərdli, sitəmli, ürəkləri bir-birinə
qoşan, bağlayan üsyankar misraları qalıb. Hərdən məni heyrət
bürüyür. Deyirəm,
halal olsun şair ürəyinə,
şair qələminə!
Özüm də bilmədən
misralar sinəmdə axır, qulaqlarımda cingildəyir.
Bir gözəl,
bir
sevimli oğul böyütdü ana,
Ürəyində ağlayıb, gülmək
öyrətdi ona.
Oğul! Nədir etdiyin bəs
bu haq-say üçün?
Qaytar onun ömrünə
neçə gecə, neçə gün!
Qaytar onun saçının
qaralığını geri.
Qaytar o dilindəki
şirin-şirin sözləri!
O sözü, o söhbəti,
gülüşü anan verib,
Ana dodaqlarından
bala dodaqlarına.
İndi ondan gen gəzən oğul,
Ayaqlarına
Yerişi anan verib.
Qaytarsan o sözləri, sözsüz
bir lal olarsan,
Qaytarsan o yerişi,
yerindəcə qalarsan.
Qaytarsan o gülüşü
hırıldamazsan daha,
Qaytar, qaytar onları,
qaytar, qoyma sabaha!
Sən ki dərd verdin, oğul,
sənə gülüş verənə,
Oğul demərəm sənə!
Deyirəm ki, o boyu,
buxunu qaytar geri!
Deyirəm ki, varını,
yoxunu qaytar geri!
Qaytar onun borcunu,
Gülüşünü, adını,
sözünü qaytar geri!
Qaytar onun
borcunu,
O borc sənin özünsən,
özünü qaytar geri!
Əli Kərim ədəbiyyatımızda
yeni bir səs idi - gur, coşqun bir səs. Yüz səsin, min
səsin içindən seçilirdi, sevilirdi bu səs!
O, niyə belə
sevilirdi? Niyə böyük sənətkarlar belə ona qibtə
edirdilər? Mənə elə gəlir ki, Əli Kərimin
şeirləri də özü kimi səmimi idi, saf idi,
büllur idi. Onun şeirlərinə bircə yad söz, yad
misra sızmamışdı. Bu şeirlər sirli-sehrli,
insanlara, dünyaya sevgi-məhəbbət bağışlamaq
istəyən xeyirxah, günəşli bir ürəkdən,
duru çeşmədən damcılanıb gəlirdi...
Əli Kərim barədə
düşünərkən xəyalıma fil səbirli, aza
qane olan, gecə-gündüz başını
aşağı salıb, heç kəsdən heç nə
ummayan gözü-könlü tox Zəhmətkeş sənətkar
gəlir, İnsan gəlir. O, böyük səbrlə, təmkinlə
əlində tişə-qələm içəridən
yana-yana qranitdən şeir-heykəllər, poema-heykəllər,
roman-heykəllər yonurdu. Əli Kərim şair kimi də,
insan kimi də, şəxsiyyət kimi də heç kəslə
müqayisəyə gəlməzdi. O, təvazökarlığın
etalonu idi. Özü də yaxşı bilirdi ki, böyük
istedaddır. Lakin elə bil bundan utanır,
sıxılırdı.. Bu sözü dilinə gətirməyə
ehtiyat eləyirdi. Əli Kərim elə bil öz taleyini
apaydın görürdü; görürdü ki, bu
üzüboz dünyada onun ömür, həyat, sənət
cığırı hansısa müdhiş bir uçuruma, sərt,
keçilməz qayaya dirənib duracaq, ətrafını
çəpərləyən laqeydlik, biganəlik, ürəksizlik
əlbir, dilbir olub onu sıxacaq... və bu sıxıntı
içində nəfəsi təngiyəcəkdir.
Əli Kərim içəridən
alışır, içəridən yanır, közərirdi,
qəlbinin qəm nəğməsini, nisgilini haraya çevirəndə
də içəridən qışqırırdı.
Hamımızın demək istədiyini, lakin deyə bilmədiyini
Əli Kərim necə də gözəl deyirdi, qüdrətlə
deyirdi:
Sən mənim qədrimi
biləsən deyə,
Bu cavan yaşımda
ölümmü indi?!
O, çox
məğrur adam idi. İnsan ləyaqətini hər şeydən uca tutur, xəyanətin, rəzalətin yanında ölümü xöşbəxtlik
sanır, onu ucaldırdı. Əli
Kərim qələmində
söz bütün pisliklərə tuşlanmış
sərrast gülləyə
dönürdü:
- Ölümdən - xəyanət pis,
Ölümdən - rəzalət pis,
Bəzən necə gözəlsən,
Ölüm, sən ey səadət!
Onun adama sakit gələn,
ağır ləngərli çaya bənzəyən
misraları arasında göy guruldayır, ildırım
çaxır, leysan yağır, qövsi-quzeh göz
qamaşdırır! Əli Kərimin sənət palitrası
qədərsiz, bənzərsiz rənglərlə,
möcüzəli səslərlə, qammalarla nə qədər
zəngin idi! Əli Kərim haradan, hansı bağçadan dərirdi
bu qədər təzə-tər deyimləri, qönçə
qafiyələri, çiçək misraları?!
O, cavan yaşında
oxucu ilə müdrik bir filosof kimi danışır, onu
düşüncələr seylabından, fikirlər dənizindən
keçirir, adiliyin əlindən alırdı.
Əli Kərimin
şeirləri də onun şəxsiyyəti kimi
çoxqatlıdır. Adama çox sadə gələn
misralar bir də görürsən, elə mətləblər
deyir ki, səni heyrət bürüyür: "Bax, bu sənətdir,
sənət möcüzəsidir!" - deyirsən. Belədə
şairliyin əsl vergi olduğuna və bu vergidən Əli Kərimə
onun öz könül istəyincə, qəlbinin götürə
bildiyi qədər, ömrünün son mənzilinə belə
çatacağından qat-qat çox istedad payı, sənət
yanğısı verildiyinə qəlbən inanırsan. Əli
Kərim sənəti, Əli Kərim şəxsiyyəti hələ
o qədər də
açılıb-açıqlanmayıb. Biz onun
böyüklüyünü hələ indi yavaş-yavaş
duyur, dərk edirik - şairin nə zamansa qarşısında
heyrətə gəldiyi və bu heyrəti misralara
çevirdiyi bulaq kimi...
O, duruydu,
o, safdı,
Ən ülvi bir arzu tək.
Özü görünmürdü ki,
Dibindəki rəngarəng
Əfsanəni tez görək.
...1968-ci ilin yayı. O
vaxt mən radionun "Ədəbiyyat" redaksiyasında
işləyirdim. Bir dəfə iş otağımdan
çıxanda gördüm ki, Əli Kərim dəhlizdə
dayanıb siqaret çəkir. Yanında da arıq,
sarışın bir oğlan. Yaxınlaşıb salam verdim,
içəri dəvət elədim.
- Yox, - dedi, - tələsirəm.
- Görünür, kimi
isə gözləyirsiniz?
- Hə, "Ədəbiyyat"
redaksiyasının təzə müdirini gözləyirəm.
- Bəndeyi-həqir
qarşınızdadır, - deyə gülümsədim.
Əli Kərim də
ürəkdən güldü.
Dedim:
- Bu tərəflərə
çox seyrək gəlirsiniz, ona görə də heç kəsi
tanımırsınız.
- Vaxt yoxdur, - dedi. - Bir də
atalar deyiblər ki, çağırılan yerə ar eləmə,
çağırılmayan yeri dar eləmə.
Ondan xahiş etdim ki,
redaksiyamıza təzə şeir versin. O isə bildirdi ki,
şeir sonraya qalsın, dəhlizdə bizi gözləyən
oğlanın xahişini eləməyə gəlib.
Soruşdum:
- O, oğlan kimdir?
- Vaqif İbrahim,
istedadlı adamdır, gələcəyinə inanmasaydım,
nə qabağına düşüb, xahişini eləyər,
nə də sizdən minnət götürərdim. Borcumuzdur
belə istedadlara kömək eləmək, yoxsa yerimiz boş
qalar...
O, Vaqif İbrahimi, Vaqif
İbrahim də onu çox istəyirdi. Aralarında
ustad-şagird, müəllim-tələbə münasibəti
var idi. Əli Kərim dünyadan köçəndən sonra
Vaqif İbrahim öz ustadının adını əbədiləşdirmək
üçün özünü oda-közə vurdu. Onun təşəbbüsü
ilə Sumqayıtda Əli Kərim adına "Poeziya
klubu" yaradılmışdı. Bu klubun sədri xalq
şairi Rəsul Rza, məsul katibi isə Vaqif İbrahim idi.
...Ayrılanda bir daha təkid
elədim ki, mütləq bizə şeir gətirsin. O, bir
anlıq ayaq saxlayıb fikirli-fikirli üzümə baxdı.
Deyəsən, nəsə demək istəyirdi, ancaq ürək
eləmirdi.
Mən zarafata saldım:
- Əvvəlcə sizin
öz şeirlərinizi verək, sonra da bu cavan oğlanın.
- Təzə bir nəsr
əsəri yazmışam, - dedi. - "Ulduz" jurnalı
çap eləyir, mətbəədədir, uzağı bir
aya çıxar. İstəsəniz, radio üçün
bir parça seçmək olar.
Yadıma
düşdü ki, mən Universitetdə tələbə
olanda onun "Tələbələr" romanını
oxumuşdum. Bunu sevinclə yada saldım. Əli Kərim xoşhal
oldu.
O, dediyimiz kimi də elədi,
sabahı gün həmin əsərdən - "Mavi nəğmənin
sahilində" povestindən böyük bir parça gətirdi.
Povestin dili nə qədər
şairanə idi. Elə bil
məxsusi radio üçün,
unudulmaz diktorumuz Aydın Qaradağlının
səsi üçün
yazılmışdı. Parçanı iki verilişə
böldük. Mən
Əli Kərimdən
xahiş elədim ki, verilişin əvvəlində povest üzərində yaradıcılıq
işi barədə, arzuları, planları barədə söz desin. Razılaşmadı:
- Yol üstəyəm,
- dedi, - uşaqları istirahətə aparıram,
yır-yığış eləməliyik.
Mən də tənbəllik
eləmədim, qarşısına bir stəkan çay və
bir vərəq də ağ kağız qoydum.
O,
könülsüz-könülsüz üzümə
baxıb, cibindən qələm çıxardı...
Əli Kərimin həmin
çıxışı bəlkə də indi Azərbaycan
radiosunun "Qızıl fondu"nda saxlanılan yeganə səs
yadigarıdır.
Əli Kərim hey
deyirdi ki, "Mavi nəğmənin sahilində" povestinin
qonorarı çox çətin vaxtda, son qəpiyini xərclədiyi
bir gündə ona çatıb. Həmin gün elə bil mənə
dünyanı bağışladılar... Yessentukidə istirahətimizi
də yaxşılıqla başa vurduq, sonra evə
bazarlıq da elədik.
Bir neçə dəfə
axşam vaxtı evimizin yanındakı mağazada
rastlaşdıq. Sumqayıtdan gəlirdi. Orada, dövlət
teatrında onun "Ürək güzgüsü" pyesinin
məşqləri gedirdi. Təəssüf ki, teatrın məşqləri
yarımçıq qaldı. Yaxşı ki, illər keçəndən
sonra həmin əsər Gəncə Dövlət Dram
Teatrında uğurla tamaşaya qoyuldu. Nə yazıq ki,
müəllif bu tamaşanı görə bilmədi, bilməzdi
də. Çünki o, artıq əbədiyyətə
qovuşmuşdu.
O, çox kiçik bir
yaxşılığı, qayğını çox yüksək
qiymətləndirirdi. Elə hey deyirdi:
- Gərək, bir xudmani
oturaq səninlə. Dərdləşək, ürək
söhbəti eləyək.
Mən qaçdım, o
qovdu. Biz tikə kəsməsək də, o mənim
üçün çox əziz, doğmadan-doğma bir insan
idi: Mən Əli Kərimə Allah kimi baxırdım. O zaman
da mənim üçün əlçatmaz idi, indi də əlçatmazdır!
Yaradıcılığının
ilk çağlarında - 1954-cü ildə,
ölümündən 15 il qabaq qələmə
aldığı "Mənim həyatım" şeirində
o öz taleyini, gələcəyini çox uzaqgörənliklə,
peyğəmbərcəsinə yazıb. Bu şeir şair qəlbinin
səssiz harayı, həm də inamı-inancıdır:
Torpağın altında
çox darıxıram,
Torpağın üstündə
nə qədər şənəm.
Gah sağa göz qoyub,
sola baxıram,
Hər yerdə mən varam,
hər yerdə mənəm.
Deyib:
"Nə tez öldü, nə nakam öldü"
Bəzən gül qoyuram
məzarım üstə,
Deyirəm: az güldü,
çox azca güldü,
Qoy gülüm,
qalmasın arzusu gözdə.
Baxsan bu dünyanın
ha tərəfinə
Bir yerdə qəbrim var,
on yerdə
sağam.
Göy uçsa,
yer qopsa
ölmərəm yenə,
Hələ neçə dəfə
doğulacağam.
İllər
ötür... nəsillər dəyişir, təzələnir,
nəsillər dalınca nəsillər gəlir. Əli Kərim
də bu nəsillərlə təzədən doğulur,
üzünü sabaha, gələcəyə, günəşə
tutur. Onun əli əlimizdə, şeiri dilimizdə, xatirəsi
qəlbimizdədir. Nə biz Əli Kərimdən
ayrılanıq, nə də Əli Kərim bizdən...
Nahid Hacızadə
Ədalət.- 2011.- 5 mart.- S. 18.