Böyüyən, inkişaf edən Hacıqabul

Lap bu yaxınlara qədər bu yerlər boş çöllük idi. Paytaxtdan arana uzanan Hacıqabul rayonunun girişindəki bu tozlu-palçıqlı böyük bir ərazidə indi bir-birindən yaraşıqlı, müasir görkəmli inzibati binalar, fərdi evlər bu yerləri tanınmaz edib. Baytarlıq İdarəsinin, Təhsil və Maliyyə şöbələrinin, DSMF-nin rayon şöbəsinin son illər inşa edilmiş binaları bir-birinə söykənərək bu əraziyə xüsusi bir görkəm verir. Ulu Öndərin əzəmətli heykəli və onun xatirəsini yaşadan möhtəşəm muzey bənzərsizdir. Əmək və Əhalinin Sosial Müdafiə Mərkəzinin, "Kapital-Bank" binasının, ərazidən keçən neft kəmərinin Xüsusi Dövlət Mühafizə Xidməti İdarəsinin, onun yataqxanası, Rayon İcra Hakimiyyətinin milli üslubda əsaslı təmir olunmuş binası burda kiçik bir şəhərciyi xatırladır.

Bir az içəridə isə Daxili Qoşunların "N" saylı hərbi hissəsinin əməkdaşları üçün tikilməkdə olan binası, tikintisi yaxın vaxtlarda tamamlanacaq Hacıqabul rayon Polis şöbəsinin inzibati binası rayonda genişlənməkdə olan inşaat işlərindən xəbər verir. Rayon Prokurorluğunun inzibati binası, Mərkəzi rayon Xəstəxanası, Uşaq Tibb Mərkəzi, Atbulaq kəndindəki kərpic zavodu, yüksək keyfiyyətlə əsaslı təmir edilmiş Hacıqabul rayon mədəniyyət evi xeyli vaxtdır sakinlərin və istehlakçıların ixtiyarına verilib. Rayonun tikinti-abadlıq işlərini daha intensiv aparmaq üçün kafel-metlax zavodunun tikintisi sürətləndirilmişdir. Artıq xeyli vaxtdır ki, Fövqəladə Hallar Nazirliyi Yanğından Mühafizə İdarəsinin inzibati binasının tikintisi başlanmışdır. Qısaca desək, Hacıqabul rayonu son 5 ildə kərpic-kərpic böyüyərək simasını dəyişib, müasirləşib. Sakinlərin etiraf etdiyi kimi Hacıqabul rayonunun bugünkü inkişafında Rayon İcra Hakimiyyətinin başçısı Əhməd Muxtarovun xüsusi əməyi vardır.

Həll edilmiş problem

Hacıqabul rayonu uzun müddət mavi qaz olmadığı üçün bu təbii nemətdən bəhrələnə bilməmişdir. Rayon mərkəzindəki qaz xətləri sıradan çıxmış, bəzi kəndlər isə tamam unudulmuşdur. Nəhayət ki, insanların bu məişət problemi aradan qaldırılmış, 2010-cu ildə qaz sisteminin qurulması daha da sürətləndirilmişdir. Şəhərdə 255,954 pm boru çəkilmiş, 4650 evə çıxış dayağı qoyulmuşdur. Bunun müqabilində 4383 evə sayğac quraşdırılmışdır ki, istehlak olunan məhsulun miqdarına nəzarət etmək mümkün olsun. İndi Hacıqabul şəhər sakinlərinin mavi qaz sarıdan demək olar ki, heç bir narazılığı yoxdur.

Artıq rayonun Qızılburun, Qubalıbaloğlan, Navahı, Rəncbər, Atbulaq, Qarasu kəndlərində, Muğan və Navahı qəsəbələrində mavi qaz xətlərinin, digər texniki işlərin son tamamlanma işləri görülür. Abdulabad, Kolanı, Talış, Meynəman, Udulu ərazisindəki 7 kənddə polietilen borularla qaz çəkilişinin başlanmasına start verilmişdir. Dövlət Proqramı əsasında Hacıqabul şəhərinin mərkəzi başdan-başa, Rəncbər kəndində 584, Muğan qəsəbəsində 696 ev mavi qazla təmin olunmuşdur. Sərf olunan qazın dəyərinin yığılması 2010-cu ildə 87 faizə çatmışdır.

Hacıqabul aqrar rayonudur

Ötən illərdə olduğu kimi 2010-cu ildə də rayonda əkinçilik xeyli inkişaf etdirilmişdir. May ayında Kür və Pirsaat çaylarının daşması nəticəsində 3934 hektar əkin sahəsinin ziyan çəkməsinə baxmayaraq zəmilərdən 26810 ton məhsul götürülmüşdür. Gözlənildiyi kimi məhsuldarlıq 29,3 sentnerdən az olmamışdır. Heç şübhəsiz ki, aqrar sahədəki bu irəliləyiş heyvandarlığa da təsirsiz qalmamışdır. Ət istehsalı 4800 tona, süd istehsalı 13800 tona, yun istehsalı 206 tona yüksəlmişdir.

Hacıqabul rayon təsərrüfatlarında maldarlığın inkişafına diqqətin nəticəsində uğurlar əldə edilmişdir. Mal-qaranın baş sayı 2010-cu ildə 35163, xırdabuynuzlular isə 124600-ə yüksəlmişdir.

Aqrar sahəni daha da inkişaf etdirmək məqsədilə rayonda əlavə tədbirlər görülür. 55 kilometrlik Baş Şirvan kanalının çəkilişindən və Pirsaat çayı üzərindəki su anbarının lildən təmizlənərək yenidən qurulması nəticəsində Hacıqabulda daha 15 min hektar torpaq sahəsi əkin üçün istifadə ediləcəkdir. Bu da heç şübhəsiz insanların iqtisadi həyatlarına təsirsiz ötüşməyəcək.

Yol mədəniyyətdir

Bütün bölgələrdə olduğu kimi Hacıqabul rayonunda da "Regionların Sosial-İqtisadi İnkişafı Dövlət Proqramı"-nın yerinə yetirilməsi böyük uğurla həyata keçirilir. Tikinti, quruculuq, abadlıq işlərinin uğurlu nəticəsidir ki, yuxarıda dediyimiz kimi indi rayon öz simasını tamamilə dəyişmişdir. Ötən il Hacıqabulda 2481,6 min manat əsas fondlar istifadəyə verilmiş, iqtisadi və sosial sahələrin inkişafında əsas kapitala 47.248.6 min manat investisiya qoyulmuşdur.

Rayonun yol tikintisinə ayrıca diqqət yetirildiyindən indi bir çox kəndlərdə belə problemlər tam aradan qaldırılmaq üzrədir. Ölkə Prezidenti İlham Əliyevin keçirdiyi son yığıncaqda tövsiyyə etdiyinə görə bu sahəyə diqqət daha da artırılacaq. Buna qədərsə şəhərin qərb hissəsində, 20 Yanvar, S.Almazov, Şirvan, Ə.Həmidov, M.Müşfiq, H.Z.Tağıyev küçələrində yol təmir işləri aparılmışdır. Abdulabad-Kolanı, Muğan-Udulu avtomobil yollarında qum-çınqıl qarışığından əsas qoyulmuşdur. Rəncbər, I Udulu, Abdulabad, Meynəman, Atbulaq, Qızılburun, Qarasu, Navahı, Pirsaat kənd yollarında bu xarakterli müxtəlif miqyaslı işlər görülmüşdür.

"Təhsil millətin gələcəyidir"

Bu müdrik kəlamların müəllifi Ulu Öndər Heydər Əliyevdir. Hacıqabul rayon təhsili son illər maddi-texniki bazanı yaxşılaşdırmaq istiqamətində xeyli iş görmüşdür. Rayonda fəaliyyət göstərən 30 ümumtəhsil məktəb, 5 məktəbdənkənar, 3 məktəbəqədər tərbiyə müəssisəsi gənc nəslin elmi və mənəvi zənginliyinə hesablanmışdır. Şagirdlərin daha müfəssəl bilik almaları üçün müxtəlif növ inventarlarla bərabər 9229 manat dəyərində kompüter alınmışdır. 2010-cu ildə şəhər 2 saylı, Ağacanlı kənd orta məktəbləri əsaslı təmir olunaraq təhsil işçilərinin ixtiyarına verilmişdir. Səbinə Əliyeva "Ən yaxşı müəllim" müsabiqəsinin qalibi olmuşdur. Rəncbər kənd orta məktəbinin yetirməsi Günay Məmmədova ali məktəbə qəbul imtahanlarında ən yüksək bal topladığına görə Prezident təqaüdünə layiq görülmüşdür.

Şorbaçı, Abdulabad, Kolanı, Tağılı, Meynəman kəndlərində, Muğan qəsəbəsində məzunların ali məktəblərə qəbulunu yüksəltmək Hacıqabul rayon Təhsil işçilərinin əsas qayğılarındandır. Ən əsas qayğılardan biri də orta məktəblərdə ixtisaslı müəllimlərin sayını artırmaqdır. Təlim və tədrisdə öz sözü olan Hacıqabul rayonu Təhsil şöbəsi yəqin ki, bu qayğıları da həll edə biləcək.

Sağlam insan sağlam ruh deməkdir

Bu doğrudan belədir, bəşərin ən gözəl varlığı olan insanın fəaliyyət göstərməsi üçün onun sağlamlığı ən böyük amildir. Hacıqabul Səhiyyə işçiləri çalışırlar ki, ən ucqarlarda belə insanlara tibbi xidmət günün tələblərinə cavab versin. Rayondakı 2 xəstəxana, 10 həkim, 12 tibb məntəqələri hacıqabullulara xidmət edir. Yeni tikilmiş poliklinika-xəstəxana, Uşaq Tibb Mərkəzi ən müasir avadanlıqla təchiz edilmişdir. Əhaliyə daha yaxşı xidmət üçün Mərkəzi Xəstəxananın 1-ci mərtəbəsində təmir işləri aparılır, kommunikasiya xətləri dəyişdirilir. Ötən il 16 həkim, 24 orta tibb işçisi elmi-təcrübi biliklərini artırmaq üçün təkmilləşdirmə kurslarında olmuşlar. Ancaq rayonda daha 29 həkimə ehtiyac olması səhiyyə sahəsinə təsirsiz də qalmır.

Buna baxmayaraq son illərdə olduğu kimi 2010-cu ildə də rayonda insanların sağlamlığı ilə bağlı heç bir problem yaşanmamışdır.

Onlar evsiz qalmadılar

Ötən ildə Kür daşqınlarından əziyyət çəkən insanlar sırasında Hacıqabul rayon Meynəman kəndi də o fəlakətli günləri yaşamalı olmuşdur. Kənd su içində qaldığından zərər çəkmiş evlərlə bərabər bir sıra mənzillər tamam yararsız hala düşmüşdür. Az müddətdə kənddəki infrastruktur bərpa olunmaqla 22 ailə üçün müasir, rahat evlər inşa edilmişdir. 07 sentyabr 2010-cu ildə ölkə Prezidenti İlham Əliyev həmin kənddə olmuş, yeni mənzillərin açarlarını da məhz özü sakinlərə təqdim etmişdir. Hər bir ailənin arzusunda olduğu belə mənzildə Prezidentin xeyir-duası ilə yaşamaq özü bir tarix, xoş xatirədir. Ümumiyyətlə isə Hacıqabul rayonunda təbii fəlakət nəticəsində dağılmış və onların əvəzində inşa edilmiş mənzillər, binalar çoxdur.

İndi-indi öz görkəmini tapan, inkişaf edən Hacıqabul rayonu yəqin ki, çox yaxın vaxtlarda regionda daha böyük uğurlara imza atacaq. Bu onun haqqıdır.

Səxavət Məmmədli

Ədalət.- 2011.- 11 mart.- S. 7.