Valideynlər uşaqlar haqqında nəyi bilməlidir

(əvvəli ötən saylarımızda)

21 iyun - 22 iyul arasında doğulan uşaqların xarakteri

Astroloji dildə belə uşaqları XƏRÇƏNG adlandırırlar. Sanki valideynlər mələk xasiyyətli bir uşaq istəmişlər, bu uşaq isə güclü hisslərin qanadında dünyaya gəlmişdir. Bu hisslər uşağın ağlına üstün gəlir, onu kövrəkləşdirir. Bu o deməkdir ki, belə uşaqlar coşğun və qaynar, amma həssas və kövrək olur. Onlar tez qızır və hirslənir, dözümsüzdürlər, əhval-ruhiyyələri dəyişkən, qeyri-saitdir. İllər keçdikcə bu uşaqlar da həyatda öz yerlərini tapır, lakin intuitiv yolla.

Bu bürcdə doğulanlar gözəl və cazibədar olur, onlar xüsusən qəlbən yaxın bildikləri adamlara qarşı diqqətli və xeyirxahdır. Çox halda qapalı olan XƏRÇƏNGlərin əsəb sistemləri həssas və zəifdir. Onlara canlı və aydın təsəvvürlər, zəngin fantaziya, xəyalpərvərlik və sentimentallıq xasdır. Qız XƏRÇƏNG tez-tez ana olacağı günü təsəvvür edir, o özünü bu hissə qurban verməyə hazırdır. Praktika bir qayda olaraq idealizmə üstün gəlir, XƏRÇƏNGin səmimiyyəti, onun şəxsi azadlıq və müstəqilliyə olan meyli qədər güclüdür. Lakin səmimiyyətinin nəticəsi olan fəallığına onun fleqmatik temperamenti kölgə salır. O, bütün səy və iradi hərəkətlərində sakit, təmkinlidir, ağılla, məqsədli surətdə hərəkət edir. XƏRÇƏNGin əməlləri gözə çarpmır, onlarda aqressivlik və zor yoxdur.

XƏRÇƏNG özündən güclülərə lütfkarlıq və mehribanlıq göstərir, bu xasiyyət ömür boyu onları tərk etmir.

Uşaq və gənc yaşlarından özünü göstərən daxili narahatlıq onu səfərlərə, səyahətlərə sövq edir. Sevgiyə, romantik sərgüzəştlərə erkən aludə olur. Şişirdilmiş söz-söhbətə, sensasiyaya meyllidirlər.

Belə uşaqlar kiçik yaşlardan ədəbiyyat və incəsənətə, xüsusən, dramaturgiyaya, poeziyaya, musiqi və baletə, teatr və kinoya həvəs göstərirlər. Bu həvəs sonralar onların zövq mənbəyinə çevrilir.

Uşaq və yeniyetmə yaşlarında tez-tez ağlamaq da onların qismətindədir. Soyuq münasibət onlara dərhal təsir edir, sevgi və diqqətə möhtacdırlar. Başqalarının dərdinə şərik olur, kömək etməyə çalışırlar. Yaşıdları, dostları ilə ünsiyyət bəzən onlar üçün olduqca zəruridir, anaları ilə xüsusilə mehriban olurlar və bu zaman doğma ev, doğma ocaq səadət yuvası kimi onlara şirin gəlir.

XƏRÇƏNGlər bir qayda olaraq təşəbbüskar deyil. Onların bütün işlərinə kənar təsirlər stimul verir - bu, tərif də ola bilər, mükafat da. Amma əlbəttə, şəxsi uğur ən yaxşı stimuldur. Onların qətiyyətsizliyi həmişə onlara mane olur. Məqsədlərinə ya çatmırlar, ya da çətinliklə çatırlar.

Belə uşaqlar əsl həqiqəti başa düşmədiyindən tez-tez nəinki yaşıdlarını, həm də ata-analarını, yaxın qohumlarını da hirsləndirirlər. Bu uşaqların fikri yayğın olur, tez inciyirlər, ona görə də onlarla bir iş görmək istəsən, dərhal gör, sabaha saxlama, çünki sabah onlar fikirlərini dəyişə, yaxud ondan imtina edə bilərlər. Yaxşı olar ki, onlara fikirləşməyə vaxt verəsiz, qoy əmin olsun və hiss eləsin ki, özləri belə istəyir, öz iradəsi ilə hərəkət edirlər. İstəyinizi yalnız bu yolla əldə eləyə bilərsiz.

Xərçənglərin ən zəif yeri - həzm orqanları (mədə-bağırsaq), döşün aşağı hissəsi, ağ ciyər ətrafı və selikli qişalardır. Onlara qızdırma və soyuqdəymə, hipermenoreya, hidrops, apopleksiya (beyin iflici), epilepsiya (huşunu itirmə) kimi xəstəliklər xasdır.

22 iyul - 23 avqust arasında doğulan uşaqların xarakteri

Astroloji dildə belə uşaqlar ŞİR adlanır. ŞİRlərin valideynləri bilməlidir ki, belə uşaqlar onlardan yalnız bələk ağı yox, illər keçdikcə dəbdəbəli yaşayış üçün lazım olan zəngin var-dövlət də istəyəcəklər. Valideynlər çox vaxt boğazlarından kəsib onların istədiklərini almalı olurlar. ŞİRlərin qızğın xolerik temperamenti və ehtiraslı hissləri onların başlıca hərəkətverici qüvvəsidir. Onları daha çox hisslər idarə edir.

Belə uşaqlar təbiətən xeyirxah və ürəyi geniş, özünə əmin və qürurlu, cəsur və mərd, səmimi və qətiyyətlidir, əməksevər və işgüzardır, onlarda şəxsi ləyaqət hissi çox inkişaf etmişdir. Onlarda ixtiraçılıq, təşkilatçılıq qabiliyyəti vardır, müxtəlif oyunlar fikirləşib tapırlar. Yaşıdlarına, valileynlərinə, bacı-qardaşlarına, habelə ətrafdakılara rəhbərlik etməyi, idarə etməyi sevirlər. O da doğrudur ki, sonrakı illərdə bu xasiyyət xudpəsəndliyə, eqoizmə çevrilir. Şən və cah-cəlallı həyatı xoşlayır, zənginlik və dəbdəbə axtarırlar.

ŞİRlərin mənfi cəhətləri bunlardır: təkəbbürlük, özündə razılıq və lovğalıq, kobudluq və dikbaşlıq, qəddarlıq və amansızlıq, heç kimi saya salmamaq, təmtəraqlı həyata meyl. Əlbəttə, xarakterin bu mənfi cəhətlərini məktəb illərində düzgün tərbiyə ilə islah etmək mümkündür.

Böyük həyati gücü və enerjisi olan bu uşaqlar məqsədli və planlı hərəkət edir. Böyük işlər haqqında fikirləşirlər, məşhurluq və şöhrət, nüfuz və mükafat iddiasında olurlar.

Onlar üçün ən çətin şey başqasının iradəsinə tabe olmaq, özünə və dünyagörüşünə qarşı çıxmaqdır. Yaşıdları arasında heç vaxt ikinci dərəcəli olmaq istəmirlər.

Onlar təbiəti və heyvanları, ədəbiyyat və incəsənəti, musiqini və tamaşaları xoşlayırlar. Təbiətən artist olduqları üçün alqış, mükafat və tərif gözləyirlər. Onları fikrindən daşındırmaq çox çətindir. Zor, məcburiyyət, tabeçilik onlar üçün yaddır. Dərdə şərik olmaq istəmələri onlarda himayəçilik və qəyyumluq arzusu oyadır, acizə, bədbəxtə, möhtaca kömək etməyə çalışırlar. İncəsənətdən savayı onlar hər yerdə və hər sahədə birinci olmaq istəyirlər.

Uşaq ŞİRləri həmişə tərifləmək lazımdır - yaxşı ideya, təklif, fikir və mülahizə üçün, hətta zahiri geyimlərinə görə. Onların etibarını bu cür qşazana bilərsiniz, çünki sadəlövhlük də onların xarakterik xüsusiyyətidir. İşgüzar danışıqlarda nə istədiyinizi açıq və birbaşa deməlisiniz. Onlar konkret və işgüzar danışmağı xoşlayırlar.

ŞİRlər bədəninin bu orqanlarından şikayət edirlər: ürək və ürək-damar sistemi, kürək, onurğa,diafraqma, arteriyalar, qan dövranı. Onlara qızdırma, soyuqdəymə, üz-göz, mədə və ciyər xəstəlikləri xasdır.

(ardı var)

Ədalət.- 2011.- 12 mart.- S. 14.