ÖNDƏDİR HƏLƏ

(Nahid Hacızadənin 75 illiyinə həsr olunub)

Qayən bulaqların suyundan təmiz,

Özün dost-doğmasan daim əzizsən.

Ədib-dramaturq Hacızadəmiz,

Şair təbiətli Nahidimizsən!

Çətin suallardır həyat dərs kimi,

Tərs kimi intizar, qəm payın da var.

"Yalçın qayalarda qalan səs" kimi,

Göylərə ucalan harayın da var.

Çağırır Savalan dağı da səni,

Təbriz, Arazın o tayı gözləyir.

Ömrün qarşıdakı çağında Səni

Nəvən Yasəmənin toyu gözləyir.

Cütbaşlı əjdaha gərək əzilsin,

Sabun köpüyüdür şər, böhtan, hədə.

Vətəni tərk edən oğullar bilsin:

Çoxdur cəngavərlər Gədəbəydə də.

"Məhəbbət" - işıqlı əqidə, məslək:

"Məhəbbət" - od, alov, əbədi şölə!

Nahid, bu bayrama gümüş söyləsək,

Qızıl yubileyin öndədir hələ!

Oqtay RZA

Ədalət.- 2011.- 16 mart.- S. 6.