Əlibaba Məmmədov: "Muğama bu cür yüksək beynəlxalq qiymətin verilməsində Mehriban xanım Əliyevanın böyük zəhməti olub"

"Azərbaycan muğamı qədim və zəngin ənənəyə malikdir. Əsrlər boyu muğam sənəti Azərbaycan xalqının ən yüksək mənəvi nailiyyətləri ilə zənginləşib, inkişaf edib. Ölkəmiz müstəqillik qazandıqdan sonra isə bu inkişaf yeni mərhələyə qədəm qoyub. YUNESKO tərəfindən Azərbaycan muğamının qeyri-maddi mədəni sərvətlər sırasına daxil edilməsi heç də təsadüfi sayılmamalıdır.

Yaddan çıxarmamalıyıq ki, Azərbaycan muğamına bu cür yüksək beynəlxalq qiymətin verilməsində Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevanın böyük zəhməti olub". Bu sözləri "Muğam aləmi" II Beynəlxalq muğam festivalının iştirakçısı, xalq artisti Əlibaba Məmmədov AzərTAc-a müsahibəsində deyib.

Artıq ikinci dəfədir ki, Azərbaycanın ev sahibliyi ilə keçirilən Beynəlxalq muğam festivalının tarixi əhəmiyyət daşıdığını söyləyən Ə.Məmmədov qeyd edib ki, bu layihələr xalqımıza məxsus muğam sənətinin bütün dünyaya yayılmasına yeni imkanlar açacaq: "Bu gün biz qonaqlarımızı bir-birindən gözəl, yeni təmir edilmiş konsert salonlarında salamlayırıq. Bu özü də hər bir əcnəbiyə burada sənətə və sənətkara verilən qiymət haqqında çox şey deyir. Mən inanıram ki, beynəlxalq festival həm də bu ilin aprelində Bakıda keçiriləcək Ümumdünya Mədəniyyətlərarası Dialoq Forumuna dəstək verəcək".

Ədalət.- 2011.- 17 mart.- S. 8.