Eldar Mahmudov:
"Azərbaycanın əlverişli geosiyasi mövqeyi xarici xüsusi xidmət orqanları və kriminal elementləri üçün
cəlbedici görünür"
Azərbaycan milli təhlükəsizlik orqanlarının
yaranmasından 92 il ötür. Milli Təhlükəsizlik Nazirliyinin mətbuat xidmətindən Lent.az-a verilən məlumata görə, peşə bayramı münasibətlə
milli təhlükəsizlik
naziri Eldar Mahmudov başda olmaqla, nazirliyin şəxsi heyəti Fəxri Xiyabana gəlib, Heydər Əliyevin məzarı önünə əklil qoyub. Akademik Zərifə Əliyevanın
məzarı üzərinə
gül dəstəsi düzülüb. Sonra Şəhidlər Xiyabanına
gələn Milli Təhlükəsizlik Nazirliyinin
əməkdaşları şəhidlərin
məzarları üstünə
güllər düzüb,
"Əbədi məşəl"
abidəsinin önünə
əklil qoyublar. Azərbaycanın suverenliyi
və ərazi bütövlüyü uğrunda
mübarizədə həlak
olmuş və burada dəfn edilmiş milli təhlükəsizlik orqanlarının
əməkdaşlarının da xatirəsi yad edilib.
Bayram mərasimi Milli Təhlükəsizlik
Nazirliyinin Heydər Əliyev adına Akademiyasında davam
etdirilib. Akademiyanın döyüş bayrağı təntənəli
şəkildə sıra meydanına gətirilib, Heydər Əliyevin
xatirəsi bir dəqiqəlik sükutla yad edilib, dövlət
himni səsləndirilib. Eldar Mahmudov Heydər Əliyevin
peşəkarlıq ənənələri əsasında
müasir təlim-tədris prosesini həyata keçirən bu
ali təhsil ocağının şəxsi heyətini,
kursantları və dinləyiciləri Azərbaycan təhlükəsizlik
orqanlarının 92-ci ildönümü münasibətilə
təbrik edib, onlara ölkəmizin milli maraqlarının və
təhlükəsizliyinin qorunması naminə təhsildə,
məsuliyyətli və şərəfli fəaliyyətlərində
uğurlar arzulayıb. Qeyd olunub ki, gənc zabit korpusunun
yetişdirilməsi üçün maddi-texniki imkanları ildən-ilə
artan Akademiyada hər cür şərait yaradılıb. Eldar
Mahmudov milli təhlükəsizlik orqanlarına, onun şəxsi
heyətinə göstərdiyi gündəlik diqqət və
qayğıya görə Azərbaycan Prezidenti İlham Əliyevə
minnətdarlığını bildirib.
Nazir deyib ki, bu gün Azərbaycanın
dinamik inkişaf edir, ölkədə hərtərəfli
islahatlar aparılır, yeni iqtisadi layihələrin həyata
keçirilir, uğurlu dövlət quruculuğu siyasəti nəticəsində
respublika dünyanın aparıcı dövlətləri
sırasında yerini ildən-ilə möhkəmləndirir:
"Ancaq inkişafımızı gözü götürməyən
qüvvələr də var. Əminəm ki, gənclərimiz,
o cümlədən kursantlarımız yad təsirlərdən
uzaq durmağı, pisi yaxşıdan seçməyi
bacarırlar. Onlar ölkənin tərəqqisi, öz gələcəkləri
naminə aparılan siyasətə dəstək verirlər.
Son vaxtlar bütün ölkə miqyasında neqativ hallara,
xüsusilə korrupsiyaya qarşı mübarizə tədbirlərinin
genişləndirilməsi ümumən insanların öz
sabahlarına olan inamlarını daha da artırır. Bu
mühüm tədbirlərin uğurla həyata keçirilməsində
Milli Təhlükəsizlik Nazirliyinin də üzərinə
böyük vəzifələr qoyulub. Ümumi məqsəd
ölkənin iqtisadi inkişafına yönəlmiş
bütün səylər və islahatlar üçün əlverişli
şərait yaratmaqdır".
Eldar Mahmudov
vurğulayıb ki, ən mühüm vəzifə
düşmən işğalında olan Azərbaycan
torpaqlarının azad edilməsi, ərazi
bütövlüyümüzün təmin olunmasıdır:
"Milli Təhlükəsizlik Nazirliyi ölkə rəhbəri
tərəfindən həyata keçirilən çoxsahəli
fəaliyyətlərdə, o cümlədən informasiya
mübarizəsində yaxından iştirak edir. Bu təhsil
ocağının üzərinə Azərbaycanın təhlükəsizliyinə
cavabdehlik daşımağa qadir gənc kadrların
yetişdirilməsi kimi mühüm vəzifə
düşür.
Milli təhlükəsizlik
naziri Azərbaycan xalqının mənafelərinin və təhlükəsizliyin
qorunması və möhkəmləndirilməsi sahəsində
ardıcıl fəaliyyət göstərildiyini, vaxtında həyata
keçirilmiş qabaqlayıcı tədbirlər nəticəsində
ekstremist-terrorçu niyyətlərin və konkret cinayətkar
hərəkətlərin qarşısının qətiyyətlə
alındığını söyləyib. Sonda kursantlar təntənəli
marşla tribunanın önündən keçiblər.
Bundan sonra Milli Təhlükəsizlik
Nazirliyində Azərbaycanın təhlükəsizlik
orqanlarının yaranmasının 92-ci ildönümü
münasibətilə geniş təntənəli mərasim
keçirilib. Əvvəlcə mərasim iştirakçıları
Milli Təhlükəsizlik Nazirliyinin ən müasir tələblərə
cavab verən yeni inşa olunmuş inzibati binasının
açılışında iştirak ediblər. İlk
öncə binanın foyesində Azərbaycanın təhlükəsizlik
orqanlarının əbədi və fəxri rəhbəri
Heydər Əliyevin tanınmış heykəltəraş
Fuad Salayev tərəfindən hazırlanmış
büstü önünə əklil qoyulmuş və xatirəsi
ehtiramla yad edilib. Qonaqlar onun zəngin həyat və fəaliyyətini
əks etdirən fotostendlə tanış olublar. Sonra tədbir
iştirakçıları Azərbaycanın müstəqilliyi
və ərazi bütövlüyü uğrunda mübarizədə
tarixə qəhrəmanlıq salnaməsi yazmış milli təhlükəsizlik
orqanlarının əməkdaşları olmuş Azərbaycan
Respublikasının Milli Qəhrəmanlarının xatirəsinə
yaradılmış guşəyə baxıblar.
Təntənəli mərasim
Milli Təhlükəsizlik Nazirliyinin akt zalında davam
etdirilib. Heydər Əliyevin xatirəsi bir dəqiqəlik
sükutla yad olunub, Azərbaycanın dövlət himni səsləndirilib.
Eldar Mahmudov mərasimdə çıxış edərək
milli təhlükəsizlik orqanlarının bütün
şəxsi heyətini və veteranları, ulu öndərin
şərəfli məktəbinin davamçılarını
peşə bayramı münasibəti ilə təbrik edib.
Nazir vurğulayıb ki, Azərbaycanın əlverişli
geosiyasi mövqeyi, iqtisadi və tranzit potensialı, eləcə
də digər müsbət amillər xarici xüsusi xidmət
orqanları və kriminal elementləri üçün cəlbedici
görünür. Milli Təhlükəsizlik Nazirliyinin kəşfiyyat,
əks-kəşfiyyat və hərbi əks-kəşfiyyat
sahəsi üzrə fəaliyyətində bu amillərə
xüsusi fikir verilir. Vaxtında görülmüş tədbirlər
sayəsində xarici xüsusi xidmət orqanlarının və
digər subyektlərin kəşfiyyat-pozuculuq və terror-təxribat
fəaliyyətinin qabaqlanması və ifşa edilməsi
istiqamətində işlər uğurla davam etdirilib. Əks-kəşfiyyat
və hərbi əks-kəşfiyyat tədbirləri nəticəsində
dövlətə xəyanətə və casusluğa görə
12 nəfər ifşa olunub.
Milli Təhlükəsizlik
Nazirliyinin çox mühüm bir fəaliyyət istiqamətini
terrorçuluğa qarşı mübarizə təşkil
etdiyini bildirən nazir Eldar Mahmudov 2010-cu ildən
hazırkı dövrədək antiterror xətti ilə
keçirilmiş əməliyyat-axtarış tədbirləri
nəticəsində 9 cinayət işinin
başlandığını, 29 nəfərin cinayət məsuliyyətinə
cəlb olunduğunu qeyd edib. Eldar Mahmudov korrupsiya probleminə
ayrıca toxunub və bildirib ki, bu, Azərbaycan Prezidentini və
cəmiyyətini narahat edən bir məsələdir. Ötən
dövr ərzində korrupsiya faktları üzrə ümumən
8 cinayət işi başlanıb, 12 nəfər məsuliyyətə
cəlb olunub.
Nazirliyin funksional vəzifələri
arasında informasiya təhlükəsizliyinin təmini
xüsusi önəm daşıyır. İnformasiya
texnologiyaları sahəsində cinayətlərlə, o
cümlədən kibercinayətkarlıqla mübarizə sahəsində
fəaliyyətin müasir tələblərə uyğun
qurulmasına ciddi fikir verilir. Təcrübə göstərir
ki, açıq qaynaqlar bir sıra ölkələrdə
sabitliyin total surətdə pozulması üçün vasitə
rolunu oynayır. Xüsusən təbii sərvətlərlə
zəngin, həssas dini mühiti və çoxmillətli olan
ölkələr hədəfə alınır. Təsir
altına yetkin siyasi şüura malik olmayan gənclər
düşür. Bu vəziyyətdən xarici qüvvələr,
həm də daxildəki müəyyən ünsürlər
faydalanmağa çalışırlar. Transmilli mütəşəkkil
cinayətkarlıqla mübarizə üzrə keçirilən
səmərəli əməliyyat-axtarış tədbirləri
nəticəsində ötən dövr ərzində ümumən
24 cinayət işi başlanmış, 44 nəfər cinayət
məsuliyyətinə cəlb olunub. Ötən müddət ərzində
narkotiklərin qanunsuz dövriyyəsi ilə mübarizə tədbirləri
çərçivəsində 30 transmilli qrup zərərsizləşdirilmiş,
1 ton 550 kiloqram narkotik müsadirə olunub, həmin faktlarla
bağlı 44 cinayət işi başlanıb. İstintaq fəaliyyətinin
səmərəli aparıldığını, cinayətlərin
açılmasına, cinayətkarların ifşa
olunmasına dəyərli töhfələr verildiyini qeyd edən
Eldar Mahmudov ötən müddət ərzində Milli Təhlükəsizlik
Nazirliyində 147 cinayət işinin istintaqının başa
çatdırıldığını nəzərə
çatdırıb.
Qeyd olunub ki, peşə
bayramı ərəfəsində Milli Təhlükəsizlik
Nazirliyinin ən yüksək standartlara malik yeni inzibati
binasının istifadəyə verilməsi xüsusilə əlamətdardır.
Bundan əlavə, ötən il ərzində Nazirliyin
qapalı idman kompleksi istifadəyə verilmiş, Hərbi
Hospitalda və İstirahət evində tikinti işləri isə
plan üzrə aparılır. Mühüm sahələrdən
olan beynəlxalq əlaqələrin daim diqqət mərkəzində
saxlanıldığını və tərəfdaşlıq
münasibətlərinin müsbət dinamikada inkişaf
etdiyini vurğulayan nazir Eldar Mahmudov, hazırda Milli Təhlükəsizlik
Nazirliyinin 60-a yaxın xarici xüsusi xidmət orqanı və
beynəlxalq təşkilatla əməkdaşlıq etdiyini
söyləyib.
Ermənistanın terror
siyasətini ifşa edən, Azərbaycan həqiqətlərini
dünyaya çatdıran müxtəlif sənədli filmlər,
25 mindən çox kitab və digər vəsait
hazırlanmış, xarici dillərə tərcümə
edilmiş və yayılmışdır. Bütün bu
işlərdə Əsir və itkin düşmüş,
girov götürülmüş vətəndaşlarla əlaqədar
Dövlət Komissiyasının xüsusi rolu olub.
Yığıncaqda
Milli Təhlükəsizlik Nazirliyinin Heydər Əliyev
adına Akademiyasının rəisi general-leytenant Ziya Yusifzadə
çıxış edib, MTN tərəfindən həyata
keçirilən tədbirlərin, əldə olunan
uğurların cəmiyyətdə rəğbətlə
qarşılandığını dilə gətirib,
Akademiyada aparılan təlim-tədris prosesi barədə
danışıb. Sonra təbrik sözü ilə
çıxış edən Prezident Administrasiyasının
hüquq mühafizə orqanları ilə iş şöbəsinin
müdiri Fuad Ələsgərov dövlət
başçısının da şəxsi heyətə təbriklərini
çatdırıb, dövlətçiliyimizin və milli
maraqlarımızın təhlükəsizliyinin təmin
olunmasında MTN-in rolunun yüksək qiymətləndirildiyini
vurğulayıb. Azərbaycan Respublikasının Prezidenti,
Silahlı Qüvvələrin Ali Baş Komandanı İlham Əliyevə
mərasim iştirakçıları adından müraciət
qəbul olunub.
Mərasimdə MTN əməkdaşlarına
ali hərbi rütbə və təltiflərin verilməsi barədə
Azərbaycan Respublikası Prezidentinin 2011-ci il 18 mart tarixli sərəncamları
elan olunub. Xidmətdə fərqlənmiş əməkdaşların
mükafatlandırılması barədə Eldar Mahmudovun əmrləri
elan olunub, təhlükəsizlik orqanlarının
veteranlarına qiymətli hədiyyələr təqdim edilib.
Tədbirin sonunda Milli Təhlükəsizlik
Nazirliyinin arxiv materialları əsasında tanınmış
kinorejissor Vaqif Mustafayevin hazırladığı "Təxribat"
sənədli filmi nümayiş olunub.
Ədalət.- 2011.- 29 mart.- S. 4.