Latviya mətbuatında azyaşlı azərbaycanlı uşağın ermənilər tərəfindən öldürülməsi ilə bağlı məqalə dərc olundu

Latviyanın "Ças" qəzetinin 17 mart tarixli sayında 9 yaşlı azərbaycanlı Fariz Bədəlovun Ermənistan Silahlı Qüvvələrinin snayperi tərəfindən öldürülməsi ilə bağlı məqalə dərc olunub. Diasporla İş üzrə Dövlət Komitəsinin mətbuat xidmətindən APA-ya verilən məlumata görə, məqalədə martın 8-də Ermənistan Silahlı Qüvvələrinin snayperi tərəfindən 9 yaşlı Fariz Bədəlovun öldürülməsindən sonra Ermənistan-Azərbaycan, Dağlıq Qarabağ münaqişəsi bölgəsində vəziyyətin gərginləşdiyi qeyd olunub. Azərbaycan və Ermənistan prezidentlərinin Soçi görüşünün keçirildiyini xatırladan müəllif bildirib ki, orada verilən optimist bəyanatlar münaqişənin tezliklə nizamlanmasında maraqlı olmayan qüvvələri narahat edib.

Daha sonra məqalədə bu həftənin əvvəlində Azərbaycana rəsmi səfər etmiş İsveçrə Konfederasiyasının prezidenti Mişelin Kalmi-Reyin Azərbaycan prezidenti İlham Əliyevlə keçirdiyi birgə mətbuat konfransında "Ermənistanın özünü konstruktiv aparmalı və beynəlxalq təşkilatların işğalçı qüvvələrin qəsb olunmuş torpaqlardan çıxmasına dair qətnamələrinə əməl etməlidir" söylədiyi qeyd olunub. Bütün nüfuzlu beynəlxalq təşkilatların münaqişə ilə bağlı konkret mövqe ortaya qoyduqlarını yazan müəllif məqaləni Azərbaycan prezidentindən gətirdiyi sitatla tamamlayıb: "Minsk Qrupu artıq 19 ildir ki, fəaliyyət göstərir. Əfsus olsun ki, bu müddət ərzində heç bir əməli nəticə əldə olunmayıb. Status-kvonu dəyişdirməyin, qaçqın və məcburi köçkünlərin işğal olunmuş torpaqlara qaytarılmasına başlanmasının zamanı yetişib. Öz doğma torpaqlarında yaşamaq onların fundamental hüququdur".

Ədalət.- 2011.- 19 mart.- S. 4.