Valideynlər uşaqlar haqqında nəyi bilməlidir

(əvvəli ötən saylarımızda)

23 avqust - 23 sentyabr arasında doğulan uşaqların xarakteri

Bunlar QIZlardır. Belə uşaqlar realist və praktikdir. Onların iti və soyuq ağlı, mühakimə və analitik düşüncəsi, höccətliliyi və tənqidi mülahizələri uşaqlıqdan özünü göstərir.

QIZlar bir qayda olaraq valideynlərin, müəllimlərin ümidini doğruldurlar. Onlar əvvəlcə sanki yaşıdlarından heç nə ilə fərqlənmirlər. Ancaq tezliklə bu "sakit" uşaqlarda çalışqanlıq, əməksevərlik, işgüzarlıq, səliqə və diqqətcillik, müxtəlif adamlarla müxtəlif şəraitdə işləmək bacarığı və s. cəhətlər görünür. Onlarda hansısa daxili narahatlıq və təlaş baş qaldırır, qətiyyətsizlik, eqoizm və tamahkarlıq özünü göstərir, deyingən olurlar, məkr və hiylə ürəklərinə yol tapır. Onlar nəinki sabahın, gələn həftənin məktəb və məktəbdənkənar işlərini, hətta gələn il üçün planlar cızırlar.

Onlarda möhkəm yaddaş fəlsəfi düşüncə ilə, sərrast mühakimə iti ağılla birləşir. QIZlarda kiçik yaşlardan başlayaraq müəyyən əda, naz, vasvasalıq və xırdaçılıq, başqalarını öz məqsədi üçün işlətmək, istifadə etmək meyli yaranır. Maddi cəhətlərə üstünlük verdiyindən məcbur olur ki, aldığı bilik və bacarığı zənginliyə, bər-bəzəyə sərf etsin.

QIZ erkən yaşlardan sözübütöv və səliqəlidir. Vaxta riayət edir. Saatla yatır, saatla durur. Hər şeyi vaxtında eləyir. Bütün işlərini - istər məktəb-dərs, istərsə də məktəbdənkənar işlər - planla, qrafiklə yerinə yetirir. Onlar öz məqsədlərinə hansı yolla, hansı vasitə ilə olsa çatacaqlar, istər bu vasitə yaxşı olsun, istər pis, rəvadır, ya yox. Kiçik yaşlardan hamıya, hər şeyə diqqət verir, hər şeyə qulaq asır, hətta tamamilə başa düşməsə də.

Məktəb partasından başlayaraq o, hamını və hər şeyi müzakirə və tənqid edir, hamıyla öcəşir, sataşır. Yaxşı oxuyur, amma tez-tez özünü yuxarı tutur.

O da düzdür ki, belə uşaqların əsl dostları ya yoxdur, ya azdır, çünki onlar burunlarını hara soxurlarsa, orada bir fəsad törədirlər.

Bu uşaqlar kiçik yaşından bilirlər ki, nə istəyirlər və nəyə nail ola bilərlər. Onlar böyük canfəşanlıqla bütün bilik və səylərini səfərbər edirlər ki, öz məqsədlərinə çatsınlar. Onlar elə uşaq deyil ki, bir anlıq parlayıb-sönən ulduz kimi yox olsunlar. QIZlar yanacağı qənaətlə işlədən lampaya bənzər, onun yağı heç vaxt qurtarmır.

Mühakiməsi iti olduğundan, onlar rəsmi və quru olur, yumoru başa düşmür və sevmirlər, ona görə də hiss və ehtiraslarına meydan vermirlər. Onlar qapalı, həm də zahirən hissiyatsızdılar, robota oxşayırlar.

Onlar ticarət və bank, yaxud hakimiyyət və təhlükəsizlik orqanlarında işə, riyaziyyat və fizikaya, pedaqogika və ya elmi-tədqiqat işinə - bir sözlə təşkilatçılıq və planlaşdırma lazım olan hər yerə meyl göstərirlər.

Məktəbdə əlaçı şagird olduqları kimi, işdə də yaxşı icraçıdırlar. Erkən yaşlardan müxtəlif disput və müzakirələrə həvəs göstərir. Valideynlər onların uşaq yaşlarındakı meyllərini nəzərə alıb buna uyğun sənət sahəsində işləməsinə imkan verməlidirlər, xüsusən, əgər bu sahə ədəbiyyat və incəsənət, tətbiqi elm və ya peşə olsa. Onlarla ünsiyyət yaratmaq üçün nəzakət, yumşaq rəftar, mehribanlıq gərəkdir. Onların rəğbətini qazansan sənə hörmət və səxavət göstərəcəklər. Amma təhqiri yaddan çıxarmır və bağışlamırlar, çünki kinli və qisasçıdırlar.

Uşaq və yeniyetmə yaşlarında, həmçinin gənclik və yetkinlik illərində təhlükəli xəstəliklər, əməliyyatlarla, yaxud da bədbəxt hadisələrlə üzləşə və bədən xəsarəti ala bilərlər. Bundan başqa, doğma evdə onları heç bir xoşbəxtlik gözləmir.

Onların bədəninin ən zəif yerləri mədə-bağırsaq, döş qəfəsi, 12 bağırsaq vəzi və kor bağırsaq, mədəaltı vəzi, böyrək, öd kisəsi və əsəb sistemidir.

Xəstəlikləri: nevrasteniya, nevralgiya, qızdırma və soyuqdəymə, müxtəlif maniya və fobiyalar, sayıqlama və psixoz. Həmçinin epilepsiya, yaddaşın xarab olması və nitqin itməsi.

23 sentyabr- 23 oktyabr arasında doğulan uşaqların xarakteri

Bu ayda doğulanlar da TƏRƏZİlərdi. TƏRƏZİ bürcü altında doğulanlar sülhsevər, sakit və səmimi olur, mübahisə və dava-dalaşı sevmirlər. Həssasdırlar, başqalarının qəminə həmişə şərik olurlar. Dostcanlı, hamıya qaynayıb-qarışan, nəzakətli və mehriban, olduqca səliqə-sahmanlıdırlar. TƏRƏZİ nəinki münaqişədən qaçır, həm də ixtilafları aradan qaldırmağa, ziddiyyətləri həll etməyə çalışır. Bir sözlə, hər şeyi tərəziyə qoyub çəkmək, tarazlıq yaratmaq istəyirlər.

TƏRƏZİlər hiyləgər və kələkbaz olur, tükü tükdən seçir, diplomatik qabiliyyət, idealist dünyagörüşü də onlara xasdır, fiziki əməyi sevmirlər.

Romantik olaraq xasiyyətlərində sevgi, vurğunluq var. Cazibədar və məlahətlidirlər.

Yeniyetmə və gənclik illərində şöhrətpərəstliyə olan meyli illər keçdikcə TƏRƏZİni daha çox mübtəla edir. Evdə, ailədə, məktəbdə olduğu kimi, həyatda da həmişə gərginlikdən, yorğunluqdan qaçır. Tərif, alqış onları xoşbəxt eləyir. Əvvəllər zinət və dəbdəbəyə olan meylləri valideynlərini sevindirsə də sonralar bu onları məyus edir, çünki bunlar böyük xərc tələb edir.

TƏRƏZİ gözəlliyi, harmoniyanı erkən yaşlardan hiss edir. Gözəl zövqü var, amma bər-bəzəyi, zinətə həddən artıq aludədir. Fiziki və mənəvi cəhətdən həmişə inkişafdadır, üstəlik hər şeyə tez uyğunlaşa bildiyindən səhnənin şöhrət yolu onun üçün açıqdır. Uşaqlıqdan səhnəyə, teatr sənətinə olan sevgi və marağı sonralar TƏRƏZİyə uğur və şöhrət gətirir, illər keçdikcə ona pərəstiş edirlər.

TƏRƏZİlər, bir qayda olaraq həm fiziki, həm də mənəvi cəhətdən istedadlı olurlar. Amma valideynlər onların qabiliyyət və meyllərini görüb inkişaf etdirməlidirlər, həm də bu nə qədər vaxtında olsa bir o qədər yaxşıdır. Çünki ilk təəssürat belə uşaqlarda hər şeyi dəyişə bilir - öz gücünə və imkanlarına inamsızlıq həmişə bunların yol yoldaşıdır. Yalnız güclü, etibarlı bir dost və yoldaş sayəsində onlar bu inamsızlıqdan qurtula bilərlər, belə bir həmfikir isə ata-ana, bacı-qardaş, məktəb və institut yoldaşları, ər-arvad, iş partnyoru ola bilər. Ağlına və istedadına, idealist və romantik xasiyyətinə rəğmən TƏRƏZİlər az praktikdir. Onlar nəzəriyyəçidir, real həyat təcrübəsindən uzaqdırlar. Belə uşaqlarla sakit və nəzakətlə danışın, səsinizi qaldırmayın, onlara tərəf-müqabil kimi yanaşsanız, bu onlarda yalnız rəğbət oyadar.

Onlarda minnətdarlıq hissi çox inkişaf etmişdir, yaxşılığı heç vaxt unutmurlar.

Baxmayaraq ki, belə uşaqların şöhrətpərəst böyüməsi, yaltaqlanmaq bacarığı, yüngül həyata meyl etməsi, qayğısızlığı sizi məyus edir, gələcəkdə məhz bu keyfiyyətləri sayəsində onlar müəyyən sosial və maddi təminat qazana bilirlər. Unutmaq lazım deyil ki, yaltaqlıq onların özlərinə həmişə gərək olsa da, bir qayda olaraq başqalarının onlara yaltaqlanmasından xoşlanmırlar. Xüsusən ədalətsizliyə dözmürlər.

Təkrar edirik, ilk təəssürat, ilk görüş onlara çox bərk təsir edir, onlar bu təəssüratdan uzun zaman qurtula bilmirlər.

Bir şeyi də nəzərə almaq lazımdır: TƏRƏZİlər birgə işləməyə, şərikli müəllifliyə, əməkdaşlığa böyük əhəmiyyət verirlər.

TƏRƏZİlərin orqanizmində ən zəif yerlər: qasıq nahiyəsi, uşaqlıq yolu (matka), sidik kisəsi, habelə böyrəklər, bud və baldırlar, göbək, dəri, onurğa sütunu və vena damarları.

Ədalət.- 2011.- 19 mart.- S. 14.