BİR GÜNƏŞ İŞIĞI...

... Bu torpağa, bu yurda, bu gözəlliyə baxanda ondan kimsə doya bilməz. Ən azından ona görə ki, hər tərəfi əsrarəngiz gözəlliklə əhatə olunmuş bu yurda yaz qeyri-adi bir gözəllik gətirir. Bu gözəlliyi isə duymamaq, görməmək və hiss etməmək mümkün deyil. Füzulinin yazı daha gözəl olur. Bilmirəm başqa yerlərdə yaz insanlara necə təsir edir, amma bir onu bilirəm ki, bu yurdun yazda çiçəklərinin, güllərinin, çəmənlərinin ətri çox qeyri-adidir. Bu qeyri-adilik onunla bağlıdır ki, Qarabağ torpağının bütün fəsilləri gözəl olur. Havası, torpağı, suyu kimi, onun hər fəslinin öz rəngi, öz çaları, öz ətri var.

Yasəmən ətri...

Çox qəribədir ki, bütün çiçəklərin ətri gözəl olsa da, yasəmənin qoxusu və ətri insanı daha çox özünə çəkir. Füzuli rayon icra başçısının qəbulunda olanda köməkçi, şöbə müdiri və mənim vaxtı ilə müəllimim olmuş gözəl insan, istedadlı yazar Məcnun Namazəliyevdən soruşdu ki, otaqda hansı gülün ətrini hiss edirsən? Təbii ki, otaqda heç bir gül yox idi. Ancaq qəbul otağının pəncərəsi açıq idi. Biz hər ikimiz bir qədər duruxduq, heç bir şey deyə bilmədik. Köməkçi yenidən fikrini davam etdirib dedi:

- Yasəmənin ətrini hiss etmirsiniz?!..

Doğrudan da otaqda yasəmən ətri duyulurdu. Çöldəki güllərin, çiçəklərin və ağacların ətri otağa dolmuşdu. Əlbəttə, hər bir gözəlliyin, hər bir çiçəyinin öz rəngi, öz ətri var. Bu ətir təbii ki, insanlara daha gözəl ovqat, xoş əhval-ruhiyyə və nikbinlik bəxş edir. Elə bu nikbinliyi hər bir füzulilinin çöhrəsində hiss etmək olurdu. Hiss etmək olurdu ki, yazın gəlişi ilə hər tərəf yaşıl dona büründüyü kimi, insanların da ürəyində böyük ümidlər və arzular göyərir...

Ümidlər göyərdi...

Son illər Füzulidə regionların sosial-iqtisadi inkişafına dair Dövlət Proqramına (2009-2013-cü illər) uyğun olaraq çox böyük tikinti, quruculuq və abadlıq işləri görülüb. 1993-cü ilin yanvarında Füzulinin 22 kəndi və Horadiz şəhəri işğaldan azad edildi. Elə həmin vaxtdan da rayonda böyük abadlıq və quruculuq işlərinə önəm verilib. Çünki ölkə prezidenti İlham Əliyev füzulilərə həmişə böyük hörmətlə yanaşıb və onlara əvəzsiz qayğı göstərib. Qısa zaman kəsiyində rayonun erməni işğalçıları tərəfindən çox sayda dağıdılmış sosial obyektləri, məktəbləri, xəstəxanaları, uşaq bağçaları və yaşayış binaları yenidən bərpa edilib. Yəni əvvəllər kimin yolu bu yurda düşsəydi, müharibənin ağır fəsadlarını görə bilərdi. Hər yanda yanmış evlər, külə dönmüş binalar, dağılmış yaşayış məntəqələrini görmək olardı. Amma zaman keçdikcə, erməni işğalçılarının vurduğu bu yaralar sağalmağa başladı. Əhali dədə-baba yurduna, öz el-obasına dönəndən sonra isti ocağının, yurd yerinin qədrini bir daha dərindən anladı. Ona görə də camaat qolunu çırmalayıb öz ev-eşiyini təmir etməklə yanaşı, əkin-biçin işlərinə başladı. Təbii ki, dövlətin, hökumətin və öncə ölkə prezidenti İlham Əliyevin qayğısı ilə bərpa işlərinə start verildi. Bu işlərdə Füzuli camaatı dövlətə arxalandığı kimi, özləri də yaxından iştirak elədi...

Camaat çörək qazanmağın yolunu tapdı

Əlbəttə, hər bir tikilən tikili insanların rahatlığı üçündür. Çətin anlar yaşamış Füzuli camaatı üçün də qısa zaman kəsiyində yeni yaşayış qəsəbələri -"Qayğı", "Zobucuq" və yeni tikililər inşa edildi. Bu yeni qəsəbələrdə on minlərlə insan məskunlaşdı və həyat zaman-zaman öz axarına düşməyə başladı. İnsanlar görəndə ki, onların rifahı üçün yaşayışı naminə çox işlər görülür, istər-istəməz həmin adamlar da bu quruculuq işlərinə təkan verməyə başladılar. Vaxtı ilə böyük təsərrüfata və iqtisadi gücə malik olan Füzuli yenidən dirçəlməyə başladı və inkişaf etdi. Aydındır ki, hər bir rayonun iqtisadiyyatında, kənd təsərrüfatında irəliləyiş olanda onun sakinləri də firavan dolanır. Elə Füzuli camaatı da alın təri tökməyin və zəhmət çəkməyin nə olduğunu yaxşı bilir. Bir vaxtlar başqalarına ehtiyacı olan adamlar illər ötdükcə heç kimdən asılı qalmadılar. Onlar həm özləri əkin-biçin işləri ilə məşğul oldular, həm də təsərrüfatlarda yetişdirdikləri məhsullarla üz ağartdılar. Yəni bu insanların dolanışığı yaxşılaşdı və rifah halı yüksəldi.

Mavi qazın sevinci...

Bayaq dediyimiz kimi, Füzulinin qısa zaman kəsiyində sürətli inkişafı üçün çox böyük layihələr həyata keçirildi. Yəni rayonun qazlaşdırılmasından tutmuş digər sahələrinə qədər bütün problemlər önə çəkildi. Az bir müddətdə Horadiz şəhərinə, eləcə də Kərimbəyli, Böyük Bəhmənli və Şükürbəyli kəndlərinə qaz çəkilişi başa çatdırılıb. Təbii qazın sərhəd bölgəsinə gedib çıxması o qədər də asan məsələ deyil. Bu bilavasitə ölkə prezidentinin cəbhə bölgəsində yaşayan insanlara olan böyük diqqətidir. Mavi qaz yaşayış məntəqələrinə veriləndən sonra insanların həyat və məişət şəraiti bir qədər də yaxşılaşıb. Yəni əvvəllər adamlar qışda sobalarda yandırmağa odun və digər yanacaqlar axtarırdılarsa və bunu da çətinliklə tapıb qızınırdılarsa, indi təbii ki, onlar daha rahat yaşayırlar. Mavi qaz olan yerdə həyat daha qaynar, daha dolğun və daha rahat olur. Ona görə də evlərinə mavi qazın gəldiyini görən insanların sevincinin həddi-hüdudu yoxdur...

Yeni tikililər...

Ümumiyyətlə, Füzulidə son vaxtlar böyük tikililər inşa edilib. Təbii ki, onlar rayonun yeni tikililərinə əlavə edilməklə yaşayış məntəqələrinə bir gözəllik gətirib. Əlbəttə, bu tikililərin və yeni sosial obyektlərin istifadəyə verilməsi elə ilk növbədə insanların problemlərinin çözülməsinə xidmət edir. Öz möhtəşəmliyi ilə seçilən Olimpia İdman Kompleksi, Muğam Mərkəzi, Füzuli Tibb Mərkəzi bu deyilənlərə əyani misaldır. Həmin tikililərin istifadəyə verilməsi ilə Füzulidə həyat daha da canlanıb, insanların yaşamaq, mübarizə aparmaq və işləmək həvəsləri birə-beş artıb. Düzdür, bəzən gecələr yaşayış məntəqələrində atəş səsləri eşidilir, ancaq artıq buna füzulilər alışıblar. Ermənilərin tez-tez atəşkəsi pozması bu adamları o qədər də narahat etmir. Onlar deyirlər ki, onsuz da biz bu cür atəş səslərinə öyrəşmişik. Nəinki biz, uşaqlarımız da buna alışıblar. "İt hürər, karvan keçər" deyimi burada yada düşür. Burada yada düşən həm də o olur ki, insanlar öz yurd yerlərinə daha ürəkdən və daha dərindən bağlanıblar. Bu torpağa, bu yurda bağlanan insanları isə heç bir atəşkəs, heç bir erməni qüvvəsi qorxuda bilməz. Ən azından ona görə ki, Füzuli camaatının arxasında çox qüdrətli bir Azərbaycan dövləti və onun Prezidenti durub.

Bir yaz havası...

Yazımın əvvəlində qeyd etmişdim ki, Füzulinin yazı, baharı, gülü-çiçəyi və ormanları çox gözəldir. Rayonda heç harada olmayan yaz havası hiss olunur. Güllərin, çiçəklərin ətrindən doymaq olmur. Bu təbiətin bəxş etdiyi bir gözəllikdir. Amma bu gün Füzulinin siyasi həyatında da yeni bir ab-hava hiss olunur. Alı Alıyev ölkə prezidentinin sərəncamı ilə Füzuli rayonuna icra başçısı təyin olunandan sonra burada ab-hava da dəyişib. Yəni işə yaradıcılıqla yanaşmaqdan tutmuş, insanlara münasibətə qədər hər şeydə bir yenilik hiss olunur. Hiss olunur ki, ab-hava dəyişib, tələbkarlıq bir az da artıb və insanlar arasında xoş ovqat yaranıb. Alı Alıyev uzun müddət müxtəlif məsul vəzifələrdə çalışıb. Rayonun camaatını və insanları yaxşı tanıyır. Elə ilk gündən də camaata sarı addım atıb, əl uzadıb...

(Ardı var)

Faiq QİSMƏTOĞLU

Ədalət.- 2011.- 17-18 may.- S. 7.