BİR GÜNƏŞ İŞIĞI...

(Əvvəli ötən sayımızda)

Camaat başçının təşəbbüsünə qahmar çıxdı

Təbii ki, xalqa doğru atılan addıma müsbət də reaksiya verilməli idi. Rayon icra hakimiyyətinin başçısı Alı Alıyevin kəndlərə gedib camaatla görüşməsi və onlarla səmimi söhbət etməsi qaldırılan problemlərin həllini asanlaşdırdı. Yəni Alı müəllimin rayonun Kərimbəyli, Aşağı Yağlıvənd, Böyük Bəhmənli, Bala Bəhmənli, Araz Dilağarda, Araz Zərgər, Əhmədbəyli, İkinci Mahmudlu, Qarabağ, Murtuzalılar, Şükürbəyli kəndlərində və eləcə də Horadiz şəhərində əhali ilə keçirdiyi səyyar qəbullar səmimi münasibətin açarı idi. Elə hər şey də səmimiyyətdən yaranır. Alı müəllim öz təşəbbüsü ilə bağlı və eləcə də rayonda yeni layihələr ilə əlaqədar fikirlərini camaata söyləyəndə görüşdə iştirak edən insanlar ona qahmar çıxdı, dəstək verdi. Dedilər ki, əgər siz bizə qarşı bu qədər diqqət göstərib, böyük işlərə imza atmaq istəyirsinizsə, biz də sizin arxanızdayıq...

YAŞIL İZLƏR...

... Rayonun girəcəyindən hiss olunur ki, yeni bir ab-hava və ruh yüksəkliyi var. Yolların kənarındakı kol-koslar təmizlənib və onların yerində minlərlə müxtəlif ağaclar əkilib. O, ağaclar ki, bir neçə ildən sonra onlar yaşıllıqlar zolağı yaradacaq və bu yurdu daha da gözəlləşdirəcəkdir. Yaşıl ağacların isə qurumuş budaqları daranıb, gövdələri əhənglənib. Bunu da o məqsədlə ediblər ki, ağacları qurd yeməsin və inkişafdan dayanmasın.

Yol boyu yeni əkilmiş müxtəlif növ ağaclara baxanda adamın ürəyi dağa dönür. Sanki "yaşıl izlər"dən yeni bir dünya yaratmaq istəyirlər. Həmin ağaclar rayonun girəcəyindən düz Horadiz şəhərinə qədər magistral yolun sol və sağ hissəsində əkilib. Artıq o ağaclar yaxşı bitdiyinə görə, yarpaqlayıblar da. Bundan da gözəl nə ola bilər?! Axı biz uzun müddət yaşıllıqlara, ağaclara qənim kəsilmişik. Elə ona görə də havamız, təbiətimiz pis günə düşüb. Demək olar ki, Horadiz şəhərində və eləcə də əksər kəndlərdə böyük abadlıq, quruculuq işləri görülür. Hara baxırsan orda insanlar əllərində bel nəsə iş görürlər. Rayonun baş yolu və Horadiz şəhərinə uzanan yol da tamamilə düzəldilib. Yəni bu yolla hərəkət edəndə heç bir çətinliklə və problemə rastlaşmırsan.

YENİ LAYİHƏLƏRDƏ NƏLƏR OLACAQ?!

Füzulidə böyük tikintilərin və quruculuq işlərinin həyata keçirilməsi üçün yeni layihələr hazırlanıb. Bu layihə əsasında rayonda qeyri-adi tikinti və yenidənqurma işləri görüləcək. İlk növbədə Horadiz şəhərinin yenidənqurulması nəzərdə tutulub. Belə ki, həmin layihəyə əsasən şəhərin kanalizasiya, içməli su, istilik sistemi, elektrik təsərrüfatı, küçələri, daxili yolları tam bərpa ediləcək. Bununla yanaşı, Horadizdə işğal dövründə yandırılmış iki uşaq bağçasının, səkkizillik məktəbin, kompüterləşdirilmiş mərkəzi kitabxananın, kollec üçün yeni binanın, poliklinikanın, 2 nömrəli orta məktəbin əsaslı bərpası, Heydər Əliyevin adını daşıyacaq yeni parkın inşası və avtovağzalın tikintisi nəzərdə tutulub. Hələ bunlar da görüləcək işin hamısı deyil.

Eyni zamanda rayon ərazisində 100 çarpayılıq müasir xəstəxananın tikintisi və dünya standartlarına cavab verən rabitə sisteminin yenidən qurulması planlaşdırılıb. Şəhərin yenidənqurulması ilə yanaşı, Məcburi Köçkünlərin Sosial İnkişaf Fondu rayonun Bala Bəhmənli, Araz Dilağarda, Araz Zərgər, Birinci Mahmudlu kəndlərinin daxili və kəndarası yollarını bərpa edəcəkdir. Eyni zamanda ərazidə iri broyler fabriki tikmək, içməli su məqsədi ilə 6 yerdə artezian quyusu vurmaq, Əhmədbəyli və Araz Dilağarda kəndlərində uşaq bağçaları tikmək, Araz Zərgər kənd məktəbinin binasında bərpa işlərini görmək nəzərdə tutulub. Tarixi və mədəni abidələrin də bərpası nəzərdən qaçmayacaq. Bu yaxınlarda Babi kəndindəki XIII əsr Şeyx Babi türbəsinin bərpasına başlanılacaq. Həmçinin Əhmədalılar kəndindəki XIII əsr Arqalı türbəsinin də bərpası planlaşdırılıb...

İŞ ADAMLARI FÜZULİLƏRƏ ARXA DURUR

Yazımızda qeyd eləmişdik ki, böyük quruculuq işləri ilə bağlı rayon icra hakimiyyətinin başçısı həm camaata, həm də Füzulidən kənarda yaşayan insanlara müraciət eləmişdi. O, müraciətində demişdi ki, hər bir adam gəlib Füzulidə gedən quruculuq, abadlıq işlərinə kömək göstərə bilər. Füzuli camaatı kimi kənarda yaşayan füzulili iş adamları da Alı müəllimin bu təşəbbüsünü dəstəkləyiblər. Belə ki, Aybasanlı kəndindən olan iş adamı Nəriman Əliyev, Mollaməhərrəmli kəndindən olan Xaləddin Hüseynov, Horadiz şəhərində böyüyüb, boya-başa çatan və indi Moskvada yaşayan Məcnun Mehdiyev görülən işlərə təmənnasız yardım edəcəklərini bildiriblər. Onlar həm rayonda quruculuq, abadlıq işlərinə kömək edəcək, həm də yeni iş yerlərinin açılmasına yardım göstərəcəklər. İş adamı Nəriman Əliyev Kərimbəyli kəndinin yaxınlığında hər cür şəraiti olan "Ailəvi" istirahət mərkəzinin, Məcnun Mehdiyev Horadiz şəhərində uşaq istirahət guşəsinin tikintisini, Xaləddin Hüseynov isə ərazinin yaşıllaşdırılmasına dəstək verəcəklərini bildiriblər. Təbii ki, bu cür təşəbbüslərin reallaşması yaxın gələcəkdə Füzulinin daha da gözəlləşməsinə və abadlaşmasına xidmət edəcəkdir. Bundan isə qazanan son nəticədə el-oba, camaat olacaq...

YENİ OTEL...

Aydındır ki, indi tək Bakıda və eləcə də digər şəhərlərdə deyil, regionlarda da dünya standartlarına cavab verə biləcək otellər inşa edilir. Axı o da sirr deyil ki, 2011-ci il ölkə başçısı tərəfindən "Turizm ili" elan edilib. Elə buna görə də turizmi inkişaf etdirmək məqsədi ilə yeni istirahət mərkəzlərinin tikintisi və otelin istifadəyə verilməsi mühüm əhəmiyyət kəsb edir. Heç kimin ağlına gələ bilməz ki, Füzulidə nə vaxtsa doqquzmərtəbəli dörd ulduzlu otel olacaq. Amma bu zaman-zaman gerçəkləşəcək. Ən azından ona görə ki, regionların sosial-iqtisadi inkişafına dair Dövlət Proqramında bu məsələlər nəzərdə tutulub. Doqquzmərtəbəli otellə yanaşı, Füzulidə bir neçə istirahət mərkəzinin bayaq dediyimiz kimi, inşası da planlaşdırılıb. Bununla yanaşı, mədəniyyət sahəsinin inkişafına da xüsusi önəm yetiriləcək. Çünki Füzuli mədəniyyətin beşiyi sayılır. Yəni burda Muğam Mərkəzi olduğu kimi, Dövlət Dram Teatrının da tikilməsi gözlənilir. Hər bir tikintinin inşa olunması və istifadəyə verilməsi insanların böyük sevincinə, fərəhinə səbəb olur.

İŞIĞA GEDƏN YOL...

Burda yaz səhərinin və yaz günəşinin özgə bir gözəlliyi var. Səhər saat 6-da yuxudan qalxanda otun və çəmənliyin üstündə yaz şehini görmək olar. Adətən həkimlər deyir ki, səhər saatlarında şeh qurumamış çəmənliyin üstündə ayaqyalın gəzmək insana şəfa verir. Mən də ağrıyan adam olduğuma görə, səhər saat 6-da yuxudan qalxıb Bəhmənlidəki evimizdən həyətə düşdüm. Çəmənliyin üstünü şeh almışdı. Ayaqyalın bir neçə metr çəmənliklə gedib güllərin açdığı yerə çatdım. Burda qızılgülün ləçəklərinin üstünə hopmuş şehi gördüm. Özümü saxlaya bilməyib qızılgülün birini dərmək istədim. Amma ürəyim gəlmədi. Elə gülün tikanlı yerindən tutub iylədim. Sanki cənnətin qoxusunu, gözəlliyini hiss elədim. Çünki bu gülün ətri o qədər xoş və o qədər gözəl idi ki, bir anın içində özümü yüngül hiss elədim və içimdəki ağrı-acı əriyib getdi. Bir azdan isə üfüqdən günəş doğdu. Günəşin şəfəqləri altında qızılgülün üstündəki şeh bərq vurur, sanki adama gəl-gəl deyirdi.

... Yaz nə qədər gözəl idisə, günəş şəfəqlərinin qızılgülün üstünə düşməsi və onu rənglərə boyaması da bir o qədər gözəl idi. Günəşlə qızılgül arasında sanki bir yaxınlıq, bir doğmalıq yaranmışdı. Bu işığa doğru gedən yol idi. Qoy hamının yolu və eləcə də füzulilərin yolu həmişə işığa doğru getsin...

Faiq QİSMƏTOĞLU

Ədalət.- 2011.- 18 may.- S. 7.