GÖZ OXŞAYIB, KÖNÜL AÇAN TOVUZ

Azərbaycanın bu dilbər guşəsində saz-sözlə yanaşı, iqtisadi inkişaf da ruhu oxşayır

(əvvəli ötən sayımızda)

Bu gün Tovuzda hər bir kəs öz həyətyanı təsərrüfatı ilə yanaşı, həm də mövcud qurumlarda, eləcə də sahibkarlara məxsus təsərrüfatlarda da çalışmaqla həm özlərini, həm də rayonun iqtisadi gücünün artırılmasına köməklik göstərirlər.

Təbii ki, insanlara dövlət dəstəyi, dövlət qayğısı olanda, onlar öz işlərini bir az da ürəklə görür və son nəticənin uğurlu olacağına daha çox inanırlar. Həmin inamın artırılmasında Sahibkarlığa Kömək Milli Fondunun dəstəyi də xüsusi qeyd edilməlidir. Azərbaycan prezidenti İlham Əliyev cənabları bu ilin aprel ayının 12-də Nazirlər Kabinetinin 2011-ci ilin I rübünün sosial-iqtisadi inkişafına həsr olunmuş iclasında bildirmişdi ki, "ölkədə aparılan quruculuq işləri, iqtisadi islahatlar, sosial proqramlar bizə çox böyük imkanlar verir. Bütün regionların sosial-iqtisadi inkişaf proqramı uğurla inkişaf etdirilir. Bu ilin I rübündə nəzərdə tutulmuş investisiya layihələri vaxtında həllini tapıb. Birinci 3 ayda regionlarda təxminən 17 min yeni iş yeri açılmışdır, bu proses davam edir".

Bəli, bu gün Tovuzda da həyatın bütün sahələri Azərbaycan prezidentinin dediyi kimi, yüksələn xətt üzrə inkişafdadır. Bu inkişafın göstəricilərini ayrı-ayrı sahələr üzrə nəzərdən keçirərkən kənd təsərrüfatı ilə yanaşı, tikinti, səhiyyə, təhsil və digər sahələrin də uğurlarını görməmək mümkün deyil.

Tikinti meydanları

Bu gün Tovuzda tikinti-abadlıq işləri də böyük sürətlə aparılır. Demək olar ki, rayonun elə bir kəndi, qəsəbəsi, məhəlləsi yoxdur ki, orada təmir-tikinti, abadlıq işləri görülməsin. Təbii ki, bunlar da xüsusi proqrama uyğun olaraq həyata keçirilir. Məhz həmin proqramın tərkib hissəsi kimi ötən il rayonda tutumu 2000 ton olan soyuducu və tutumu 10 min ton olan taxıl anbarı tikilib istifadəyə verilmişdi. Həmçinin rayonun Qaraxanlı kəndində 15 min başlıq quşçuluq binası, Xatınlı kəndində 50 tonluq soyuducu, 80 çarpayılıq rayon mərkəzi xəstəxanasının Axınça çayı üzərində avtomobil körpüsünün və digər obyektlərin də tikintisi sürətlə davam etdirilir.

Onu da qeyd etmək lazımdır ki, Tovuz rayonunun bir neçə kəndi düşmənlə sərhəd bölgəsində yerləşir. Ona görə də cəbhə xəttində olan bu yerlərə xüsusi diqqət yetirmək, buranın strateji əhəmiyyətini dəyərləndirmək xüsusilə vacibdir. Məhz bu səbəbdən rayon rəhbərliyinin əsas məqsədi də Qoşa və Qaralar kəndləri arasındakı 194 km yolun bərpası, həmçinin həmin ərazidə 3 avtomobil körpüsünün tikintisi və 9-nun əsaslı təmirini də başa çatdırmaqdı. Ümumiyyətlə, bu gün Tovuzun və bütövlükdə bu bölgənin həyatında əhəmiyyətli rol oynayan yol tikintisi xüsusi diqqət mərkəzindədir. Elə 2009-cu ilin oktyabr ayının 7-də Azərbaycan prezidentinin "Tovuz rayonunun sosial-iqtisadi inkişafının sürətləndirilməsinə dair əlavə tədbirlər haqqında" sərəncamı ilə rayonun inkişafı üçün müəyyən əlavə vəsaitlər ayrılmış və bunun sayəsində də böyük işlər görülmüş və görülməkdədir. Elə Tovuz-Qovlaq-Ağbaşlar, həmçinin Tovuz-Böyük Qışlaq-Qaralar yollarının yenidən qurulması dediklərimizi sübut edir.

Bu il Tovuz şəhərinin yaranmasının 65 yaşı tamam olur. Artıq Tovuz şəhərinin giriş qapısının tikintisi tamamlanmış və şəhərdə yenilikləri əks etdirən kifayət qədər işlər görülmüşdür.

Təhsil, səhiyyə, sosial həyat

Bu gün Tovuzda elektrik enerjisi, qaz, su təchizatı məsələsi demək olar ki, hər an diqqətdə saxlanılan məsələlər sırasındadır. Elə bu səbəbdəndir ki, əhali elektrik enerjisi ilə fasiləsiz təmin olunur. O ki, qaldı qaz, su məsələlərinə, bununla rayon icra başçısı yanında yaradılmış xüsusi qərargah məşğul olur. Nəticədə mövcud problemlərin aradan qaldırılması işi də sürətlənibdir. Hazırda rayonda əhalinin müəyyən təbəqəsinə, yəni 2600 ailəyə ayda 2060 min manatdan çox ünvanlı sosial yardım verilir.

Təhsil sistemi də Tovuz rayonunda bütün dönəmlərdə diqqəti çəkən sahə olmuşdu. Bu gün də belədi. Artıq rayonda xeyli sayda məktəb binaları tikilmiş, təmir edilmiş, onların böyük əksəriyyəti də kompüterləşdirilmişdir. Demək olar ki, indi rayonda hər 29 şagirdə bir kompüter düşür. Artıq rayonda 7 məktəb mərkəzləşmiş internet şəbəkəsinə qoşulmuşdur. Ötən dərs ilinin yekunlarına görə, ali məktəblərə qəbul olunan tovuzluların sayı 5 faiz artmışdır. 600-dən yuxarı bal toplayanların sayı 2 dəfə, 500-dən yuxarı bal toplayanların sayı isə daha çox artmışdı. Bu da rayonda təhsilə göstərilən qayğının bariz nümunəsidir. O ki, qaldı səhiyyəyə, bu istiqamətdə də köklü işlər görülür. Yararsız xəstəxana binaları yeniləri ilə əvəzlənir, əsaslı təmir işləri aparılır, müasir avadanlıqlarla təmin edilir. Yəni Tovuzda sağlamlığa demək olar ki, həm respublika səviyyəsində, həm də rayon səviyyəsində diqqət göstərilir. Bu ilin yanvar ayının 9-da Azərbaycan prezidentinin şəxsi təşəbbüsü ilə burada Olimpiya İdman Kompleksi istifadəyə verilmişdir. Bu da gənclərin idmana olan marağını təmin etmək istiqamətində atılan ən uğurlu addımlardan biridir.

Bəli, bu gün Tovuz inkişaf edir, yeniləşir, abadlaşır, burada işsizliyin aradan qaldırılması üçün zəruri tədbirlər həyata keçirilir. Sözə, sənətə, mədəniyyətə xüsusi diqqətlə yanaşılır. Azərbaycan prezidenti İlham Əliyev cənablarının dediyi kimi, "bu gün hər bir bölgədə inkişaf var. Ən önəmlisi ondan ibarətdir ki, bu inkişaf davamlıdır".

O davamlı inkişafı və müstəqilliyimizin real təntənəsinin bariz nümunəsini Tovuza yolu düşən hər kəs öz gözləri ilə görə bilər.

Ceyhun Rüstəmov

Ədalət.- 2011.- 4 may.- S. 7.