RƏHMƏT SƏNƏ MƏMMƏD ARAZ

Qəlb dayandı, susdu qələm,

Bu kədərdən yandı aləm.

Qəm çiləyən bir ələməm,

Könüllərdən gəlir avaz

Sularınla Xəzərə yaz:

Dönəcəkmi Məmməd, Araz?

Əsərlərin min çələngdir,

Qələminsə şir, pələngdir.

Tarix özü bir ələkdir,

Şairləri saxlar az-az,

Sularınla Xəzərə yaz:

Dönəcəkmi Məmməd, Araz?

Öz yolunu özün seçdin,

Sərt yolları dözüb keçdin,

Tər güləri üzüb keçdin,

Soldu çəmən, oldu bəyaz,

Sularınla Xəzərə yaz:

Dönəcəkmi Məmməd, Araz?

Qayalarda izin qaldı.

Nalə çəkdi, sözün qaldı.

Dünya yenə qalmaqaldı,

Ürəklərdə şaxta, ayaz

Sularınla Xəzərə yaz:

Dönəcəkmi Məmməd, Araz?

Sinəm üstə dağlar qoydun,

El-obanı ağlar qoydun,

Bu dünyadan nə tez doydun,

Hər oğuldan Məmməd olmaz,

Sularınla Xəzərə yaz:

Dönəcəkmi Məmməd, Araz?

OLMAZ

İnsan nəcib olsa

kökdən, binədən,

Əsla yalan deməz,

riyakar olmaz.

Uzaq olar iftiradan, fitnədən,

Ömür boyu el gözündə xar olmaz.

Kimdə varsa qeyrət,

etibar, vüqar,

Candan keçər,

verməz dosta ahu-zar.

Kişinin malını alsa ruzigar,

Sağlıq istər, heç vaxt

gözü dar olmaz.

Sail insan odur eşqi çox olsun,

Ürəyində kin-küdürət yox olsun,

Nəfsi bütöv olsun,

gözü tox olsun.

Tamahkarda, xəsis kəsdə

ar olmaz.

Firudin düşübdür fərh gümana,

Qoruyubdu haqqı hey yana-yana,

Əsla uymayıbdı şərə, şeytana,

Deyər ki, kişi kəs

tamahkar olmaz.

ATAR HEY

Adamlar içində hər cür adam var,

Kimi çirkablarda ölüb, batar hey.

Kimi yurd yolunda

canından keçər,

Kimi köçər, el-obasın atar hey.

Kimi həya bilməz, duymaz

ar nədir,

Kimi abır gözlər, güdməz

var nədir,

Kimi azad yaşar, bilməz

dar nədir,

Kimi məhbəslərdə

yatıb qalar hey.

Kimi paxıl olar, kimi səmimi,

Kiminin əyridi kökündən himi.

Kimi çox qudurar var tapan kimi,

Kimi də təmkinlə vara çatar hey.

Firudin, bu həyat oxlayar səni,

Ruzigar sınayar, yoxlayar səni.

Paksansa əbədi saxlayar səni,

Namərdi tarixdən silər, atar hey.

Firudin Süleymanoğlu

Ədalət.- 2011.- 4 may.- S. 7.