Səfər

Çoxdan arzu etdiyim bir səfər-Gürcüstan səfəri axır ki, reallaşdı. Bu reallığı biz qadın jurnalistlərə yaşatdığı üçün ilk öncə Azərbaycan Qadın Jurnalistlər Assosiasiyasının prezidenti, tədbirin təşkilatçısı Sevil Yusifovaya öz təşəkkürümüzü bildiririk.

Səfər çərçivəsində Gürcüstanın bir sıra bölgələrində olduq, qədimiliyi və müasirliyi ilə seçilən, yaşıllıqlar qoynunda olan Tiflisin görməli yerlərini gəzdik və ən nəhayət, soydaşlarımızın-azərbaycanlıların sıx yaşadığı Marneuli və Qardabani rayonlarının tələbə və məktəbliləri ilə görüşlər keçirtdik. Bu görüşlərdən hər birimiz xüsusi zövq aldıq. Çünki bizim onlara, onların isə bizlərə deyiləsi çox fikirlər, arzular oldu. Ən əsası, bu fikirlərin və arzuların reallığa çevrilməsi məqsədilə sonrakı dönəmlərdə konkret layihələrin həyata keçməsinin təməli qoyuldu.

Görüşlərdən, səmimi fikir mübadilələrindən məlum oldu ki, bölgədə yaşayan həmyerlilərimizə həm Gürcüstan, həm də Azərbaycan hökumətləri tərəfindən xüsusi diqqət və qayğı göstərilir. Belə ki, hər iki ölkə rəhbərlərinin-Azərbaycan prezidenti İlham Əliyev və Gürcüstan prezidenti Mixail Saakaşvilinin başçılığı altında azərbaycanlıların sosial problemlərinin həlli sahəsində görülən saysız-hesabsız işlər bütün sahələrdə özünü büruzə verir.

Səfərin ilk günü, may ayının 9-da biz jurnalist qadınlar Marneuli Gürcüstan Azərbaycanlıların Gənclər İttifaqının fəal gəncləri ilə görüşdük. Məlum oldu ki, əvvəlki illərə nisbətdə ali məktəbə qəbul olmaq istəyənlərin və qəbul olunanların sayı iki dəfədən çox artıb. Sözsüz ki, belə bir artım bölgədə təhsilin səviyyəsinin yüksəlməsinin nəticəsidir. Bu il təkcə Sadaxlı kənd məktəbinin 42 məzunundan 19-u ali məktəbə daxil olub. Ümumilikdə isə, ali məktəbə daxil olanların sayı ildən-ilə artır.

Öyrəndik ki, prezident Mixail Saakaşvili bütün rayonların ali məktəbə qəbul olmuş gəncləri ilə şəxsən görüşüb, onlara diqqət əlaməti olaraq, hər birinə kompyüter hədiyyə edib. Bundan başqa digər sosial məsələlərin həllinə də prezident biganə qalmır və hər xırda müraciəti belə diqqətdən yayındırmır. Məsələn, Gürcüstan Azərbaycanlıları Konqresinin yeni işıq üzü görən "Konqres" qəzetinə Mixail Saakaşvilinin təbrik teleqramı göndərməsini kiçik bir məsələyə böyük diqqətin nəticəsi kimi qiymətləndirmək olar.

Gənclər İttifaqının 200-dən çox üzvü, məktəblərdə müəllim kollektivləri, həmçinin şagirdlərlə və rayon camaatı ilə görüşdə təsdiq olundu ki, Azərbaycanın Gürcüstanda fəaliyyət göstərən Dövlət Neft Şirkətinin Gürcüstan nümayəndəliyi bölgədə yaşayan azərbaycanlıların əksər problemlərinin həllini öhdəsinə götürərək yerinə yetirir. Açığı bu cür fikirləri eşidəndə sevindik və əmin olduq ki, Gürcüstanda yaşayan azərbaycanlıların qayğısını çəkən, onlara hər cür yardım göstərməyi özünün başlıca vəzifəsi sayan "SOKAR" bundan sonra da soydaşlarımızın problemlərini çözəcək.

Qeyd edək ki, bu diqqət özünü hər sahədə göstərir. Məsələn, 12 minə yaxın əhalisi olan Sadaxlı kəndində xəstəxana təmir edilərək istifadəyə verilib, yeni tibb məntəqələri açılıb, Nazarlı, Kosalı kənd məktəbi, 100 yaşlı Alget kənd məktəbi təmir olunub, Kosalı, Nazarlı kənd məktəblərində idman kompleksləri tikilərək məktəblilərin ixtiyarına verilib, aztəminatlı ailələrdə tələbələrin təhsil haqqının ödənilməsinə yardım göstərilib və göstərilir, Marneuli Gənclər evinin binası alınaraq gənclərin ixtiyarına verilib, əksəriyyəti azərbaycanlılar yaşayan Rustavi şəhərində 1 hektar sahəni əhatə edən böyük bir park salınıb, maddi yardıma ehtiyacı olanlara diqqət və qayğı isə hər zaman olunur. O ki, qaldı mədəni-kütləvi tədbirlərin keçirilməsinə, bu məsələdə də "SOKAR"ın, Azərbaycan Dövlət Neft Şirkətinin Gürcüstanda yerləşən nümayəndəliyinin yüksək təşkilatçılığı və köməyi arzu olunacaq səviyyədə-yüksəkdir.

Onu da xüsusi olaraq vurğulamalıyam ki, "SOKAR"ın hər bir gördüyü iş soydaşlarımızda ruh yüksəkliyi yaradır. Onlar həm də bu şirkəti özlərinin Gürcüstandakı dayağı sayırlar. Təbii ki, "SOKAR"ın belə bir fəaliyyəti birbaşa Azərbaycan dövlət başçısının Gürcüstanda yaşayan soydaşlarımıza xüsusi diqqətinin nəticəsidir.

Bu cür təqdirə layiq diqqət və qayğı öz yerində, həm jurnalist qadınları, həm də Gürcüstanda yaşayan azərbaycanlıları haqlı olaraq narahat edən məsələlər də ortaya çıxdı.

Azərbaycanın Gürcüstandakı Neft Şirkəti nümayəndəliyinin fəaliyyətə başlaması ilə minlərlə azərbaycanlı gəncin işlə təmin olunmasına baxmayaraq, xüsusilə gənclər arasında hələ də işsizlik problemi qalır.

Jurnalistləri narahat eləyən digər problem isə, azərbaycanlı balaların gələcək intellektual inkişafı ilə bağlı olan bir məsələdir. Belə ki, təhsil müəssisələrində azərbaycanlı uşaqlara tədris proqramına əsasən yalnız Gürcüstan tarixi tədris olunur. Hətta tələbələrin əksəriyyətinin etiraflarına görə, onların Azərbaycan tarixindən belə xəbərləri yoxdur.

Gürcüstan azərbaycanlı Gənclər İttifaqının sədri Leyla Məmmədova deyir ki, mükəmməl, sadə dildə yazılmış, bizə tariximizi başa sala bilən Azərbaycan tarixi dərsliyi yoxdur ki, tariximizi öyrənə bilək": Elə gənclər var ki, Azərbaycandan bəzi kitablar alıb gətirir, amma o kitablarda da tarixin ayrı-ayrı əsrləri, illəri haqqında yazılıb deyə, tarixi ardıcıllıqla öyrənə bilmirik. Nəticədə də yenə tariximizdən məlumatsız oluruq. Bu, bir qrup gəncin yox, demək olar ki, bütün gənclərin istəyidir. Əlbəttə, bu gün tariximizi bilməməyimizi özümüzə ayıb sayırıq. İnternetlə də bunu öyrənmək mümkün deyil, çünki sadə dildə deyil, anlaşılmaz və qarışıq yazılıb. Biz tarixdə olan hadisələrə qiymət verə bilməsək, müasir dövrdə baş verən hadisələri düzgün qiymətləndirə bilmərik! Ümidvarıq ki, jurnalist qadınlar bizim istəyimizi Təhsil Nazirliyinə çatdıracaqlar".

Ali məktəb tələbəsi Elina Cəlilovanın sözlərinə görə, Azərbaycan tarixini şagird və tələbələr çox çətinliklə öyrənə bilir": Buna görə də tariximizi öyrənməyin daha asan yolu seçilməlidir".

Jurnalist qadınların bölgədə rastlaşdığı digər problem isə, orta məktəbdə təhsil alan şagirdlərin sayının yuxarı siniflərdə kəskin azalma fərqi oldu. Oğlan uşaqları əksər hallarda qazanc əldə etmək məqsədilə təhsildən yayınır, qızlar isə vəhşi bir psixologiyanın qurbanı olaraq, erkən yaşlarından nişanlanır, azyaşlı nigahlara məruz qalırlar. Təəssüf ki, bölgədə "qız uşağının ərə getməyi oxumasından vacibdir", kimi köhnə prinsip hələ də hökm sürür.

Gürcüstan Azərbaycanlıların Gənclər İttifaqının sədri Leyla Məmmədovanın fikrincə, erkən ailə qurmağın fəsadları ortaya çıxır ki, bu da əksər ailələrdə narazılığa, boşanmalara gətirib çıxarır. Ancaq ən pisi odur ki, belə nigahların sayı durmadan artır. Qızlar çox vaxt 15 yaşından nişanlanır və az müddətdən sonra ərə verilir. Bu irəli inteqrasiyaya deyil, geriyə, mövhumata aparan qaranlıq yoldur.

Jurnalist Qadınlar Assosiasiyasının prezidenti Sevil Yusifova həm dövlət, həm də qeyri-dövlət qurumları tərəfindən erkən nigah kimi dəhşətə son qoyulmasına, Gürcüstanda yaşayan balaca balalarımıza yardım edilməsinin vacibliyini qeyd etdi. O, problemin həllinə kömək məqsədilə maarifləndirmənin böyük əhəmiyyətini vurğulayaraq, valideynlər və şagirdlər arasında güclü təbliğat aparılmasını, məsələnin müvafiq qurumlar qarşısında qaldırılmasını, Assosiasiya tərəfindən layihənin hazırlanmasını və həyata keçirilməsini təklif etdi. Xanım Yusifova görüş zamanı soydaşlarımıza bildirdi ki, səfər çərçivəsində öyrəndik ki, Borçalı mahalında azərbaycanlıların uşaqlarını özündə birləşdirən bir uşaq təşkilatı yoxdur. "Bu təşkilatın yaranması üçün mütləq addımlar atılmalıdır". Gələcəyimiz məhz bu gün uşaqların formalaşmasından asılıdır.

Aysel

Ədalət.- 2011.- 26 may.- S. 4.