NUR ŞƏHƏRİNİN BU GÜNÜ

(əvvəli ötən sayımızda)

Son illər şəhərin təhsil, səhiyyə və mədəniyyət müəssisələrinin də inkişafı, maddi- texniki bazasının gücləndirilməsi diqqət mərkəzində olan məsələlərdəndir. Qeyd edək ki, keçən il ali məktəblərə daxil olan məzunlardan bir nəfər 700 bal, 29 nəfər isə 600 baldan yuxarı göstəriciyə nail olmuşdur.

"Yeniləşən Azərbaycana yeni məktəb" layihəsi çərçivəsində son 27 il ərzində Mingəçevirdə cəmi 6 məktəb binası tikilib, istifadəyə verilib. Hal-hazırda şəhərdə 19 məktəb fəaliyyət göstərir ki, onlar da ümumilikdə 356 ədəd müasir komputerlə təchiz edilmişdir. Şəhərin bütün sosial həyatında olduğu kimi səhiyyə müəssisələri də öz öhdələrinə düşən missiyanın öhdəsindən gəlməyə çalışmış, əhalinin sanitar-epidemioloji sağlamlığının qorunması, yoluxucu xəstəliklərin törədiciləri və xüsusi təhlükəli infeksion xəstəliklərə qarşı profilaktik tədbirlər görülmüşdür. Cari ildən etibarən şəhərin səhiyyə və təhsil müəssisələrinin istilik təchizatının yaxşılaşdırılması istiqamətində də işlərə start verilmişdir. Hazırda 4 məktəb, 2 səhiyyə obyekti, bir bağça və bir ali təhsil müəssisəsi istiliklə təmin olunur. Ötən müddətdə şəhərin mədəniyyət müəssisələri də bir sıra tarixi və əlamətdar günlərə həsr edilmiş ümumşəhər tədbirlərinin, yubileylərin, el bayramlarının daha rəngarəng keçirilməsinə çalışmış, şəhərin nümunəvi məhəllələrində və Heydər Əliyev meydanındakı səhnədə maraqlı konsert proqramları ilə çıxış ediblər. İndiyə qədər Mingəçevirdə əldə olunmuş bütün uğurlarda, görülmüş işlərdə onun zəhmətkeş sakinlərinin böyük əməyi var. Təsadüfi deyil ki, son iki ildə iki dəfə şəhərə səfər etmiş dövlət başçısı İlham Əliyev əldə olunan bütün uğurlarla yaxından tanış olmuş, öz diqqət və qayğısını onlardan əsirgəməyəcək şəhərin sosial-iqtisadi inkişafında xidmətləri olan 21 nəfəri, o cümlədən, 13 nəfəri "Tərəqqi" medalına, 3 nəfəri "Respublikanın əməkdar həkimi", 2 nəfəri "Respublikanın Əməkdar mühəndisi", 3 nəfəri "Əməkdar Mədəniyyət işçisi" fəxri adlarına layiq görüb. Son vaxtlar ölkəmizin hər bir regionunda inkişaf etdirilməsi vacib olan sahibkarlığın Mingəçevirdə də inkişafı üçün münbit şərait yaradılıb. Burada sahibkarlığın inkişafını şərtləndirən əsas fakt qeydiyyat prasedurların sadələşdirilməsi, yeni bank filiallarının açılması və əhaliyə verilən kreditlərin durmadan artması ilə bağlıdır. Bunun nəticəsidir ki, keçən il bu fəaliyyət üçün qeydiyyatdan keçən sahibkarların sayı 510 nəfər olub. Son 7 ildə onların fəaliyyəti üçün dövlət büdcəsindən 29 milyon manat kredit verilib. Sahibkarlığın inkişafı ilə bağlı Mingəçevirdə yeni müəssisələrin açılması da diqqət mərkəzində olub. Bunlardan 6-7 il əvvəl fəaliyyətə başlamış "Kür" Elektron Avadanlıqları İstehsalı və "İnterenerji" MMC, eləcə də uzun illər fəaliyyətsiz olan "Mingəçevir İzolit" ASC özəlləşdirildikdən sonra şəhərin indiyə qədər sabit və məhsuldar iş rejimində işləyən əsas sənaye müəssisələridir. Son vaxtlar fəaliyyətini bərpa edən "Azneftmaş" və "Mingəçevir maşınqayırma zavodu" ASC-lər həm sakinlərin işlə təmin olunmasında, həm də ölkənin idxal yönümlü sənaye məhsullarına olan tələbatının ödənilməsinə yardımçı olan sənaye müəssisələridir. Hal-hazırda Mingəçevirdə fəaliyyətdə olan digər müəssisələr də "Azəraqrartikinti" ATSC-nin Mingəçevir dəmir beton məmulatları filialı, "Mingəçevir Regenerat", "Zeynalabdin", "Kür çörək" ASC-lər də əvvəlki illərə nisbətən daha məhsuldar işləyib və əməkçilərinin orta aylıq əmək haqların 30-35 faiz yüksəlməsinə nail olublar. Bütün bu işlər isə öz müsbət nəticəsini göstərməkdədir. Belə ki, son 7 ildə ümumi məhsul buraxılışı 1,3 dəfə, özəl bölmədə sənaye məhsulu istehsalı isə 5,8 dəfə artmışdır.

Son illər Azərbaycanda turizm istiqamətində atılan məqsədyönlü addımların sayəsi nəticəsində bir çox regionlar turizm mərkəzinə çevrilməkdədir. Bu sahə üzrə bir çox uğurlar qazanmış Mingəçevir şəhəri artıq turizm mərkəzlərindəndir. Mingəçevir Kür çayının sağ və sol sahilini əhatə etdiyindən onun iqlimi və coğrafi mövqeyi ilin bütün fəsillərində turizm üçün çox əlverişlidir. Mingəçevirdə ilin günəşli günlərinin sayı 240-250-yə çatdığından burada il boyu su idman növləri ilə məşğul olmaq imkanı yaranır. Yay mövsümündə isə şirin sulu çimərliyi, Kür qırağının əcəb füsunkar seyrangahı ilə xoş əhval-ruhiyyə yaradan Mingəçevir istirahət etmək istəyənlərin ən sevimli yeri ola bilər. Qeyd edək ki, isti yayı burada keçirtmək istəyənlərin mətbəx problemi də ola bilməz. Belə ki, mingəçevirlilər və şəhərin qonaqları Kür çayının sahilində eləcə də şəhərin müxtəlif yerlərində olan restoran və yeməkxanalar şəbəkəsinin xidmətindən istifadəyə edə bilirlər. Yeni istifadəyə verilmiş dördulduzlu "River Side" hoteli müştərilərə Avropa standartları səviyyəsində xidmət göstərir. Buradakı qayıqlar, su velosipedləri və su motosiklləri ilə gəzintiyə çıxmaq insana unudulmaz anlar yaşadır. Mingəçeviri turizm üçün cəlbedici edən amillərdən biri də burada ovçuluq üçün əlverişli şəraitin olmasıdır. İlin bütün fəsillərində balıq ovu ilə məşğul olmaq mümkündür. Şah mavi, şırvıd, xəşəm, sazan Mingəçevir su hövzəsindəki balıq növlərindəndir. Kür çayında olan xərçənglər özünəməxsus dadı və müalicəvi əhəmiyyəti ilə fərqlənir. Hal-hazırda Mingəçevirdə 27 mədəniyyət müəssisə ilə yanaşı Mingəçevir Dövlət Dram Teatrının binası, Kür çayının üzərində keçən əsrin ortalarından qalma körpü də memarlıq abidələri kimi gələn turistlərin zövqünü oxşaya bilər. Hazırda Kür çayının sağ sahilində səkkiz mərtəbəli beşulduzlu mehmanxananın tikintisi, eləcə də yaxın gələcəkdə Kür çayının sol sahilindəki parkın yenidən qurulması, Mingəçevir su anbarının sahilindəki parkın yenidən qurulması, Mingəçevir su anbarının sahilində isə Avropa standartlarına uyğun sağlamlıq- istirahət kompleksinin tikintisinə başlanılacaqdır. Ümumiyyətlə, iri turizm mərkəzlərinin yaradılması şəhərin turizm zonası kimi daha da genişlənməsinə gətirib çıxardacaq. Nəticədə şəhər daha çox turist qəbul edərək, öz büdcəsini bu mənbədən gələn gəlirlə artıracaq. Ölkəmizdə 2011- ci ilin "Turizm ili" elan olunması da bu sahənin şəhər üzrə daha da uğurla davam etdiriləcəyindən xəbər verir.

Bəli, Mingəçevir tikilir,qurulur, bir-birindən maraqlı layihələrin icrası ilə inkişafda seçilməyə çalışır. Təsadüfü deyil ki, görülən işlərlə yaxından tanış olmaq üçün tez-tez regionlara baş çəkən dövlət başçısı İlham Əliyev Mingəçevir şəhərinə son səfərində (2010-cu il oktyabr) burada "Kür" Olimpiya Tədris İdman mərkəzinin açılışında iştirak etmiş, şəhərin gözəlliyini isə bu fikirlərlə dəyərləndirmişdir.

"Mən keçən il də, ondan əvvəlki illərdə də, 2003-cü ilə qədər də Mingəçevirdə olmuşam. Şəhər tamamilə müasirləşib, gözəlləşib, böyük abadlıq- quruculuq işləri aparılır, xiyabanlar, parklar salınır, binalar təmir olunur. Yəni Mingəçevir çox müasir,gözəl şəhərə çevrilibdir və bu məni çox sevindirir. Mən istəyirəm ki, hər bir şəhərimiz öz gözəlliyi ilə seçilsin. Sizə, bütün mingəçevirlilərə isə bu işlərdə yeni uğurlar arzulayıram. Bir daha sizi təbrik edirəm".

GUNEL İSAYEVA

Ədalət.- 2011.- 28 may.- S. 6.