Tanrı şair duasını eşidir

İyirmi ildən artıqdır ki, mən Adil Şirinin imzasını maraqla izləyirəm. Adil Şirin lirik-romantik şeirləri ilə yadımda qalmışdı. Bu gün isə Adil artıq yaradıcılığının necə dəyərlər müdriklik dövrünü yaşayan tanınmış şairdir. Şeirləri və poemaları dünyanın bir çox dillərinə tərcümə olunub. Rusiyada, Ukraynada və qardaş Türkiyədə kitabları yayınlanıb, yaradıcılığı çeşidli ödüllərlə dəyərləndirilib. Səhv etmirəmsə, Adil Şirin Türkiyə Yazarlar sindeqasının "Nazim Hikmət" ödülünə layiq görülmüş ilk Azərbaycan şairidir.

A.Şirin poeziyasının kökləri klassik Türk-Oğuz şeiri geleneklərindən qidalanır. Amma eyni zamanda o, çağdaş şairdir. Onun son illərdə qələmə aldığı "Rekviyem", "Laçın şikəstəsi", "Ölümün üstünə yeriyən şair" poemaları və çap etdirdiyi silsilə şeirləri ədəbi ictimaiyyət tərəfindən maraqla qarşılanmış, ədəbi hadisə kimi dəyərləndirilmişdir.

Dediyim kimi Adil Şirin gələnəklərə sayğı ilə yaşayan novator şairdir.

Mən şairəm!

Zaman-zaman qapımı

Külək açıb, qar döyüb.

Şairi cənnətə aparıblar

ah, Ana yurdum deyib.

Vətən gözümüzün ağı, qarası,

Vətən şair ürəyinin cənnəti.

Ulu nurdan yoğrulub

şairlərin xisləti...

Bu günlərdə şair dostum yenicə qələmə aldığı poemanı mənə oxumağa verdi. Bir neçə gün şairin "əmanətini" çantamda gəzdirdim və nə yaxşı ki, "vaxt darlığından" macal tapıb şairin "Dua"sını oxudum. (A.Şirinin mənə verdiyi poema "Dua" adlanır). "Dua" YUNESKO və İSESKO-nun xoş məramlı səfiri, Heydər Əliyev Fondunun Prezidenti, millət vəkili, ölkənin birinci xanımı Mehriban Əliyevaya ithaf olunur.

Mən şairin "Dua"sını oxudum, özü də bir nəfəsə oxudum. Doğrudan da poema dua kimi oxunur. Poemanın üslubu modern poeziya olanaqlarından yararlanır. Modern şeir dili son dərəcə özgürdür və bu özgür şeir dili A.Şirin yaradıcılığında bütün özəllikləri ilə görünür.

Şairəm ağzı dualı

haqq yolundan azmadım.

Mən könülsüz bir şer,

bircə misra yazmadım...

Məşhur fransız alimi J.Ellülun bir kəlamını xatırlamaq zənnimcə yerinə düşərdi. J.Ellül yazır: "tanrıyla yeganə mümkün ilişki sözə dayanır". Və mən sidq ürəkdən inanıram ki, Tanrı şairin "Dua"sını eşidir.

Nizami Cəfərov,

Atatürk Mərkəzinin müdiri,

AMEA-nın müxbir üzvü Millət vəkili

Ədalət.- 2011.- 28 may.- S. 12.