XALQINI DÜNYAYA TANIDAN DAHİ

Müdrik insanların, böyük tarixi şəxsiyyətlərin həyatı elə onların özləri kimi maraqlı, ibrətamiz və bütün zamanlar üçün xatırlanan, öyrənilən bir məktəb olub. Bu mənada Azərbaycan xalqının tarixində ən böyük məktəb, ən böyük tarixi şəxsiyyət və zamanını qabaqlayan yeganə şəxslərdən biri, hətta birincisi Ulu Öndərimiz, Ümummilli Liderimiz Heydər Əliyev cənablarıdır.

Azərbaycanın ən sıravi insanından ən ali mərtəbədə əyləşən vətəndaşına qədər hər kəs çox gözəl bilir ki, bu gün yaşayıb işlədiyimiz, həyatımızı rövnəqləndirdiyimiz Azərbaycanın qurucusu, memarı, ilhamçısı məhz Ulu Öndərimizdir. O, bir günəş kimi Azərbaycan xalqı üçün doğuldu, bütün həyatını xalqına, dövlətinə həsr etdi. Qarşılaşdığı çətinliklərə, problemlərə əsl sərkərdə kimi sinə gərərək bütün mübarizələrin qalibi oldu.

Bu gün xalqımız Ulu Öndərimizin doğum gününü özünün tarixinin ən işıqlı, ən önəmli bir məqamı kimi xatırlamaqla bu tarixi həm də sevinclə, gül-çiçəklə bəzəyir. İnsanlarımız 10 may tarixini Ulu Öndərimizin doğum günü kimi qeyd etməklə yanaşı həm də bu böyük insanın zaman-zaman bizlərə bəxş etdiyi sevinci, səmimiyyəti, təravəti, onun şərəfinə düzənlənən gül bayramında bir daha yaşayır və anır.

Bəli, biz dünya xalqları içərisində özümüzün bütün uğurlarımız, bütün nailiyyətlərimiz üçün məhz Ulu Öndərimizə borcluyuq. Həyatımızın hər bir uğuru onun adı ilə bağlıdır. Məhz Ulu Öndərimizin layiqli varisi İlham Əliyev cənablarının ən yüksək bir səviyyədə davam etdirdiyi, yaşatdığı və həyat gerçəkliyinə çevirdiyi Heydər Əliyev kursu bizləri, yəni Azərbaycanı daha böyük uğurlara, daha böyük təntənələrə aparır. Biz sabahımıza onun əməlləri ilə, arzuları ilə baxırıq və tam əminik ki, Azərbaycan yaşadıqca Ulu Öndərimiz də yaşayacaq. Çünki Xalq və Heydər ayrılmaz bir varlıqdır. Xalqımıza Ulu Öndərimizin doğum gününün sevinclərini yaşamaqda uğurlar diləyir və onun həmişə ürəyimizdə yaşayacağına əminliyimizi xüsusi vurğulayırıq.

Xaləddin Hüseynov

Ədalət.- 2011.- 5 may.- S. 4.