UNUDULMAYAN TARİXİN ANIMI

İkinci Dünya müharibəsində faşizm üzərində qələbədən 66 il keçir. Bəşər tarixində ən dəhşətli müharibə olan bu müharibədə Qələbənin əldə olunmasına Azərbaycan xalqı da böyük töhfələr vermişdir. 640 mindən çox Azərbaycan vətəndaşı müxtəlif cəbhə bölgələrində Alman faşizminə qarşı fədakarlıqla vuruşmuş, onların təxminən yarısı müharibədə həlak olmuşdur. Qələbənin təmin olunmasında həlledici rol oynamış sovet ordusunun tank və təyyarələrinin tam əksəriyyəti Bakı neftçilərinin göndərdiyi yanacaqla hərəkətə gətirilirdi.

İkinci Dünya müharibəsində Vətənin azadlığı uğrunda döyüşlərdə 6 mindən çox həmyerlilərimiz də qəhrəmanlıqla vuruşmuşdur. Onlardan 2024 nəfəri bu qanlı döyüşlərdə həlak olmuşdur. Qələbədən sonra Vətənə qayıtmış həmvətənlərimiz uzun illər quruculuq işlərində fəal iştirak etmiş, gənclərimizin vətənpərvərlik tərbiyəsi ilə məşğul olmuşlar. Bu günlərədək müharibənin dəhşətlərini yaşayaraq, ölümün pəncəsindən qurtarmış bu insanların yalnız 16 nəfəri sağ qalmışdır. Onların hər biri istər dövlətimiz, istərsə də ictimaiyyət tərəfindən hər cür qayğı ilə əhatə olunmuşdur. Azərbaycan xalqının Ümummilli Lideri Heydər Əliyev hakimiyyətdə olduğu bütün dövrlərdə müharibə veteranlarının probleminə böyük diqqət və qayğı ilə yanaşmışdır. İkinci Dünya müharibəsində şərəfli döyüş yolu keçmiş Azərbaycan övladlarının tarixi şücaətləri, habelə arxa cəbhədə fədakarlıqla çalışanların xidmətləri heç vaxt yaddaşlardan silinməyəcək, gənc nəslə əsl vətənpərvərlik nümunəsi olacaqdır.

Bütün bunlar barədə Qələbənin 66-cı ildönümü münasibətilə mayın 7-də Qaxda keçirilən ümumrayon tədbirlərində ətraflı söhbət getdi. Şəhidlər xiyabanına toplaşan tədbir iştirakçıları - RİH başçısı Musa Şəkiliyev başda olmaqla idarə, müəssisə rəhbərləri, YAP rayon təşkilatının fəalları, müharibə veteranları və rayon ictimaiyyətinin digər nümayəndələri əvvəlcə buradakı Böyük Vətən Müharibəsində həlak olanların xatirə abidəsinin, həmyerlimiz, Sovet İttifaqı Qəhrəmanı Məmməd Məmmədovun büstünün, Qarabağda torpaqlarımızın toxunulmazlığı yolunda şəhid olanların xatirəsinə ucaldılmış Ana abidəsinin önünə tər gül-çiçək qoyaraq hörmət və ehtiramlarını bildirdilər, şəhidlərin məzarlarını ziyarət etdilər.

Sonra Sovet İttifaqı Qəhrəmanı M.Məmmədovun abidəsinin önündə 9 May Qələbə gününə həsr edilmiş mitinq keçirildi. Tədbiri RİH başçısı Musa Şəkiliyev açaraq qeyd etdi ki, 60 dövlətin, 100 milyondan çox insanın cəlb edildiyi İkinci Dünya müharibəsində tarixi qələbənin əldə olunmasında Azərbaycanın ön cəbhədə qəhrəmanlıqla döyüşən oğulları ilə bərabər arxa cəbhədə də misilsiz əmək hünərləri göstərmiş, ordunun ehtiyaclarını ödəmək üçün gecə-gündüz çalışan həmyerlilərimizin əvəzsiz rolu olmuşdur. Onu demək kifayətdir ki, müharibə illərində Sovet İttifaqında hasil olan neftin 70 faizindən çoxunu Azərbaycan verirdi. Faşizm üzərində qələbənin təmin edilməsində həlledici rol oynamış tank və təyyarələrinin tam əksəriyyəti Bakı nefti ilə hərəkətə gətirilirdi. Musa Şəkiliyev daha sonra həmyerlilərimizin də qələbənin əldə olunmasında döyüşlərdə göstərdikləri fədakarlıqlardan, Sovet İttifaqı Qəhrəmanı Məmməd Məmmədovun igidliklərindən söz açdı. Qeyd etdi ki, Ümummilli Liderimiz Heydər Əliyev hakimiyyətdə olduğu illərdə Böyük Vətən Müharibəsində həlak olanların xatirəsinin əbədiləşdirilməsi, veteranların sosial-məişət problemlərinin həll edilməsi üçün bir çox qərar və sərəncamlar imzalanmışdır. Bu gün Ulu Öndərin bu siyasəti Respublika Prezidenti İlham Əliyev tərəfindən uğurla davam etdirilir. Hər il Qələbə bayramı ərəfəsində ölkə başçısının sərəncamı ilə müharibə iştirakçılarına, onların ailələrinə birdəfəlik maddi yardım edilməsi bu qayğının təcəssümüdür. RİH başçısı giriş sözünü yekunlaşdıraraq tədbir iştirakçılarını, veteranları, rayon ictimaiyyətini Qələbə bayramı münasibətilə təbrik edərək mitinqi açıq elan etdi.

Azərbaycan Respublikasının Dövlət Himni səsləndirildi.

Sonra Böyük Vətən Müharibəsində qələbənin 66-cı ildönümü münasibətilə məruzə ilə çıxış edən RİH-in hüquqşünası Dəyanət Əminov qələbənin əldə olunmasında Azərbaycan xalqının, onun qəhrəman oğul və qızlarının, o cümlədən həmyerlilərimizin fədakarlıqlarına dair faktları mitinq iştirakçılarının nəzərinə çatdırdı.

Tədbirdə çıxış edən rayon Müharibə, Silahlı Qüvvələr və Əmək Veteranları şurasının sədri Qədir Hafizov, QMƏVŞA İB rayon təşkilatının sədri Atəş Babayev, hərbi komissarın müavini Akif Hüseynov, müharibə veteranı Məmməd Rəhimov və başqaları Böyük Vətən Müharibəsi veteranlarına, onların ailələrinə dövlətimiz tərəfindən göstərilən diqqət və qayğıya görə Respublika Prezidenti İlham Əliyevə minnətdarlıqlarını bildirdilər, əmin olduqlarını vurğuladılar ki, onun rəhbərliyi ilə həyata keçirilən tədbirlər nəticəsində torpaqlarımız erməni işğalından təmizlənəcəkdir.

Mitinqdən sonra Qələbənin 66-cı ildönümü münasibətilə keçirilən tədbir "1001 dad" restoranında bayram ziyafətilə davam etdirildi. Ziyafətdə rayon mədəniyyət evinin kollektivinin, üzvləri zəngin konsert proqramı ilə çıxış etdilər.

Ziyafətdə çıxış edərək veteranları bir daha Qələbə bayramı münasibətilə təbrik edən RİH başçısı Musa Şəkiliyev onlara RİH tərəfindən ayrılmış maddi yardımı təqdim etdi. Eyni zamanda rayonumuzun ağsaqqalı, həmyerlimiz, Meliorasiya və Su Təsərrüfatı ASC-nin sədri Əhməd Əhmədzadənin təbriklərini və bayram hədiyyəsini veteranlara çatdırdı. Tədbirdə çıxış edən veteranlar şurasının sədri Qədir Hafizov, 5 saylı tam orta məktəbinin direktoru Sevil Musayeva, 2 saylı tam orta məktəb-liseyinin direktoru Şəkər Abdullayeva, YAP rayon təşkilatının sədri Nizami Əhmədov və rayon ağsaqqallar şurasının sədri Hacı Nəzirov çıxış edərək müharibə veteranlarını təbrik etdi, onlara xoş arzularını çatdırdı.

Veteranlar onlara göstərilən diqqət və qayğıya görə Respublika Prezidenti İlham Əliyevə, rayon rəhbərliyinə minnətdarlıqlarını bildirdilər.

N.ŞABANOV

Ədalət.- 2011.- 11 may.- S. 6.