TURİSTLƏRİ OVSUNLAYAN QAFQAZ İNCİSİ

Regionların inkişafı yeni istiqamətlərə işıq salır

Sosial-iqtisadi inkişafın ölkənin ən ucqar bölgələrini də əhatə etməsi, insanların rifah halının yüksəlməsi digər istiqamətlərə də işıq salmışdır. Dövlət Proqramlarında qarşıya qoyulan vəzifələr, artıq hansısa köhnə bir binanın cari təmiri və ya hansısa bir yola qara örtük salınması kimi bəsit məsələləri gündəmə gətirmir. Ölkəboyu nəhəng işlər aparılır. Bu tərəqqi, bu yüksəliş Azərbaycan Respublikasının adi vətəndaşından tutmuş, onun rəhbərinə kimi sevinc və qürur bəxş edir. Ölkə prezidenti İlham Əliyev regionlara səfərləri zamanı ictimaiyyət nümayəndələri ilə görüşlərində ən sadə adamlarla bu sevinci bölüşür, Azərbaycan Respublikasının gələcəyinin daha gözəl olacağına inandığını bildirir.

2011-ci ilin "Turizm ili" elan edilməsi adi məsələ deyildir. Cənab Prezident ölkədə qeyri-istehsal sahələrinin də inkişaf etdirilərək xalqın rifahına yönəldilməsini düşünür və potensialları yüksək səviyyədə dəyərləndirir. 2011-ci ilin "Turizm ili" elan olunması təbii ki, hər yerdə olduğu kimi Zaqatala rayonunda da sevinclə qarşılanmış və uyğun qurumlar üçün daha geniş perspektivlər açmışdır.

Əslində Zaqatala, elə bütövlükdə ölkənin şimal-qərb bölgəsi daxili və beynəlxalq turizmin inkişafı üçün münasib yerlərdir. Biz əgər indi konkret olaraq Zaqatala rayonu haqqında söhbət açırıqsa, mövzunu əhatəli şəkildə şərh etməliyik. Ən azından Zaqatala kəndli-şəhərli həm təbiət gözəllikləri, həm də sosial-mədəni inkişafı ilə turistləri daim cəlb edən məkandır.

Keçən il də, bu ilin əvvəllərində də Zaqatala rayonunun sosial-iqtisadi inkişafı haqqında geniş məqalələr yazarkən, onun digər gözəllikləri, məhz turizmlə bağlı üstünlükləri barədə yazacağıma bir növ anons olaraq işarə etmişdim.

GÖZƏLİN GÖZƏLLƏRƏ OXŞADILMASI

Zaqatalanın tarixi abidələri və təbiət gözəllikləri ilə yanaşı, onun şəhər mədəniyyəti, qonaq (turist) qəbul edib xidmət göstərmək ənənəsi həmişə diqqət çəkib, onun bu özəlliklərini uzaqlara daşıyıb. Çoxları bu şəhəri mədəni səviyyəsi və ya mən bilmədiyim hansısa səbəblərə görə Tiflisə, Parisə bənzədir. Təbii kiçik işartılar mümkündür. Elə "Bala Tiflis", "Kiçik Paris" deyimləri də bu yanaşmalardan qaynaqlanıb. Əsl oxşarlığa qalsa isə, Zaqatala Rusiya Federasiyasının cənub incisi Soçiyə daha çox bənzəyir. Hər ikisinin iqlimi yarımsubtropikdir. Soçini Soçi çayı iki hissəyə ayırır, Zaqatalanı Tala çayı. Hər iki şəhərdə hardan baxsan oxşar dağlar görünür. Küçələrindəki çinar, çökə, qovaq ağacları, şəhər kənarlarındakı evlərin qarşısındakı meyvəli bağlar da bir-birini tamamlayır. Soçidə Rıtsa tərəfə "Qafqaz aulu"na gedərkən Zaqatalanın Car kəndindəki "Ləzzət"i xatırlamamaq mümkün deyil. Zaqatalanın Heydər Əliyev parkı quruluş və bitki tərkibiylə Soçinin "Park Rivyera"sından geri qalmır. Məşhur "Daqomıs" istirahət zonasının yolu bugünkü Zaqatala-Balakən yolunu xatırladır. Bizim Zaqatalamızda təkcə dəniz yoxdur

Mən bütün bunları sevimli oxucuların diqqətinə çatdırmaqla Zaqatalanı Soçi kimi məşhur kurort şəhəriylə baş-başa qoymaq iddiasında deyiləm. Mümkünsüzdür. Sadəcə bəzi məqamlar baxımından oxşarlıq var deyə yazıda belə bir ricət yarandı.

ZAQATALA - TURİZM SƏLTƏNƏTİ

Beləliklə, mövzumuzun əsas istiqamətinə keçid edirəm. Rayon rəhbərliyi bütün digər məsələlərlə yanaşı, turizmin inkişafına da xüsusi əhəmiyyət verir. Zaqatala Rayon İcra Hakimiyyətinin başçısı Mübariz Əhmədzadə söhbətimiz zamanı deyir:

- Zaqatala onsuz da qonaq-qaralı yerdir. Burada turizm üçün də hər cürə şərait və bu şəraiti daha da genişləndirmək perspektivləri var. Məsələyə çox ciddi yanaşırıq. Çünki turizm qeyri-istehsal sahələrindən biri kimi yaxşı gəlir gətirə bilir. Təbii ki, bütün infrastrukturlar, xidmət mədəniyyəti və digər amillər yüksək səviyyədə qurulduqda. Regionda turizmin inkişafı rayonumuz, camaatımız üçün əlavə gəlir mənbəyidir. Bu səbəbdən də bütün imkanlardan maksimum istifadə etməyə çalışırıq. Zənnimcə, elə bu ilin turizm mövsümü Zaqatalanın bir çox digər potensiallarını da üzə çıxaracaq

Rayonda hələ fevral ayından daxili və xarici turistlərin qəbulu və onlara yüksək səviyyəli xidmət göstərilməsinə ciddi hazırlıq işləri görülüb. Otellər, istirahət mərkəzləri, motellər , restoran və kafelər, rabitə, səhiyyə, digər xidmət strukturları məlumatlandırılıb. Rayon mədəniyyət və turizm şöbəsi, bədən tərbiyəsi və gənclər təşkilatı, internet klubları Dövlət qoruğu və başqa təşkilatlar üçün xususi iş planları hazırlanıb. Bütün bunlar barədə mənə Zaqatala Rayon İcra Hakimiyyətinin şöbə müdiri Nizami Abdullayev sistematik məlumatlar verir. İşini sevən, doğma rayonun şərəfini uca tutan məmurdur. Mənə xüsusi hörmət və rəğbətlə yanaşmasının səbəbini isə heç vaxt açıq bildirmir. Yəqin belə məsləhətdir.

(ardı gələn sayımızda)

Məzahir ƏHMƏDOĞLU

Ədalət.- 2011.- 11 may.- S. 7.