TURİSTLƏRİ OVSUNLAYAN QAFQAZ İNCİSİ

(əvvəli ötən sayımızda)

GÖRÜLƏN İŞLƏR VƏ PERSPEKTİVLƏR

Rayon ərazisində 9 turizm obyekti fəaliyyət göstərir. Bu obyektlər sırasında "İsoil", "Qafqaz", "Turqut", SMU-2, Olimpiya kompleksi, "Ləzzət" istirahət guşəsi əsas yeri tutur. Obyektlərin hamısı müasir tələblərə cavab verir. Qiymətləri də əlverişlidir.

Adı çəkilən turizm obyektləri bir gündə 375-400 nəfər turisti qəbul etmək imkanına malikdir. Obyektlərdə çalışan xidmət heyətinin hamısı gənclərdir. Xidmət heyətinin vaxtaşırı təşkil olunmuş kurslarda ixtisas artırması rayon mədəniyyət və turizm şöbəsi tərəfindən həyata keçirilir.

Turizm ilində otellərin, yeni turizm mərkəzlərinin təşkili nəzərdə tutulub. Rayonun mərkəzində yerləşən qədim Qala düzü pilləkənləri öz qədim üslubunu saxlamaqla təmir olunub, istifadəyə verilmişdir. Şəhərin mərkəzində yerləşən Tarix-mədəniyyət qoruğunun və Alban məbədinin əsaslı təmiri ilə bağlı Mədəniyyət və Turizm Nazirliyi qarşısında məsələ qaldırılıb. Son illər rayona gələn turistlərin sayı artmışdır. 2010-cu ildə bu göstərici 4000 nəfərə çatmışdır. Bu otellərdən alınan məlumatdır. Xüsusi evlərdə və kəndlərdə qalanların sayı isə daha çoxdur.

Turistlər əsasən Yuxarı Çardaxlar kəndində yerləşən Pəri Qalasına, Car kəndində "Cingözqala", Zaqatala qalasına, Alban məbədinə, bəzi məscidlərə, təbiət möcüzəsi olan çinar ağaclarına, parklara, "Şəlalə"yə daha çox maraq göstərirlər. Rayonda Dövlət Qeydiyyatına düşən 108 tarix və mədəniyyət abidəsi mövcuddur. Artıq Zaqatala Qoruğunun ərazisində turizm istirahət mərkəzinin yaradılması da gündəmdədir.

Turistlərin əsas maraqlandığı yerlərdən biri də Tarix Diyarşünaslıq Muzeyidir. Muzeyin çox zəngin fondu vardır ki, orada 16 min eksponat qorunur və nümayiş etdirilir.

İSTİRAHƏT VƏ TURİZM XƏRİTƏSİ

Mən artıq Zaqatalanın istirahət və turizm xəritəsi əsasında müəyyən məlumatları diqqətə çatdırmaq istəyirəm. Axı bu rayona çoxdan yolu düşməyənlər, bu rayonu yaxşı tanımayanlar da var, heç görməyənlər də yəqin ki, çoxdur.

Heydər parkı

1947-ci ildə salınmış bu parkın sahəsi 13 hektardır. Burada 27 ağac növü vardır. Sonradan parkda yenidənqurma işləri aparılmış və "Heydər parkı" adlandırılmışdır. Ulu Öndərin abidəsinin ucaldığı bu gözəl məkan əhalinin ən sevimli istirahət yeridir.

Zərifə Əliyeva adına park

2008-ci ildə salınmış bu parkda akademik Zərifə Əliyevanın büstü qoyulmuş, müasir səhnə, işıqlandırma sistemi, fəvvarələr quraşdırılmışdır.

Dədə Qorqud meydanı

Təbiətin möcüzəsi hesab edilən 750 yaşlı və gövdəsinin diametri 7 metr olan çinar ağacı burada yerləşir. El arasında Qala düzü pilləkənləri buradadır.

Zaqatala tarix-mədəniyyət qoruğu

Qoruq 1830-cu ildə inşa edilən Zaqatala qalasında yerləşir. Bu qalada "Potyomkin" zirehli gəmisinin üsyançıları məhbus kimi saxlanılıb. Qalanın divarlarının eni 1,5 metrdir. Qalanın 100-dən çox mazğalı - tüfəng atmaq üçün yeri olub. Qalanın daxilində 20-dən çox yerli əhəmiyyətli tarixi abidə var.

Car kəndi

Zaqatala şəhərinin şimalında, Böyük Qafqaz dağlarının ətəklərində yerləşir. Kəndin ərazisindən 2 dağ çayı (Bəkməz və Zilban) axır. Üç tərəfi dağlardır. Ümumi sahəsi 1314 ha, əhalisi 3244 nəfərdir. Tarixi abidələrdən Car məscidi (XVII əsr), XVI əsrə aid olub və müdafiəsi məqsədləri üçün tikilmiş, hündürlüyü 10-12 metr olan Cigiz qala vardır. Ərazidə "Gülüstan" turist bazası yerləşir.

Qəbzdərə kəndi

Mazıx kəndinin şimalında, Böyük Qafqaz dağlarının cənub ətəyində, Katex çayının sağ sahilində yerləşir. Əhalisi 234 nəfərdir. Burada turizm istirahət mərkəzi üçün torpaq sahəsi ayrılmış və tikintisinə başlanılacaqdır. Ərazidə 15 metr hündürlükdən tökülən respublikanın ən bol sulu şəlaləsi vardır.

Pərzivan

Yuxarı Tala və Muxax kəndlərinin arasında Böyük Qafqaz dağlarının ətəyində yerləşir. Sahəsi 142 ha, əhalisi 110 nəfərdir.

(ardı gələn sayımızda)

Məzahir ƏHMƏDOĞLU

Ədalət.- 2011.- 12 may.- S. 7.