Şirvanın şöhrəti çinarlı Göyçay...

(əvvəli ötən sayımızda)

Olimpiya İdman Kompleksi, şəhər 7 saylı məktəbdə süni örtüklü futbol meydançası istifadəyə verilmişdir. Rayon mədəniyyət evində əsaslı təmir işləri aparılmış, R.Rzanın ev muzeyi, Əlvan uşaq kitabxanası açılmışdır. Heydər Əliyev muzeyi yaradılmış və qiymətli eksponatlarla təmin olunmuşdur. Rayon mərkəzi xəstəxanasında əsaslı təmir işləri aparılmış, təcili və təxirəsalınmaz yardım stansiyası əsaslı yenidən qurulmuş, Ailə planlaşdırma mərkəzi, Çaxırlı kəndində Naftalan sağlamlıq mərkəzi istifadəyə verilmişdir.

Dövlət Proqramlarının uğurla həyata keçirilməsi nəticəsində 2003-2011-ci illərdə rayonda 8244 iş yeri açılmışdır ki, bunun da 6832-i və 82.9 faizi daimi iş yerləridir.

Abadlıq və quruculuq

Son illər rayonda böyük abadlıq, quruculuq işləri aparılmış, bir sıra yeni inzibati binalar istifadəyə verilmişdir. Şəhərə xüsusi yaraşıq verən Heydər Əliyev mərkəzi inşa edilmiş, Heydər Əliyev prospekti, Natavan, M.Hüseynzadə, Ə.Kərim, N.Nərimanov, Nizami, R.Rza, M.Ə.Rəsulzadə və bir cox küçələr əsaslı yenidən qurulmuşdur. Təkcə son 3 ildə şəhərin küçələrinə 400 min kv.m yaxın yeni asfalt örtüyü vurulmuş, 50-yə yaxın ictimai binanın üst örtüyü dəyişdirilmiş, üz hissələri qaydaya salınmışdır. Ə.Kərim adına park və Şəhidlər Xiyabanı yenidən qurulmuş, parkda azərbaycanlıların soyqırımına həsr edilmiş abidə kompleksi ucaldılmış, Şəhidlər Xiyabanında şəhid məzarları abadlaşdırılmışdır. Rayon təhsil şöbəsi, 9 saylı ərazi vergilər idarəsi, rayon polis şöbəsi, Dövlət Sosial Müdafiə Fondu rayon şöbəsi, Əmək və Əhalinin Sosial Müdafiə Nazirliyi rayon şöbəsi üçün inzibati binalar, rayon tədris istehsalat mərkəzi tikilib istifadəyə verilmişdir.

Qarabağ müharibəsi əlilləri və şəhid ailələrinin mənzil şəraitini yaxşılaşdırmaq üçün 21 və 24 mənzilli, 10 mərtəbəli yaşayış binaları tikilmişdir.

Şəhəri sel-sularından müdafiə etmək məqsədi ilə 2 km. uzunluğunda daş beton bənd inşa edilmişdir, eyni zamanda kəndlərdə böyük tikinti, abadlıq -quruculuq işləri aparılmışdır. Kənd investisiya layihəsi çərçivəsində 26 kənd yaşayış məntəqəsində kəndarası yolların əsaslı təmiri, əhalinin içməli su və suvarma suyu ilə təminatının yaxşılaşdırılması ilə bağlı 1 milyon dollar dəyərində sosial layihələr həyata keçirilmişdir. Çaxırlı və Bəyövül kəndlərində əhalinin içməli su ilə təminatının yaxşılaşdırılması üçün modul tipli su təmizləyici qurğular inşa edilmişdir. Qızılağac, Məlikkənd, Çaxırlı, Potu və İnçə kəndlərində əsas kəndarası yollara asfalt örtükləri vurulmuşdur.

2011-ci ildə də rayonda böyük tikinti proqramı həyata keçirilməkdədir. Azrbaycan Pespublikası Prezidentinin 28 iyul 2011-ci il tarixli sərəncamına əsasən Ləkçılpaq -Yalman-Şıxbəy-Məlikkənd-Şıxəmir avtomobil yolunun tikintisinə 2.5 milyon manat vəsait ayrılıb və avqust ayının 2-dən tikinti işlərinə başlanılıb. Bu günə qədər 80 min kv.m yaxın yolun profilə salınması işləri aparılıb, 16.8 min kubmetr həcmində təbii çınqıl və qumdan yol döşəyi hazırlanıb. Tikinti işlərinin noyabr ayının əvvəllərinə kimi başa çatdırılması nəzərdə saxlanılır.

Ərəbcəbirli kəndində inşa edilən smeta dəyəri 3.5 milyon manat olan soyuducu ambar kompleksində quraşdırma-sazlama işləri başa çatdırılb və kompleks vətəndaşlardan saxlanılmaq üçün meyvə-tərəvəz tədarükünə başlayıb.

2010-cu ilin fevral ayında ölkə Prezidenti cənab İlham Əliyev rayona səfəri zamanı Bığır kəndində su elektrik stansiyasının təməlini qoymuşdu. Smeta dəyəri 3.0 milyon manat olan və Yuxarı Şirvan kanalı üzərində inşa edilən stansiyanın gücü 3 meqavatdır. Burada 3 turbin quraşdırılacaq, istehsal olunan enerji Bığır və ətraf kəndlərə veriləcəkdir. Bu günə qədər obyektdə torpaq işləri, trubinlərin quraşdırılması üçün beton su ötürücülərin inşası, istehsal olunan enerjinin ötürülməsi üçün tarnsformator yarımstansiyasının tikintisi başa çatdırılmışdır. Obyektin cari ilin sonunadək istifadəyə verilməsi nəzərdə saxlanılır.

Yalman kəndinin ərazisində üzüm qəbulu müəssisəsinin və sutkada 8 ton spirt istehsal edən qurğu komleksinin tikintisi aparılır.

Muğanlı- Göyçay -Yevlax avtomağistralının Göyçay rayonu ərazisindən keçən hissəsinin əsaslı yenidən qurulmasına başlanılmışdır.

Su təhcizatı və kanalizasiya sistemi yenidən qurulur

Göyçay şəhərinin su təhcizatı və kanalizasiya sisteminin yenidən qurulması işləri davam etdirilir. Tikinti işlərinə Asiya İnkişaf Bankının ayırdığı kredit hesabına 2008-ci ildən başlanılıb. 2010-cu ilə qədər 3 artezian quyusu qazılmış, həmin artezian quyularından su anbarlarına 1200p/m uzunluğunda boru xətti çəkilmişdir. İstehsal bazasının, idarə binasının, su qəbuledici kameranın, nasosxananın xlorlama sexinin tikintisi, nasosxanadan su anbarınadək daşıyıcı kəmərin çəkilişi başa çatdırılmışdır. 2010-cu ilin fevral ayında tikinti işləri dayandırılmışıdr. Hazırda sifarişçi təşkilat olan "Azərsu" tərəfindən tikinti işlərini davam etdirmək üçün tender elan edilmiş və qalib təşkilatın müəyyənləşdirilməsi prosesi gedir. Bu günlərdə tikinti işlərinin başlanılması nəzərdə tutulur.

Rayon mərkəzində əsaslı təmir olunan mehmanxana binasında son tamamlama işləri aparılır. Yüksək zövqlə və müasir tələblər baxımından yenidən qurulmuş bina ilin sonunadək istifadəyə veriləcəkdir.

Azərbaycan Respublikası Nazirlər Kabinetinin 04 iyul 2011-ci il tarixli sərəncamına əsasən Azərbaycan Respublikasının 2011-ci il dövlət büdcəsinin ehtiyat fondundan Rayon İcra Hakimiyyəti binasının yenidən qurulması və ətraf ərazinin abadlaşdırılması üçün vəsait ayrılmışdır. Tikinti işlərini aparmaq üçün Göyçay rayonundakı "ATF" MMC-i ilə müqavilə bağlanılıb. İyul ayından təmir işlərinə başlanılıb. Təmir işlərinin cari ilin sonuna qədər başa çatdırılması nəzərdə saxlanılır.

Həmçinin Azərbaycan Respublikası Nazirlər Kabinetinin 12 avqust 2011-ci il tarixli sərəncamına əsasən Çərəkə kənd 2 saylı 360 şagird yerlik tam orta məktəbinin tikintisinə başlamaq üçün 300 min manat, Göyçay şəhər 12 saylı uşaq baxçasının əsaslı təmiri üçün 200 min manat vəsait ayrılmışdır. Göstərilən obyektlərin tikintisi üçün müvafiq layihə-smeta sənədləri hazırlanmış və tikinti işlərini aparmaq üçün podratçı təşkilatla müqavilə bağlanılmışdır.

Məzahir Əhmədoğlu,

Azərbaycan Respublikasının Prezidenti

yanında kütləvi informasiya vasitələrinin

inkişafına dövlət dəstəyi fondunun maliyyə

yardımı ilə

Ədalət.-2011.-1 noyabr.-S.7.