Balakən: dağlar kimi əzəmətli...

Prezident ölkədə bütün sahələrin inkişafından danışıb

24 oktyabr 2011-ci ildə Nazirlər Kabinetində keçirilən cari ilin 9 ayında sosial-iqtisadi inkişafın yekunlarına həsr olunmuş müşavirədə 2011-ci ilin keçən dövrü ərzində ölkə iqtisadiyyatının ayrı-ayrı sahələri üzrə qazanılmış uğurlardan danışılmışdı.

Müşavirəyə sədrlik edən Azərbaycan Respulikasının Prezidendi İlham Əliyev qeyd etmişdir ki, bu ilin 9 ayında ümumi daxili məhsul istehsalı 0,5 faiz, sənaye məhsulu istehsalı 9,2 faiz, kənd təsərrüfatı məhsulu istehsalı 7,6 faiz artmışdır. Makroiqtisadi vəziyyət sabit qalmış, inflyasiya 8,4 faiz təşkil etmiş, ölkənin valyuta ehtiyatları 40 milyard dolları ötmüşdür. Əhalinin pul gəlirləri 19 faiz artmışdır. İqtisadiyyatımızın neft amilindən asılılığı böyük dərəcədə aşağı enmiş, ölkədə güclü sənaye potensialının yaradılması istiqamətində tədbirlər uğurla icra olunmuşdur. Regionun aparıcı dövlətinə çevrilən ölkəmizin iştirakı olmadan bölgədə iqtisadi, siyasi, enerji və digər layihələri reallaşdırmaq qeyri-mümkündür. Bütün sahələr üzrə inkişafı təmin edən işlək mexanizmlər sayəsində son 8 ildə ölkədə ümumi daxili məhsul istehsalı 3 dəfə artmışdır

Balakən rayonu yeni uğurlara imza atır

Bütün bu nailiyyətlərin nəticəsi regionların sosial-iqtisadi və mədəni inkişafında xüsusi mərhələlərlə reallaşmaqdadır. Hətta ən ucqar bölgələrin həyatındakı dəyişiklik və müasirləşmə aydınca görünür, fərəh doğurur. Balakən də daimi inkişafda olan rayonlarımızdandır. İki xarici dövlətlə həmsərhəd olan Balakən rayonu haqqında cox söhbətlər açılıb, buradakı inkişaf və yeniləşməni məqalələr və fotolarla oxucuların diqqətinə çatdırmışıq. Şimal- qərb bölgəmizin sərhəd qapısında, Böyük Qafqazın cənub ətəklərində - doğma Balakənimizdə yeni uğurlara aparan sanballı işlər, tədbirlər ara vermir, yüksək templə davam edir. Balakən rayon icra hakimiyyətinin başçısı İslam Rzayev və komandası camaatla əl-ələ verərək qazanılan uğurları daha da möhkəmləndirmək əzmindədir. Ölkə rəhbərinin yüksək etimadını layiqincə yerinə yetirməyə çalışan başçının hər gün kəndlərdə, tikinti meydanlarında, sakinlərlə bir yerdə görmək adi hal alıb. Balakənlilər İ.Rzayevin işgüzarlığını və səmimiliyini yüksək dəyərləndirir, bu səbəbdən də Prezidentə minnətdar olduqlarını bildirirlər.

Balakən rayonunda da 2011-ci ilin 9 ayında görülmüş işlərə həsr olunmuş müşavirə keçirilmişdir. Regional, tarazlı inkişafın təmin olunması istiqamətində qəbul olunan "Regionların 2009-2013-cü illərdə sosial-iqtisadi inkişafı Dövlət Proqramı"nın rayonda icrasının sürətləndirilməsi, eyni zamanda, həmin proqramda nəzərdə tutulmayan digər mühüm tədbirlərin həlli məqsədilə rayonun 2011-2013-cü illərdə sosial-iqtisadi inkişafı Proqramı işlənib hazırlanmış, ictimaiyyətin müzakirəsinə verilmiş, şura yığıncağında təsdiq olunmuşdur. Proqramda 10 bölmə üzrə 83 tədbir nəzərdə tutulmuşdur. Artıq Proqramda nəzərdə tutulan tədbirlərin icrasına başlanmışdır.

2011-ci ilin 9 ayında rayonda ümumi məhsul buraxılışı 83,6 milyon manat təşkil etmişdir. 39,5 milyon manatlıq kənd təsərrüfatı məhsulu, 5,4 milyon manatlıq sənaye məhsulu istehsal edilmiş, 8,8 milyon manatlıq tikinti işləri görülmüşdür. Keçən ilin müvafiq dövrü ilə müqayisədə kənd təsərrüfatı məhsulu istehsalı 13,7 faiz, sənaye məhsulu istehsalı 15,1 faiz, pərakəndə əmtəə dövriyyəsi 17,0 faiz artmışdır. Ümumi məhsul buraxılışında kənd təsərrüfatının xüsusi çəkisi 47,2 faiz, sənayenin xüsusi çəkisi 6,5 faiz olmuşdur.

Aqrar sahəyə dövlət qayğısı

Rayonda 9126 hektar sahədə yazlıq və payızlıq bitkilər əkilmişdir. Onun 356 hektarı payızlıq taxıl olmuş, 494 ton məhsul yığılmışdır. Bu ilin əvvəlində fasiləsiz yağan yağışlar kənd təsərrüfatına olduqca mənfi təsir göstərmişdir. Taxıl sahələrinin su altında qalması, əkin yerlərinin su basması kimi baş vermiş hallar bütövlükdə kənd təsərrüfatına güclü ziyan vermiş və nəticədə məhsuldarlıq aşağı düşmüşdür. 2011-cu ildə 8770 hektar sahədə yazlıq bitkilərin əkilməsi təmin edilmişdir.

Rayonda 4865 hektar qarğıdalı, 260 ha lobya, 1928 ha tərəvəz, 299 ha bostan, 798 ha kartof, 616 ha yonca əkilmişdir. Əvvəlki illərin müvafiq dövrünə nisbətən 273 ha qarğıdalı, 13 ha tərəvəz və 22 ha kartofun artıq əkilməsi təmin edilmişdir.

Təsərrüfatın digər sahələrində olduğu kimi, heyvandarlığın inkişaf etdirilməsi sahəsində də müəyyən işlər görülmüş, əvvəlki ilə nisbətən rayonda iri buynuzlu mal-qaranın sayı 24 baş, ana malın sayı 119 baş, xırdabuynuzlu mal-qaranın sayı 883 baş artmışdır.Bütövlükdə, 2011-ci ilin 9 ayında rayonun kənd təsərrüfatından 39,5 milyon manatlıq gəlir əldə edilmişdir. İstehsal olunan məhsulun 63 %-i bitkiçilik, 37 %-i isə heyvandarlıq məhsullarının payına düşmüşdür.

Nəticələr fərəh doğurur

Dövlət Proqramına uyğun tikilib istifadəyə verilən "Azəryemsənaye" MMC-də 2011-ci ilin 9 ayında 960 ton qüvvəli yem istehsal olunmaqla rayonun və respublikanın digər rayonlarının fermerlərinə satılması təşkil edilmişdir. Eyni zamanda, müəssisə tərəfindən ətlik heyvandarlığın inkişaf etdirilməsi istiqamətində də işlər görülür. Rayonun Katex kəndində yaradılmış heyvandarlıq fermasında xaricdən 450 baş yüksək məhsuldar mal-qara gətirilmişdir. Bu da rayonda mal-qaranın cins tərkibinin yaxşılaşdırılmasına və ət istehsalının artırılmasına imkan verəcəkdir.

Azərbaycan Respublikası Prezidentinin 23 yanvar 2007-ci il tarixli 1907 saylı "Kənd təsərrüfatı məhsullarının istehsalçılarına dövlət dəstəyi haqqında" Sərəncamının icrası ilə əlaqədar 2607 nəfər məhsul istehsalçısına becərdikləri 5034,60 ha sahəyə görə 201384 manat yardım hesablanmış və plastik kartla istehsalçılara ödənilməsi təmin edilmişdir.

(ardı gələn sayımızda)

Məzahir Əhmədoğlu,

Azərbaycan Respublikasının

Prezidenti yanında kütləvi informasiya

vasitələrinin inkişafına dövlət dəstəyi fondunun

maliyyə yardımı ilə

Ədalət.-2011.-2 noyabr.-S.7.