"ŞAHZADƏ" DÜNYANI GƏZİR

(regionlarda yeni adətlər)

... Bu gözəl bayrama qovuşub, bu gözəl anların sevincini yaşayıb günün nə vaxt bitdiyini hiss etmirsən. Ancaq sən istədin-istəmədin hər şeyin bir sonu, qurtaracağı var. Təkcə xatirələrdən başqa... Bəlkə də bəşəriyyətin kino, televiziya, internet ixtirası elə insanın təfəkkürünün bu nöqtəsindən başlayıb. Çünki mən indi rahatca, heç bir videoreportaja, sənədli filmə, digər görüntülərə baxmadan, təkrar-təkrar seyr etmədən xəyallarımla da altı il bundan əvvələ qayıda bilirəm.

Siz Göyçayda keçirilən ilk Nar bayramını xatırlayırsınızmı? Necə möhtəşəm və unudulmaz bir şölən idi. Meyvələr şahının vətəni miqyasına və iştirakçısının sayına görə belə şənlik və təntənə yaşamamışdı.

Yüzlərlə qonaq, minlərlə iştirakçı, tamaşaçı... Və saat 11-dən başlayıb günboyu davam edən rəngarəng bayram tədbirlərinin sevinci, coşğusu. Onda hamı söz açdı, hamı arzuladı ki, Göyçayın rəmzi sayılan narın adına keçirilən bu bayram ənənə şəklini alsın, hər il eyni təravətlə bir daha yaşansın. Çünki qəlblərdə unudulmaz bir təəssürat oyatmışdı, yurdsevərliyin və qonaqpərvərliyin özünəməxsusluğunu isitmişdi...

Arzu və istəklər gerçəkləşdi. Nar bayramı ötəri xarakter almadı. Əksinə, özünün simvolik ruhundan çıxıb daha geniş, daha əzəmətli məna daşıdı. Bu bayram düz 6 ildir ki, az qala bütün respublikanı bir yerə toplayaraq ölkədə aparılan quruculuq işlərinin, sosial-iqtisadi inkişafın sevincini, qürurunu paylaşır. Əsl zəhmət, birlik, yüksəliş bayramı kimi də yaddaşlara köçür.

Mən götürdüyüm qeydlərimə baxa-baxa, yaddaşımı bir lent kimi irəli-geri ötürə-ötürə bu reportajı hazırlayarkən çöldə qar yağmaqdadır. Bu dəfəki Nar bayramı Qurban bayramı ərəfəsinə düşdüyündən bu səbəbdən qəzetlərin də 4-5 gün istirahət etdiyindən, mən də yazımı iş başlayana yaxın qələmə almağı üstün tutmuşdum.

... Ancaq həmin gün Göyçayda payız günəşi bərq vururdu. Şəhər başdan-başa al-əlvan bayram libasına bürünmüşdü. Hardan baxsan, hardan keçsən bu gözəlliyin, bu təmtərağın əsirinə çevrilirdin. Göyçayın ikinci bir rəmzi olan xan çinarların günəşdən qızarmağa, "alışıb-yanmağa" başlayan yarpaqları da sanki bu büsatı özünəməxsus pıçıltılarla vəsf edirdi. "Şahzadə"nin şərəfinə bütün şəhər nağıllı, nəğməli xoş bir tilsimə düşmüşdü sanki...

Qədim Şirvan elinin gündən-günə abadlaşan, inkişaf edib müasirləşən Göyçay şəhəri həmişəki əhval-ruhiyyədədir. Şəhərin giriş qapılarından tutmuş mərkəzə doğru bütün küçə və meydanlar, park və bağlar al-əlvandır. İnsanların üz-gözündəki sevincin başqa səbəbləri də var. Sakinlər indi modern bir şəhərə çevrilən doğma Göyçayın qürurunu yaşayırlar.

Bütün bunlar Dövlət Proqramlarında da qarşıya qoyulmuş vəzifələrin uğurlu həllinin, sosial-iqtisadi yüksəlişin və başqa fərəhli amillərin göstəricisidir. Yəni bu bayramlar, bu şənliklər Göyçayın halal haqqıdır.

... Bütün şəhər əhalisi, rayonun yaxın-uzaq kəndlərindən gələn dəstə-dəstə insanlar Göyçayı dünyada məşhurlaşdıran bu möcüzə meyvənin şəninə, şöhrətinə üz tutublar. Addımbaşı qələbəlikdi. Saat 12-yə qalmış qonaqlar Heydər Əliyev prospektinə açılan geniş meydana daxil olurlar. ABŞ-ın ölkəmizdəki səfiri Metyu Brayza, eləcə Rusiyanın, Ukraynanın, Qazaxıstanın və başqa dövlətlərin də səfirləri, Milli Məclisin üzvləri, dövlət məmurları, rayonlardan gəlmiş icra hakimiyyəti başçıları və nümayəndə heyətləri, tanınmış elm və mədəniyyət xadimləri, Bakıda və respublikanın digər şəhər və rayonlarında yaşayıb-çalışan göyçaylılar... Həmişəki kimi Rusiyada yaşayan məşhur iş adamı, milyarder Fərhad Əhmədov da hörmətli qonaqlar arasındadır.

Milli paltarlar geyinmiş oğlan və qızlar qonaqlara nar şirəsi və nar məhsulları təklif edirlər.

Eyni vaxtda proqrama uyğun müxtəlif tədbirlər bir-birini əvəz edir. "Göyçayım" mahnısının sədaları ətrafa yayılır. Uşaqlar qonaqlara bayram bukletləri, döş nişanları paylayırlar.

Nar maketi açılır, şarlar səmaya uçur...

Şahzadə Nar meydana daxil olur...

"Yallı" rəqsi... Və nar meyvələrinin bəhsi...

Musiqi məktəbi şagirdlərinin çıxışları...

Nar sərgilərinə baxış...

"İrəli" Gənclər İctimai Birliyinin təqdimatı...

"Yaşa kitab" sərgisi.

Və Heydər Əliyev Mərkəzinin qarşısında Ulu Öndərin abidəsi önünə gül dəstələrinin qoyulması, ümumxalq ehtiramının qürur anları...

Sonra Nar bayramı münasibəti ilə keçirilən xüsusi mərasim.

İlk olaraq Göyçay Rayon İcra Hakimiyyətinin başçısı Mənsur Məmmədov çıxış edərək qonaqları və bütün bayram iştirakçılarını salamlayır. O, rayonun sosial-iqtisadi və mədəni yüksəlişinə xüsusi qayğı və diqqət göstərən Azərbaycan Respublikasının prezidenti İlham Əliyev cənablarına göyçaylıların dərin minnətdar olduqlarını bildirir.

ABŞ-ın, Rusiyanın, Ukraynanın, Qazaxıstanın ölkəmizdəki səfirləri çıxış edərək ürək sözlərini söyləyirlər.

Hörmətli millət vəkili Fəttah Heydərovun çıxışı bayram iştirakçıları tərəfindən maraqla qarşılanır. Hamının ziyalı bir insan kimi tanıdığı Fəttah müəllim göyçaylılara sevinc dolu günlər, gözəl bayramlar arzulayır.

Azərbaycan Yazıçılar Birliyinin sədri Anar da qonaqlar arasındadır. Eləcə çoxdan tanıdığımız millət vəkilləri Şəmsəddin Hacıyev, Ceyhun Osmanlı, Sabir Hacıyev...

Bayram tədbirləri davam edir. Aş, nardança, kətə, yuxa, narşərab, nar şirəsi hazırlanmasına, rəssamların nara həsr olunmuş işlərinə baxış...

Qonaqların ənənəvi rəmzi nar ağacı əkməsi...

"AzNar"ın məhsullarından ibarət sərgiyə baxış...

Gözbağlayıcıların, aşıqların çıxışları, nar sıxmaq, nar yemək, tez və gözəl formada nar kəsmək yarışları və qaliblərin mükafatlandırılması...

Rayon idmançılarının və pəhləvanların göstəriləri...

Teatrlaşdırılmış folklor nümunələri...

Həmişəki kimi geniş proqramlı bayram konserti.

Sonda isə atəşfəşanlıq.

Məzahir ƏHMƏDOĞLU,

Azərbaycan Respublikasının

Prezidenti yanında kütləvi informasiya

vasitələrinin inkişafına dövlət dəstəyi fondunun

maliyyə yardımı ilə

Ədalət.-2011.-11 noyabr.-S.6.