Qədim Şəki yeni mərhələdə

(əvvəli ötən sayımızda)

2011-ci ilin 9 ayında rayonda iqtisadi və sosial sahələrin inkişafına bütün maliyyə mənbələri hesabına yönəldilmiş investisiyanın həcmi 46 milyon 80 min manat olmuşdur ki, bu da əvvəlki ilin müvafiq dövrü ilə müqayisədə 87,1 faiz çoxdur. İstifadə edilmiş investisiyanın 41 milyon 45 min manatı və yaxud 89 faizi dövlət mülkiyyətinin, 5 milyon 36 min manatı və ya 11 faizi qeyri-dövlət mülkiyyətinin payına düşür. Əsas kapitala yönəldilmiş investisiyanın 43 milyon 594 min manatı və ya 96,1 faizi tikinti-quraşdırma işlərinə sərf edilmişdir ki, bu da əvvəlki ilin müvafiq dövrü ilə müqayisədə 80,7 faiz çoxdur.

Şəkililər ölkə rəhbərinin əhalinin sosial müdafiəsi sahəsində yeritdiyi siyasəti yüksək qiymətləndirir, aztəminatlı əhali qrupuna göstərdiyi böyük diqqət və qayğının təzahürü kimi qəbul edir. Nazirlər Kabinetinin geniş yığıncağında çıxış edən Prezident demişdir: "Bu il 900 minə yaxın pensiyaçının pensiyası orta hesabla 40 faiz artmışdır. Bütövlükdə götürsək, 9 ayda Azərbaycanda pensiyaların səviyyəsi 35 faiz artmışdır. Bu, çox böyük göstəricidir, çox böyük nailiyyətdir, çox ciddi addımdır və yaşlı nəslin maddi cəhətdən daha da yaxşı təminatı üçün vaxtında atılmış çox düzgün və ədalətli bir addımdır".

2011-ci ilin 9 ayı ərzində 1771 ailəyə ünvanlı dövlət sosial yardımı təyin olunmuşdur. Hazırda 2287 ailəyə 246 min 141 manat məbləğində ünvanlı dövlət sosial yardımı təyin edilərək ödənilir. Ünvanlı Dövlət Sosial Yardımı təyin olunan ailələr arasında 851 ailə ilk dəfədir ki, bu yardımı alır. Şəki rayonu üzrə hər ailəyə düşən orta məbləğ 107 manat 62 qəpik, hər bir ailə üzvünə təyin edilən ünvanlı dövlət sosial yardımın orta aylıq məbləği isə 24 manat 80 qəpik təşkil etmişdir.

Dövlət Sosial Müdafiə Fondunun Şəki Şəhər Şöbəsi 2011-ci ilin 9 ayında 25947 nəfər əmək pensiyaçısına xidmət göstərmişdir. Həmin pensiyaçılardan 17282 nəfəri yaşa, 7016 nəfəri əlilliyə, 1649 nəfəri isə ailə başçısını itirməyə görə pensiya alanlardır. Əgər 2003-cü ildə pensiyaların orta aylıq məbləği 27 manat 19 qəpik idisə, 2011-ci ildə bu rəqəm 133 manat 70 qəpik olmuşdur. Bu ötən dövr ərzində pensiyaların orta aylıq məbləğində 5 dəfə artım deməkdir. Kənd yerlərində yaşayan pensiyaçılara plastik kartların verilməsi ilə əlaqədar xeyli işlər görülmüşdür. Artıq bütün pensiyaçılar plastik kartlarla təmin olunmuşlar. Hal-hazırda rayon ərazisində Beynəlxalq Bankın Şəki filialı tərəfindən 14 ədəd bankomat quraşdırılmış və aktiv fəaliyyət göstərir. Onlardan 8-i şəhərin mərkəzində, 6-sı kənd ərazisində yerləşir.

Şəki çörəkli şəhərdi

(ölkənin taxılçılıq bazası)

Ötən illərdə olduğu kimi, bu ilin 9 ayında da rayonda taxılçılığın, heyvandarlığın, meyvəçiliyin, üzümçülüyün inkişafı üçün bir sıra tədbirlər həyata keçirilmişdir. Respublikamızın ən iri taxılçılıq rayonlarından biri olan Şəkidə istehsal olunan taxıl ölkəmizin ümumi taxıl istehsalının 10-15 faizini təşkil edir. 2010-cu ilin payızında 2011-ci ilin məhsulu üçün 70446 hektar sahədə payızılıq taxıl əkini həyata keçirilmişdir. Taxıl zəmilərində yetişən məhsulun vaxtında və itkisiz yığılması üçün öncədən hazırlıq işləri aparılmışdır. Taxıl biçininin sürətləndirilməsi, biçinin vaxtında və itkisiz başa çatdırılması istiqamətində qarşıda duran vəzifələr şəhər icra hakimiyyəti başçısı yanında şuranın geniş iclasında müzakirə edilmiş və konkret tapşırıqlar verilmişdir. Bu il Şəkidə 238 min 585 ton taxıl istehsal olunmuşdur ki, bu da rayonun tarixində ən yüksək göstəricidir. Taxıl istehsalının həcminə görə Şəki respublikamızın rayonları arasında birinci yerdə durur. Hazırda rayonun bütün ərazilərində 2012-ci ilin məhsulu üçün payızlıq taxıl səpini həyata keçirilir. Cari ildə rayonda 70 min hektar sahədə payızlıq taxıl əkini nəzərdə tutulur.

Azərbaycan Respublikası Prezidentinin kənd təsərrüfatının inkişafına göstərdiyi diqqət və qayğının nəticəsi olaraq yerlərdə kənd təsərrüfatı məhsulları istehsalçıları güzəştli şərtlərlə mineral gübrələr və kənd təsərrüfatı texnikaları ilə təmin olunurlar.

Prezident dəfələrlə öz çıxışlarında ölkədə kənd təsərrüfatının, xüsusilə, taxılçılığın inkişaf etdirilməsi üçün konkret tapşırıq və tövsiyyələrini vermişdir. Nazirlər Kabinetinin iclasında Prezident demişdir: "Kənd təsərrüfatının inkişafı üçün konkret tədbirlər həyata keçirilir, proqramlar icra edilir və xüsusilə gələn il daha da böyük proqramlar icra ediləcəkdir. Dövlət bu sektorun inkişafı üçün çox böyük vəsait ayırır, güzəştlər verilibdir. Təsadüfi deyil ki, bu ilin 9 ayında kənd təsərrüfatı 7,6 faiz artmışdır. Bu sahə, eyni zamanda, böyük sosial məna daşıyır, çünki əhalinin təxminən yarısı aqrar bölgələrdə yaşayır".

Məhz cənab Prezidentin tapşırığı əsasında hazırda taxılçılığın inkişafı ilə bağlı təkliflər paketi hazırlanır. Bu baxımdan rayonda "Karat Holdinq" şirkəti tərəfindən Çələbi xan qəsəbəsi ərazisində, Dəmiryol stansiyasının yaxınlığında ümumi tutumu 16 min ton olan taxıl anbarı kompleksinin tikintisini əhəmiyyətli hesab etmək olar. Kompleks hər birinin 4 min ton tutumu olan 4 anbardan, inzibati bina və yardımçı tikililərdən ibarətdir.

Cari ilin 9 ayında Şəkidə yenidənqurma, tikinti-quruculuq işləri davam etdirilmiş, may ayında Şəki şəhər İcra Hakimiyyəti başçısının Sərəncamı ilə yaradılmış Şurada həyata keçiriləcək bütün tikinti, təmir və yenidənqurma işlərinin layihələri müzakirə edilmişdir.

(ardı gələn sayımızda)

MƏZAHİR ƏHMƏDOĞLU,

Azərbaycan Respublikasının Prezidenti

yanında kütləvi informasiya vasitələrinin

inkişafına dövlət dəstəyi fondunun maliyyə

yardımı ilə

Ədalət.-2011.-12 noyabr.- S.4.