Qədim Şəki yeni mərhələdə

(əvvəli ötən sayımızda)

2011-ci ilin 9 ayında əhaliyə göstərilən tibbi xidmətin səviyyəsini daha da yüksəltmək məqsədilə səhiyyə müəssisələrinin maddi-texniki bazasının yaxşılaşdırılması istiqamətində işlər davam etdirilmişdir. Uzun müddət təmirsiz qalan və əhalinin haqlı narazılığına səbəb olan Şəki Doğum Evi Kompleksində dövlət vəsaiti hesabına əsaslı təmir işlərinə başlanmışdır.

Qeyd etmək lazımdır ki, doğum evinin bazasında regional perinatal mərkəz də yaradılacaq. Həmçinin Aşağı və Baş Göynük kənd xəstəxanaları üçün yeni binaların tikintisinə başlanmış, Bideyiz kənd həkim məntəqəsi üçün yeni binanın layihə smeta sənədləri Səhiyyə Nazirliyinə təqdim olunmuşdur.

Sarıca, Çayqaraqoyunlu, Çapağan, Qayabaşı və İbrahimkənddə yeni tibb məntəqəsi, Cəyirli kəndində isə yeni həkim məntəqəsi tikilməsi üçün Səhiyyə Sektorunda İslahatlar layihəsinə müraciət olunmuşdur.

Müddət ərzində Səhiyyə Nazirliyinin Şəki Regional Qan Bankında qanvermə aksiyası, əhalinin demoqrafiya və sağlamlıq vəziyyətinin qiymətləndirilməsi məqsədilə demoqrafiya və sağlamlıq sorğusu keçirilmişdir. Azərbaycan Respublikası Səhiyyə Nazirliyi Milli Onkologiya Mərkəzinin mütəxəssisləri iyulun əvvəlində Şəkidə insanları müayinə etmiş, xəstələrə zəruri məsləhətlər vermişdir.

Doqquz ay ərzində mədəniyyət müəssisələrinin maddi-texniki bazasının yaxşılaşdırılması sahəsində bir sıra işlər görülmüşdür.

Şəhərin mədəniyyət və istirahət parklarında şəhər əhalisinin səmərəli istirahətinin təşkili üçün bir sıra tədbirlərin görülməsi işi davam etdirilmişdir. Müddət ərzində bir sıra mədəni-kütləvi tədbirlər keçirilmiş, tarixi günlər, bayram tədbirləri yüksək səviyyədə qeyd olunmuşdur.

2011-ci ilin 9 ayında Şəkidə cinayətkarlığa qarşı mübarizə, qanunçuluq və hüquq qaydalarının möhkəmləndirilməsi sahəsində bir çox işlər görülmüşdür.

Müddət ərzində 140 cinayət hadisəsi qeydə alınmış, Şəki Şəhər Rayon Polis Şöbəsi tərəfindən keçirilən əməliyyat-axtarış tədbirləri nəticəsində narkomaniya ilə bağlı 24 fakt aşkar edilmişdir.

Şəki Rayon Prokurorluğunda vətəndaşların müraciətlərinə - təklif, ərizə və şikayətlərinə baxılmasına da xüsusi diqqət yetirilmişdir.

Respublikamızda ordu quruculuğunun möhkəmləndirilməsi, gənclərin hərbi xidmətə çağırışının həyata keçirilməsi, hərbi-vətənpərvərlik tərbiyəsi ölkə rəhbərliyinin daim diqqət və nəzarətindədir. Şəki Şəhər İcra Hakimiyyəti rayon ərazisində yerləşən hərbi hissələrlə daim əlaqə saxlamış, hərbi hissələrin yerli əhəmiyyətli problemlərini öyrənmiş, onların həlli istiqamətində bir çox tədbirlər həyata keçirmişdir.

Rayon sakinləri səyyar qəbullardan razılıq edir

2011-ci ilin 9 ayında 585 nəfər vətəndaş Şəki Şəhər İcra Hakimiyyəti başçısı tərəfindən qəbul edilmişdir. Müddət ərzində şəhər icra hakimiyyətinin başçısı tərəfindən təsdiqlənmiş qrafikə əsasən 37 səyyar qəbul keçirilmiş, qəbullarda 4007 nəfər iştirak etmişdir. Keçirilmiş qəbullarda 363 nəfər vətəndaş dinlənilmiş, 469 müraciət səslənmişdir.

Həmin müraciətlərin 97-i şikayət formasında, 372-i təklif formasında olmuşdur. Səyyar qəbullar zamanı edilmiş müraciətlər əsasən yolların təmiri, kəndlərə təbii qazın verilməsi, köhnəlmiş elektrik dirəklərinin və xəttlərin dəyişdirilməsi, sosial obyektlərin təmiri və yenilərinin açılması, su probleminin həlli, torpaq və digər məsələlərlə bağlıdır. Müddət ərzində Şəki Şəhər İcra Hakimiyyətinə 3070 müraciət daxil olmuşdur. Bunların 2215-i vətəndaşlar tərəfindən, 855-i isə respublikanın yuxarı orqanlarından daxil olan müraciətlərdir.

"Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı"na əsasən yaxın üç ildə rayonumuzun sosial-iqtisadi inkişafının gücləndirilməsi, ərazinin infrastrukturunun yenidən qurulması üçün bir sıra mühüm layihələrin həyata keçirilməsi nəzərdə tutulmuşdur.

Qarşıda duran mühüm məsələlərdən biri sənaye və kənd təsərrüfatı istehsalının genişləndirilməsi və ərazinin təbii sərvətlərindən səmərəli istifadə olunmasına nail olmaqdır.

Bununla yanaşı yol təsərrüfatı və nəqliyyat infrastrukturunun möhkəmləndirilməsi, elektrik enerjisi, istilik və qaz təchizatı, rabitə xidmətinin yaxşılaşdırılması, su təchizatının və kanalizasiya sisteminin yenidən qurulması, meliorasiya və irriqasiya sahəsində mühüm işlərin davam etdirilməsi olduqca vacibdir.

Şəki rayonu haqqında bu dəfəki söhbətimizə yekun vurarkən qeyd etmək lazımdır ki, sakinlərin gələcək uğurlara inamları böyükdür. Bunu bu gün Şəkidə aparılan geniş miqyaslı quruculuq işləri də bir daha təsdiqləyir.

Məzahir Əhmədoğlu,

Azərbaycan Respublikasının Prezidenti

yanında kütləvi informasiya vasitələrinin

inkişafına dövlət dəstəyi fondunun maliyyə

yardımı ilə

Ədalət.-2011.-16 noyabr.-S.6.