Gözəlliyin və modernləşmənin harmoniyası

(əvvəli 18 noyabr sayımızda)

Təhsil, səhiyyə,mədəniyyət...

2011-ci ilin 9 ayında təhsil, səhiyyə, mədəniyyət, gənclər və idman sahəsində də məqsədyönlü işlər aparılmış, təhsil müəssisələrinin maddi-texniki bazasının möhkəmləndirilməsi, təlim-tərbiyə və tədrisin keyfiyyətinin yüksəldilməsinə diqqət artırılmışdır.

Cari ildə XI sinfi bitirmiş məzunlardan 687 nəfəri ali və orta ixtisas məktəblərinə ərizə vermiş, onlardan 225 nəfəri tələbə adını qazanmış, 13 nəfər abituriyent 600-dən, 33 nəfəri isə 500-dən yuxarı bal toplamışdır.

2011-ci ilin 9 ayında MRX-da və kənd səhiyyə obyektlərində tikinti abadlıq işləri aparılmış, rayonda səhiyyə xidmətinin vəziyyətini daha da yüksəltmək məqsədi ilə Əliabad qəsəbə, Suvagil, Danaçı kənd xəstəxanaları və uşaq poliklinikası yeni inventar və bərk avadanlıqlarla təchiz edilmiş, Maqov kənd həkim məntəqəsi yenidən tikilmiş, Danaçı kənd xəstəxanasının dam örtüyü əsaslı təmir olunmuş, Uşaq poliklinikası əsaslı təmir edilmiş binaya köçürülmüşdür.

Son illərdə yenidən qurulmuş, əsaslı təmir olunmuş mədəniyyət müəssisələrinin yeni texniki avadanlıqla, kompyuterlərlə, müxtəlif inventarlarla, səs gücləndirici aparatlarla təmin edilməsinə diqqət artırılmış, Dardoqqaz kəndində yeni mədəniyyət müəssisəsi tikilib istifadəyə verilmişdir.

Avropa Şurası, Mədəniyyət və Turizm Nazirliyinin və 10 rayonun nümayəndələrinin iştirakı ilə rayonda "Tarixi şəhərlərdə mədəni irsin bərpası" layihəsinin 2-ci mərhələsi keçirilmişdir. 2011-ci il "Turizm ili" çərçivəsində rayonda turizm peşə məktəbinin yaradılması ilə bağlı təkliflər hazırlanmış, tarixi mədəni irsin qorunması və bərpası məqsədilə işlər aparılır.

İdmançılar qələbələri sıralayır

Respublika Prezidenti İlham Əliyevin Azərbaycan gəncliyi ilə bağlı 2011-2015-ci illəri əhatə edən Dövlət Proqramının hazırlanması ilə əlaqədar sərəncamı bir daha göstərir ki, dövlətimiz Azərbaycan gəncliyinin inkişafına xüsusi diqqət yetirir. 2011-ci ilin 9 ayı ərzində Gənclər və idman sahəsində bir sıra işlər görülmüş, respublika gənclər forumuna nümayəndələr seçilmişdir.

Cüdo, sərbəst-güləş və digər idman növləri üzrə keçirilən yeniyetmə, gənclər və böyüklər arasında Respublika birinciliklərində, Rəşid Məmmədov, Dilqəm Əliyev, Tofiq Osmanov, İsa Hüseynov, Mehdi Qoca, Ramazan Qasarayev, Ramazan Həsənov, Şamil Makarov, Cavid Əliyev, Elşən Kərimov, Oruc Vəlizadə, Türkan Aslanova, Elvira Butdayeva, Arzu İsayeva, Nərmin Uburova, Mariana Doluxanova, Manə Mollayeva kimi idmançılar qalib adını qazanmışlar.

Beynəlxalq yarışlarda isə Gözəl Zutova Bakı şəhərində keçirilən Heydər Əliyevin xatirəsinə həsr olunmuş sərbəst-güləş üzrə "Qızıl Qran-Pri" Beynəlxalq turnirində II yer, Orxan Hacıağalı Kiyevdə keçirilən cüdo üzrə Gənclər arasında Avropa kubokunda I yer, Ramin Qurbanov Estoniyada keçirilən cüdo üzrə kişilər arasında Dünya Kubokunda II yer və Sloveniyada keçirilən dünya kubokunda III yer, Xədicə Xəlilova Belqradda keçirilən şahmat üzrə XXI Beynəlxalq şahmat festivalında I yerə layiq görülərək dövlətimizin bayrağını yüksəklərə qaldırmışlar.

Cinayətkarlığa qarşı mübariz

Qanunçuluğun və hüquq qaydalarının möhkəmləndirilməsi, cinayətkarlıqla mübarizə işinin təşkili sahəsində rayonun hüquq-mühafizə orqanları ilə əlaqəli fəaliyyəti təmin olunmuş, profilaktika, əməliyyat axtarış tədbirləri davam etdirilmişdir.

2011-ci ilin 9 ayında 102 cinayət hadisəsi qeydə alınmış, cinayətlərin 96,4 faizinin açılması təmin olunmuşdur.

Rayonda Azərbaycan Respublikası Daxili İşlər Nazirliyi tərəfindən "Xaş-xaş" şərti adı altında kompleks əməliyyat-axtarış profilaktik tədbirlər mütəşəkkil keçirilmiş, rayon komissiyası tərəfindən bu tədbirlərə mütəxəssis ayrılmış, aidiyyəti təşkilatların fəaliyyəti əlaqələndirilmişdir.

Keçirilmiş əməliyyat-axtarış tədbirləri nəticəsində rayon ərazisində 11,5 ha sahədən yabanı halda bitmiş 25 ton 290 kq tərkibində narkotik maddə olan bitki aşkar olunub məhv edilmişdir.

Elektron hökumət

Nazirlər Kabinetinin geniş iclasında Prezident Respublikada elektron hökumətin yaradılması ilə bağlı konkret təkliflərin olduğunu xüsusi vurğulamışdır. Zaqatala rayon icra hakimiyyəti işdə informasiya kommunikasiya texnologiyalarının tətbiqinə, şəhər, qəsəbə və kənd inzibati ərazi dairələri üzrə nümayəndəliklərində kargüzarlığın elektron üsula keçirilməsinə diqqəti artırmışdır. Hazırda əksər nümayəndəliklər üçün xüsusi elektron poçt ünvanları yaradılmış və yazışmalar elektron üsulla həyata keçirilir. Eyni zamanda idarəetmədə çevik iş, stil və metodlarından istifadə olunmasına xüsusi fikir verilmiş, düzgün kadr siyasətinin həyata keçirilməsi, dövlət qulluğu vəzifələrinə gənc, bacarıqlı müasir kompyuter proqramları və bilgilərinə malik kadrların irəli çəkilməsi diqqət mərkəzində saxlanılmışdır

Görüşlər, qəbullar...

Vətəndaşların arzu, istək və problemlərinin öyrənilməsində RİHB-nın yerlərdə keçirdiyi görüşlərin, səyyar qəbulların - vətəndaşlarla birbaşa dialoqların çox böyük əhəmiyyəti vardır.

2011-ci ilin 9 ayında keçirilən RİHB-nın 34 səyyar qəbulunda 5500-dən artıq adam iştirak etmiş, 239 tənqidi qeyd və təklif irəli sürülmüşdür.

9 ayda rayon icra hakimiyyətinə daxil olmuş 1509 ərizə və 1149 şifahi müraciətin 95 faizi aparatın şöbələrində baxılmış, ərizələrin 64 faizi nəzarət qaydasında araşdırılmışdır.

RİH-nə daxil olan şikayət xarakterli ərizələrin əsasını torpaq mübahisələri, bələdiyyələrin və xidmət təşkilatlarının fəaliyyəti, ünvanlı sosial yardım tələbi, həyətyanı torpaq sahələrinin sənədləşməsi ilə bağlı şikayətlər təşkil etmişdir.

2011-ci ilin 9 ayı ərzində rayonda ictimaiyyət nümayəndələri, siyasi partiyalar və ictimai birliklərin iştirakı ilə 63 ümumrayon toplantısı, Azərbaycan Respublikasının Prezidenti İlham Əliyevin məruzə və nitqlərində ölkənin ictimai-siyasi həyatında baş verən hadisələrlə bağlı fikirlərin, sosial-iqtisadi inkişaf və həyata keçirilən geniş miqyaslı layihələr haqqında analitik materialların operativ qaydada əhaliyə çatdırılması məqsədi ilə təbliğat qrupları tərəfindən 90 görüş keçirilmiş və bu tədbirlərdə minlərlə adam iştirak etmişdir. Ümumrayon toplantılarında zaqatalalılar doğma rəhbərlərinə, ümummilli lider Heydər Əliyevə hədsiz məhəbbət və rəğbət hissi nümayış etdirmiş, dövlətçiliyin daha da möhkəmləndirilməsi və inkişaf etdirilməsi, ölkədə vətəndaş cəmiyyətinin formalaşdırılması, milli həmrəyliyin yaradılması, xalqımızın milli-mənəvi dəyərlərinə hörmətlə yanaşılması, vətənpərvərlik və azərbaycançılıq ideyalarının ictimaiyyətə çatdırılması yolunda Prezident İlham Əliyevə daim dəstək olacaqlarını bildirmişlər.

Məzahir ƏHMƏDOĞLU,

Azərbaycan Respublikasının Prezidenti

yanında kütləvi informasiya vasitələrinin

inkişafına dövlət dəstəyi fondunun maliyyə

yardımı ilə

Ədalət.-2011.-22 noyabr.- S.6.