Hacıqabul qışın astanasında

Bu il ölkəmizə qış gözlədiyimizdən xeyli tez gəlib deyəsən. Əslində qış fəslinin başlanmasına hələ bir aydan çox vaxt var. Ancaq son zamanlar ölkə ərazisində tüğyan edən qarlı, yağışlı hava şəraiti elə əsil qış ovqatıdır. Ağaclardan tökülən saralmış yarpaqları yorulmuş ayaqlarımızla xışıldada-xışıldada xəyallara dalmağa macal tapmamış yağmurlu, soyuq günlər başımızın üstünü aldı.

Heç şübhəsiz ki, qışın qayğıları daha çoxdur. İstər sosial-iqtisadi baxımdan, istərsə də vaxt-zaman, hətta ovqat baxımından. Əslində ovqat, yaşam tərzi elə dolanışıqdan, şəraitdən daha çox asılıdır. Heç bir ciddi problemi olmayan sosial qayğılarla əhatə edilmiş həyat öz ampulasında olmaqla öz aurasını da yaradır.

Bütün bunlarla bərabər ömrün pillələri kimi fəsillər də, aylar da öz yerində olsa yaxşıdır. İndi rastlaşdığımız hava şəraiti də 40-45 yaşlı bir adamın əsa ilə gəzməsi kimi xeyli təəccüblüdür.

Ancaq reallıq budur ki, ölkə ərazisində əsil qış ab-havasıdır, havalar da ki, kifayət qədər soyuq keçir.

"Qışda sərfiyyat daha çox olur"

İnsanların hər gün ehtiyac duyduqları ən vacib həyati və sosial qayğılardan biri də elektrik enerjisidir. İlin soyuq fəsillərində əyalətlərdə elektrik enerjisinin qiymətini isə burda yaşayanlar bilir. Çünki hələ bütün qəsəbələrimiz, kəndlərimiz alternativ istilik mənbəyi tapmadığından işıqdan qidalanmağa məcburdur.

Hacıqabul Elektrik Şəbəkəsinin müdiri Sərdar Mirhüseyn oğlu Şirinovla axşam görüşsəm də, ona qədər burda mövcud vəziyyət haqqında xeyli bilgi ala bilmişdim. Hazırda 54 nəfər işçisi olan kollektiv indi demək olar ki, tam ixtisas sahibləri olan gənclərdən ibarətdir. Əksəriyyətinin ali təhsili olan bu gənclərin bu gün işləri daha çoxdur. Müasir texnologiya ilə işləyən bu insanlar, həm də abonentlərə müasir dövrün tələblərini anlatmalıdırlar. Elektrik enerjisinin istismarı qaydalarına əməl etməyən hər bir abonent hər an faciə ilə qarşılaşa bilər.

Onu da öyrənə bildim ki, artıq rayon mərkəzi tamamilə kabelləşməklə sayğaclaşdırılıb. Rayonda isə 16 kənd bu prosesi yaşamalı və başa vurmalıdır. Bu iş xeyli çətindir, ona görə ki, sayğaca qədər həmin ərazi mütləq kabelləşməli, dirəklər yenilənməli, transformatorlar saz vəziyyətdə olmalıdır. Rayonda isə 60-cı illərin "yadigarları" hələ kifayət qədərdir. Buna baxmayaraq kollektiv Hacıqabulda abonentlərin elektrik enerjisini fasiləsiz almağa çalışır. Rayonda abonentlərin sayı 13500 nəfərdir, 13250 sayğac isə artıq mənzilə çatdırılmışdır. Deməli, tezliklə Hacıqabul rayonu tamam sayğaclaşdırılacaq. Bu isə o deməkdir ki, rayonun elektrik təsərrüfatı yeniləşməklə bərabər enerji itkisinə də yol verilməyəcək. Bu gün 510 transformator Hacıqabula verilən elektrik enerjisini abonentlərə paylayır.

Dediyim kimi şər qarışanda görüşə bildiyim şəbəkənin müdiri Sərdar Şirinovla söhbətimiz maraqlı keçdi:

- Ərazidən indi qayıdırıq, qış qapının ağzındadır, gərək sakinlərimiz bu sarıdan korluq çəkməsin. Bildiyiniz kimi soyuq aylarda işlərimiz bir qədər də çoxalır. Bu da təbiidir, çünki elektrik enerjisinin üzərinə digər sosial qayğılar da yüklənir. Çalışırıq ki, ərazimizdə elektrik enerjisi normada, fasiləsiz olsun. Bu isə elə də asan deyil. Udulu və Pirsaat ərazisində daim külək var. Qarlı, yağışlı havada burdakı dirəklərin aşma hallarına daha tez-tez rast gəlinir. Pirsaat çayının sağ və sol sahillərinə səpələnmiş evlərdə də məsafə xeyli uzaq olduğundan müxtəlif texniki nasazlıq burda bir qədər ardıcıl baş verir. Ancaq bütün hallarda abonentlərin elektrik enerjisi ilə təmin olunması əsas işimizdir, baxmayaraq ki, qışda sərfiyyat daha çox olur. Elektrik enerjisindən qanunsuz istifadə edənlər də tapılır. 33 nəfəri itirilmiş elektrik enerjisinin bərpası üçün 12087 manat həcmində cərimə etmişik. Ondan 8582 manatı artıq ödənilib. Daha nə demək olar, "Azenerji" tərəfindən gücləndirilmiş iş rejiminə keçməklə əlaqədar telofonoqramma almışıq. Biz ona çox ciddi əməl edirik, çünki qış hələ qabaqdadır.

Mavi qaz bütün evlərdə yanacaq

Şaxtalı havalarda mavi qazın yerini nə verə bilər? Xüsusən də kənd yerlərində. Demək olar ki, heç nə. Ona görə Azərbaycan dövlətinin ölkəni başdan-başa qazlaşdırma siyasəti çox təqdirəlayiqdir.

71 nəfər işçisi olan Hacıqabul rayon Qaz İstismar sahəsi bu gün doğrudan ən məsuliyyətli anlarını yaşayır. Çünki 2012-ci ildə qaz çəkilişi rayon üzrə başa çatdırılacaq. Hacıqabul bu sahədə ölkədə birinci olacaq. Lap uzağı gələn ilin axırlarına yekunlaşacaq bu proses artıq başlanmışdır. Hacıqabul şəhəri mavi qazla tam təmin edilmiş və hazırda heç bir problem, narazılıq yoxdur. Bu gün rayonun 9 yaşayış məntəqəsində mavi qazdan istifadə edilir. Ən sevindirici hal odur ki, bir neçə gün ölkədə tüğyan edən kəskin hava şəraitində mavi qazla təmin edilən abonentlərin heç birindən şikayət daxil olmayıb:

- Şikayət ona görə daxil olmayıb ki, biz buna imkan verməmişik. Polietilen borularla evlərə, sənaye müəssisələrinə verilən mavi qazın heç bir problemi olmadığı kimi, itkisi də ola bilməz. Təsəvvür edin, 16-cı aydır ki, dövlətdən aldığımız mavi qazın dəyərini tam ödəyə bilirik. Ötən ay 816 min kub metr Hacıqabul rayonu mavi qaz alıb, pulu da yüz faiz yığılaraq ödənişə verilib. Yığılıb deyəndə mavi qazla təmin edilən hər bir abonentin SMART kartı var. Abonent həmin karta yüklədiyi pulun miqdarında da qaz ala bilir. Burda itkidən söhbət gedə bilməz. Bu günkü istehlakçılarımızın sayı hələlik 9172-dir. Hacıqabul rayonunda qazlaşma prosesi tam başa çatandan sonra ümumi abonentlərin sayı 14523 olacaq. Rayonun 30 yaşayış məntəqəsi ömrü 70 ildən çox olan polietilen borularla qazlaşdırılandan sonra bir qədər rahat nəfəs almaq olar. İndi işin qızğın vaxtıdır, o biri tərəfdən də qış qapını kəsdirib. Ancaq kəndlərdə mavi qazın yerini heç nə verməz. Rayonun ən uca kəndlərindən olan Şorbaçı, Paşalı 1, Paşalı, Cəngən kəndlərində bu gün bu sosial məsələ həll olunubsa, demək 2012-ci ilin sonlarında Hacıqabul rayonu tam qazlaşdırılacaq. Onu da əlavə etmək lazımdır ki, yaşayış məntəqələri bir-birindən kifayət qədər uzaqda yerləşdiyindən xeyli də vəsait tələb olunur. Bu gün həm qışa hazırlıq, həm də qaz çəkilişi aparırıq. Heç bir problemimiz də yoxdur. Müdirimiz Elşən Rəhimovun xüsusi əziyyətini, əməyini qeyd etməyiniz lap yerinə düşər.

Bunları idarənin baş mühəndisi Elxan Ələkbərov dedi.

Qışın qapının ağzında olmasına baxmayaraq Hacıqabul rayonu buna hazırdır. Ancaq şaxtalı günləri qəzasız, elektrik enerjisinə fasilə vermədən yaşamaq üçün gərgin işləmək, işə nəzarət etmək lazımdır.

(Ardı gələn sayımızda)

Səxavət Məmmədli,

Azərbaycan Respublikasının

Prezidenti yanında kütləvi informasiya

Vasitələrinin inkişafına dövlət dəstəyi

fondunun maliyyə yardımı ilə

Ədalət.-2011.-22 noyabr.- S.7.