İstanbulda oxunan kitablarımız

 

Türkiyə paytaxtındakı beynəlxalq sərgidə özümüz də iştirak etdik, sözümüz də, səsimiz də...

Noyabrın 12-dən 15-dək İstanbulda Beynəlxalq Kitab Sərgisi keçirilib. 600-dən çox yerlixarici nəşriyyat evi, kitab yayımı ilə məşğul olan qurumların qatıldığı tədbirdə Azərbaycan təmsilçiləri də iştirak edib. Mədəniyyət və Turizm Nazirliyinin mətbuat xidmətinin rəhbəri, "Mədəniyyət" qəzetinin baş redaktoru İntiqam Hümbətov da nüfuzlu tədbirdə iştirak edən qonaqlar sırasında olub. Mədəniyyət və Turizm Nazirliyinin qardaş ölkəyə göndərdiyi nümayəndə heyətinin üzvü kimi tədbirə qatılan müsahibimiz İstanbul Beynəlxalq Kitab Sərgisi barədə təəssüratlarını bizimlə bölüşür:

"İstanbul Beynəlxalq Kitab Sərgisi miqyasına görə dünyanın ən böyük və nüfuzlu sərgilərindən sayılır. İlk dəfə 1982-ci ildə keçirilən bu sərgi 6 ildir ki, beynəlxalq status qazanıb və dünyanın müxtəlif ölkələrini təmsil edən naşirlər, poliqrafiya mütəxəssisləri, yazıçı və şairlər onun işində yaxından iştirak edirlər. Təkcə ötən il Türkiyə paytaxtında təşkil olunan sərgini ziyarət edənlərin sayı 410 mindən çox olub. Bu dəfə İstanbul Beynəlxalq Kitab Sərgisi 30-cu yubileyini qeyd edirdi. Yubiley ovqatı iştirakçı dövlətlərin sayında da, ziyarətçilərin çoxluğunda da özünü biruzə verirdi. Yüksək təşkilatçılığı ilə seçilən kitab sərgisində 600-dən çox yerli və əcnəbi nəşriyyat evi, kitab yayımı qurumu təmsil olunurdu".

İntiqam Hümbətovun sözlərinə görə, Türkiyə paytaxtındakı məşhur TÜYAP Sərgi Mərkəzində açılışı gerçəkləşən 30-cu Beynəlxalq Kitab Sərgisində Azərbaycanı mədəniyyət və turizm nazirinin birinci müavini Vaqif Əliyevin rəhbərliyi ilə nümayəndə heyəti təmsil edib: "Nümayəndə heyətinə Mədəniyyət və Turizm Nazirliyinin Nəşriyyat, reklamın təşkili və informasiya şöbəsinin müdiri Vaqif Bəhmənli, Nəşriyyat sektorunun müdiri Çingiz Əlioğlu, Nəşriyyat, reklamın təşkili və informasiya şöbəsinin məsləhətçisi Faiq Xudanlı, Yazıçılar Birliyinin katibi, "525-ci qəzet"in baş redaktoru Rəşad Məcid, filologiya elmləri doktoru, professor Nizaməddin Şəmsizadə və şair Səlim Babullaoğlu daxil idi. Böyük təntənə ilə keçən açılış mərasimində Türkiyənin mədəniyyət və turizm naziri Ərtoğrul Günay çıxış etdi, İstanbul Beynəlxalq Kitab Sərgisinin əhəmiyyətindən danışdı. Nazir kitab sərgisinin ildən ilə daha geniş coğrafiyanı əhatə etdiyini bildirdi".

60 min kvadratmetr ərazini əhatə edən sərgidə 10-dan artıq salonda nümayiş etdirilən kitablar arasında Azərbaycan naşirlərinin də məhsulları olub. İntiqam Hümbətov Azərbaycan pavilyonunun böyük maraqla qarşılandığını xüsusi qeyd etdi: "Mədəniyyət və Turizm Nazirliyinin sifarişi əsasında qurulan sahə həcminə, tərtibatına, kitabların rəngarəngliyinə və keyfiyyətinə görə ilk gündən diqqət mərkəzinə düşdü. Bunu Azərbaycan pavilyonuna gələn ziyarətçilərin sayından da görmək mümkün idi. İstanbul Beynəlxalq Kitab Sərgisinə gələnlər son illər Azərbaycanda nəşr edilən kitab və çap məhsullarına diqqətlə tamaşa etdilər. Bu da səbəbsiz deyildi. Çünki bizim stendlərdə nümayiş etdirilən kitablar, digər çap məhsulları ölkəmizin qədim tarixi, zəngin mədəniyyəti və bugünkü inkişafı barədə dolğun təəssürat yaradırdı. Tanınmış yazıçı və şairlərinizin kitabları da sərgiyə gələnlərin diqqətini çəkirdi".

İntiqam Hümbətov bildirdi ki, İstanbul Beynəlxalq Kitab Sərgisi çərçivəsində noyabrın 13-də ölkəmizlə bağlı maraqlı tədbir keçirilib. "Kitabi-Dədə Qorqud"dan Nizami Gəncəviyə, Nizami Gəncəvidən bu günə Azərbaycan şeiri" adlı beynəlxalq konfrans Rəşad Məcidin aparıcılığı ilə baş tutub: "Mədəniyyət və turizm nazirinin birinci müavini Vaqif Əliyev dövlət müstəqilliyinin 20-ci ildönümünü qeyd edən ölkəmizin son dövrdə bütün sahələrdə olduğu kimi, mədəniyyət sahəsində də önəmli uğurlara imza atdığını tədbir iştirakçılarının diqqətinə çatdırdı. Filologiya elmləri doktoru, professor Nizaməddin Şəmsizadə "Kitabi-Dədə Qorqud"dan Nizami Gəncəviyə, Nizami Gəncəvidən bu günə Azərbaycan şeiri" adlı məruzə ilə çıxış etdi. Tanınmış alim Azərbaycan poeziyasının dünəni və bu günü barədə ətraflı məlumat verdi. Öz şeirlərini oxuyan Vaqif Bəhmənli, Çingiz Əlioğlu, Səlim Babullaoğlu isə tədbirə xüsusi ovqat gətirdi. Azərbaycanın İstanbuldakı baş konsulu Həsən Zeynalov öz çıxışında belə tədbirlərin ölkəmizin təbliği baxımından mühüm rol oynadığını diqqətə çatdırdı".

Müsahibimiz qeyd etdi ki, konfransda iştirak edənlər Azərbaycan muğamlarını da dinləyiblər. Xalq artisti Mələkxanım Əyyubovanın ifası maraqla qarşılanıb. İstedadlı xanəndəni xalq artistləri tarzən Möhlət Müslümov və kaman ustası Fəxrəddin Dadaşov müşayiət edib.

İki gün davam edən İstanbul Beynəlxalq Kitab Sərgisi böyük uğurla başa çatıb.

 

 

E.CƏBRAYILOĞLU

 

Ədalət.-2011.-22 noyabr.- S.8.