Dağlara sığınmış Lerik

Lənkərandan Lerikə uzanan, 2005-ci ildə əsaslı təmir edilən yeganə magistral şosse yolu demək olar ki, indi kimsəsizdir. Cəmi 56 kilometr uzunluğu olan bu yolu yayda getmək xeyli çətindir. Aranın istisindən dağlara - Lerikdəki istirahət mərkəzlərinə, buz bulaqlara, səfalı kəndlərə şütüyən maşınlar indi gözə dəymir.

Lerikə çatmamış Bazaru çayı boyunca sıralanmış "Təbəssüm", "Həyat", "Qala", "Meşəbəyi", "Cənub", "Relax" kimi turizm və istirahət mərkəzlərində indi tam sakitlikdir. Ölkəyə bivaxt gələn soyuqlar dağlarda daha tez hiss edilir. Meşəli dağlar payızın bütün gözəlliyini hələ yaşamamış noyabrın əvvəllərində yağan güclü qar ağacların min rəngə çalan yarpaqlarını vaxtsız xəzan edib. Yaşıl yamaclardakı çökəkliklərdə, ağac kollarının ətrafında toparlanmış qar zolaqları qışın xeyli tez gəldiyindən xəbər verir.

Payızın lap əvvəllərində Lənkərana və Lerikin aşağı kəndlərinə düşən güclü leysan yayda çox rahat olan bu magistral yola xeyli ziyan vurub. Lerikin Piran kəndi ərazisində, 17-ci kilometr deyilən yerdə dağ uçqunları yollara divan tutub. Sel suları asfalt örtüyü bir neçə yerdən yuyub aparıb. Təmir olunmasına baxmayaraq indi bu yol o yol deyil. Neyləmək olar, bəzən təbiətin şıltaqlığı bizə çox baha başa gəlir. Aylarla, illərlə qurub-yaratdığımızı bir andaca məhv edi

Yeni binanın ayağı düşərli olub

Lerikdə həmişə ilk görüşdüyüm, rayon haqqında ümumi məlumat toplamaqda mənə yardımçı olan rayon İcra Hakimiyyəti ictimai-siyasi şöbəsinin müdiri Əlpənah Bayramovla söhbətimiz yenə xeyli səmimi alındı. 3 mərtəbəli, çox geniş və rahat, müasir üslubda inşa edilmiş Lerik rayon İcra Hakimiyyətinin yeni inzibati binası mübaliğəsiz gözəl və möhtəşəmdir:

- Hə bu bizim yeni inzibati binamızdır. Mənə elə gəlir bu binadan rayonların heç birində yoxdur. Səliqə-səhmanını rahatlığını özün görürsən, "kombi" deyilən ayrıca istilik xətti də var. 2008-ci ildən tikintisinə başladığımız bu binanın geniş konfrans, iclas zalı ilə bərabər 27 otağı var.

Elə naharımızı da burdakı 3 otaqlı yeməkxanada edirik, keyfiyyətli yemək hazırladığımızı da ki, bilirsən. Binanın açılışı bizə düşərli oldu, həmin gün - 18 iyun 2011-ci ildə Lerikə gələn ARDNŞ-nin prezidenti, deputat Rövnəq Abdullayev, burdan Milli Məclisin millət vəkili seçilən İqbal Məmmədov həm də 6 kəndin mavi qaz açılışında iştirak etdilər. Rayonun Cəngəmiran kəndində keçirilən bu açılış mərasimində digər qonaqlarımız da var idi. Bu 6 kəndə - Cəngəmiran, Pirzəküçə, Blaband, Lüləkəran, Xəlfəküçə, Osnağaküçə kəndlərinə - qaz kəməri çəkmək üçün bilirsən hansı əziyyətlər çəkmişik? Çətin dağ relyefində, çətin şəraitdə 40 kilometr uzunluğunda olan bu qaz xətti həm də çox qısa vaxta çəkilib. 36 yol, 6 çay keçid, 12 kilometr məsafədə sıldırım qayalıqlardan, 10 kilometr sıx meşələrdən keçən bu mavi qaz 3700 nəfər sakinə, 515 abonentə xidmət edəcək.

Bu Lerikin tarixində çox əlamətdar hadisədir. Cəngəmirandakı daxili imkanlar hesabına tikilmiş 35 yerlik uşaq bağçasının açılışı da elə həmin gün oldu. 2006-cı ildən Lerik şəhərinin 9500 nəfər əhalisi mavi qazdan istifadə edir, ancaq kəndlərimizdə bu ilk dəfədir.

Gələcəkdə digər kəndlərə də qaz çəkilişi nəzərdə tutulub. Bu əla bir şeydir, kəndlinin canı odun daşımaqdan, meşələr qırılmaqdan qurtarar. Deyəsən mavi qazdan çox danışdım, hə? Rayonumuzdakı yenidənqurma abadlıq işlərini də özün gəzib görmüsən.

Gözəllik ondur,doqquzu dondur

Belə götürəndə Lerik şəhəri elə də böyük deyil, amma dağlara sığınmış, dərələrə səpələnmiş fərdi evlər xeyli ərazini əhatə edir. Enişli-yoxuşlu küçələrin demək olar ki, hamısı asfaltlaşdırılıb, səkilər xırda daş örtükləri ilə döşənib.

Onsuz da yaşıllığı çox olan Lerik qəsəbəsinin mərkəzinə yeni dekorativ ağaclar, kollar əkilir. Rayonda 2011-ci ilin 9 ayı ərzində ümumi maliyyə mənbələri hesabına tikinti sahəsində 5323,8 min manat məbləğində iş görülmüşdür.

Lənkəran-Lerik yolu boyunca, Qosmalian, Binə kəndlərində turizm istirahət mərkəzləri, Lerik şəhərində, digər ərazilərdə bir-birindən yaraşıqlı yeni ticarət və iaşə obyektləri fəaliyyətə başlamışdır. Rayon ərazisində, əsasən Lerik şəhərində 4264 kvadrat metr istinad divarı bərpa edilib. 140 kvadrat metr divar çay daşı, 2684 kvadrat metr sahə ağ lay plitələrlə üzlənmişdir. Səkilərə 1698 kvadrat metr ağ lay plitəsi, 1830 kvadrat metr tamet plitəsi döşənmişdir. Rayon mərkəzində müasir işıqlandırma sistemi 149 ədəd estetik cəhətdən daha gözəl elektrik dirəkləri ilə əvəzlənmişdir.

Şəhərin N.Nərimanov, A.Əsədullayev, C.Cabbarlı, Nizami küçələri əsaslı təmirdən, yeni işıqlandırma sistemindən sonra daha baxımlıdır. Qəsəbənin mərkəzində bir neçə kommunal, fərdi yaşayış evlərinin köhnə, yöndəmsiz dam örtükləri təzələndiyindən indi onlar daha yaraşıqlı görünürlər.

(ardı gələn sayımızda)

Səxavət Məmmədli,

Azərbaycan Respublikasının Prezidenti

yanında kütləvi informasiya vasitələrinin

inkişafına dövlət dəstəyi fondunun maliyyə

yardımı ilə

Ədalət.-2011.-29 noyabr.-S.6.