Yollar uzaq...

Yollar uzaq,

nə əl çatır, nə ün yetir...

Nə ayrılıq,

nə içimdə bu əbədi üsyan bitir.

Bədii yaradıcılığda orijinallıq böyük bir keyfiyyətdir. Əslində orijinal və yenilikçi olmasan sənət aləmində möhkəm yer tuta bilməzsən. Həyatda hər bir şeyi asan deyil dərk edərək mübarizədə almalısan.

"Səni düşünürəm "lirik seirlər toplusunun müəllifi Afaq Şıxlı öz orijinallığı, fərqli ruhu və dünyası ilə seçilən şairlərimizdən biridir. Kitabda toplanan şeirlərin ilk misralarından şairənin lirik dünyasını, incə ruhunu, döyünən və sevgi dolu ürəyini görürük. Şairənin lirik qəhrəmanı insanı düşünməyə vadar edir.

Hər bir şair öz şeirlərində bilavasitə özünü yaradır. Əsl sənətkarın tərcümeyi-halı, taleyi və həyatı daha çox onun yaradıcılığında öz əksini tapır. Hər bir şair qələmi əlinə aldığı andan etibarən öz həyatını vərəqlıməyə, bir film kimi gözünün önündən otürməyə başlayır və yaratdığı ilk misralardan başlayaraq öz ömrünü, dünyasını yaradır. Bilərəkdən, ya təsadüfdü bilmirəm, amma Afaq xanım lirik notlara köklənən "Səni düşünürəm" kitabında toplanan şeirlərinin ilk misralarından özünü, dünyasını əks etdirib. Kitabda toplanan lirik şeirlərdə şairənin böyük ürəyini və sevgi dünyasını duya bilirik.

Afaq xanımın dili poetikdir, səlisdir, axıcı və oynaqdır. Sözü misralarda bütün poetik qüvvəsi ilə səsləndirməyə çalışır və çox zaman da buna nail olur. Yaratdığı hər bir şeirdə öz mövqeyini hiss elətdirə bilir. Onun lirik qəhrəmanının səsi ürəkdən gəlir və oxucunu inandırır.

Həyatın mənası tox olmaq deyil!

Fərasət - dövləti çox olmaq deyil!

Ölmək - bu dünyadan yox olmaq deyil,

Qəlbimdə qalacaq izlərin ki var!

Kitab vətənlə bağlı şeirlərlə başlayır. Əslində Afaq xanımın bütün lirik şeirlərindən vətəninə olan sonsuz sevgisi duyulur. "SALAM!", "DOSTLARIM, MƏNƏ DƏ BAHAR GÖNDƏRİN!", "BU GECƏ" şeirlərini oxuduqca vətəninə sadiq bir övlad obrazını görürük. Vətəninin hər qarışını sevən, əzizləyən, sonsuz məhəbbətini sərgiləməsinin şahidi oluruq.

"Salam" şeirində vətəninin çox gözəl və təsirli tablosunu yarada bilib. Afaq xanımın şeirlərini oxuduqca sanki bir anlıq vətənin sehrinə çıxırsan, hər bir guşəsini qarış-qarış gəzirsən.

Vətən, qayıtmışam qoynuna yenə...

Qurbanlar kəsərəm bu gözəl günə!

Öpüm torpağını mən dönə-dönə,

Saflığım, paklığım, iffətim, salam!

Yaradıcılıq ürəkdən su içir, sonra da gözəl bir şeirə çevrilir. "Səni düşünürəm" kitabı lirik şeirlərdən ibarətdir. Oxuduqca şairənin lirik dünyasına qərq olursan, yeniliklər kəşf edirsən. Məhəbbət mövzusunda yazdığı şeirləri Afaq xanımın ən incə , ən zərif ətirli çiçəkləridir. "Uzat əllərini mənə bir daha!", "Özün söylə", "Sən getdin", "Mən sənin sevgindən qorxuram", "Kaş ki", "Mənə "sevgilim" demə" şeirlərində sevən, inciyən qəlbi görürük. Bu şeirlərdə hissin, poetik əhvali-ruhiyyənin müasirliyi, genişliyi də öz əksini tapmışdır.

Poeziyada uğurlu yol inam, sevgi və sədaqətdən başlayır. Afaq xanımın "Səni düşünürəm" kitabında da bu vəhdəti görmək mümkündü. Şeirlərində cəsarətlə sevən bir qəlbin çırpıntıları, sevgisini qorumaq və yaşadacaq arzuları səslənir.

Bəllidir ki, lirika insanın həyat prosesində doğan duyğu və düşüncələrini, hiss və həyəcanlarını, ətrafa, insanlara, cəmiyyətə, hətta, təbiət hadisələrinə belə təsirini əks etdirir. Afaq xanımın "Səni düşünürəm" kitabında istənilən bir mövzunu, istənilən bir hadisəni tapmaq, izləmək olar. Bu kitabda toplanan şeirlər həm mövzu, həm də mündəricə etibarilə zəngin və dolğundur. Ülvi, pak hissləri tərənnüm edən şairə insanın qəlbinin dərinliklərini çox məharətlə və ustalıqla aça bilmişdir. Afaq xanım tükənməz həyat eşqini şeirlərinin döyünən ürəyinə çevirmişdir. Poeziyanın başlıca meyarı olan sadəlik və aydınlıq prinsiplərini də unutmamağa çalışmış və yeri gəldikcə çox böyük ustalıqla istifadə etmişdir.

"Səni düşünürəm" Afaq Şıxlının dördüncü kitabıdır. Bundan əvvəlki kitablarında olduğu kimi, bu kitabda da şairə öz oxucusunu şeir fikrinə və mövqeyinə inanmağa, onunla dərdləşməyə, yaratdığı fikirlər ətrafında sərbəst düşünməyə çağırır.

Könül Səid

Ədalət.-2011.-5 oktyabr.- S.6.