Məktəbin bir günü...

Bu gün ölkəmizdə gənclərlə bağlı bir çox uğurlu layihələr həyata keçirilir ki, bu da gənclər siyasətinin əsasını təşkil edir. Gənclər siyasətinin əsas məqsədi gənclərin fiziki, əqli və mənəvi inkişafına şərait yaratmaq, onların imkan və bacarıqlarının reallaşmasına, sosial problemlərinin həllinə və hüquqlarının müdafiəsinin təmin olunmasına kömək etməkdir.

Respublikamızda dövlət gənclər siyasətinin formalaşdırılması ümummilli liderimiz Heydər Əliyevin adı ilə bağlıdır. Məhz onun sayəsində gənclərlə bağlı bir çox qanunlar qəbul olunmuş, bu gün hər bir gəncin inkişafında və problemlərinin həllində köməyini əsirgəməyən Gənclər və İdman Nazirliyi yaradılmışdır. Keçən illər ərzində gənclərimiz bir çox idman, bilik arenalarında Azərbaycanı təmsil etmiş və bayrağımızı zirvələrə qaldırmışlar.

Azərbaycan Respublikası Prezidentinin 2005-ci il 30 avqust tarixli Sərəncamı ilə təsdiq edilmiş "Azərbaycan Gəncliyi Dövlət Proqramı (2005-2009-cu illər)" dövlət gənclər siyasətinin həyata keçirilməsi yolunda mühüm fəaliyyət sənədi olmuşdur. Sözügedən Dövlət Proqramının icrası nəticəsində paytaxtda və regionlarda dövlət gənclər siyasətinin prioritet sahələrində müsbət dəyişikliklər baş vermiş və müəyyən uğurlar əldə olunmuşdur. Gənclərin vətənpərvərlik tərbiyəsi sahəsində davamlı işlər aparılmış, istedadlı, yaradıcı gənclərə dövlət qayğısı genişləndirilmişdir. Gənclərin potensialından, rəqabətə davamlı enerjisindən yararlanmaq, onların fəaliyyətini faydalı iş əmsalına çevirmək və bir çox beynəlxalq təcrübənin ölkəmizdə tətbiqində gənclərə güvənmək bu gün Azərbaycan reallığının tələbi olaraq qalmaqdadır. Bu gün hər bir gənc düşünməlidir ki, o, birbaşa ölkə başçısının diqqət mərkəzindədir və onun üzləşdiyi problemlərdən xəbərdardır.

Gənclərə qayğını artırmaq, onlara stimul vermək üçün "Azərbaycan gəncliyi 2011-2015-ci illərdə" Dövlət Proqramının həyata keçirilməsi də dövlət başçımızın növbəti humanist addımı kimi qiymətləndirilməlidir.

Ölkədə yaranmış sabitlik, sağlam abı-hava onu deməyə əsas verir ki, belə bir dinc şəraitdə gəncliyimizin qazanacağı uğurların ardı-arası kəsilməyəcəkdir.

Əlbəttə, bütün bunlar ölkəmizdə gənclərə göstərilən qayğının görünən tərəfləridir ki, bunlar hamıya yaxşı məlumdur.

Bu gün sərhədlərimizin qorunmasında, iqtisadiyyatımızın inkişafında, beynəlxalq əlaqələrin qurulmasında, ən ümdəsi sabitliyin hökm sürməsində ölkə prezindenti, cənab İlham Əliyev hər zaman gənclərə arxalanır, onları dövlətimizin və dövlətçiliyimizin qarantı hesab edir.

Ölkəmizin inkişafında böyük xidmətləri olan hüquq-mühafizə orqanlarında işləyən gənclərimiz də dövlətin xüsusi qayğısı ilə əhatə olunub və bu yönümdə işlər davam etdirilir. Təəssüflər olsun ki, bəziləri bu quruculuq-abadlıq işlərini, inkişafı, tərəqqini, gənclərə olan diqqət və qayğını görmür, hətta görmək belə istəmirlər.

Görülən işlərin, çəkilən zəhmətin bir daha şahidi olmaq və gördüklərimi yazıya almaq üçün Arif Heydərov adına Sıravi və Kiçik Rəis Heyəti Hazırlayan Məktəbə gedəcəyimi götür-qoy edib səhər tezdən yola çıxdım. Gəlişim birinci günə, yəni "rəis günü"nə təsadüf edirdi. Bu gün Məktəb rəisi özü sıra düzülüşündə şəxsən iştirak edəcəkdi. Səhər saat yeddinin yarısında Məktəbin komendant xidmətinin əməkdaşına özümü təqdim edib, gəlişimin məqsədini bildirdim. O, da bir qayda olaraq Növbətçi Hissəyə məlumat verdikdən sonra həyətə daxil oldum. Məktəbin həyətində nizamlı bir səliqə-səhman vardı. Böyük şam ağacları əhənglənmiş, budanmış və cərgə ilə yeni əkilmiş fidanlar isə əraziyə xüsusi gözəllik verirdi. Müasir memarlığın tələblərinə cavab verən, öz əzəmətli görünüşü ilə peşəkar əməyinin bəhrəsi olduğunu sərgiləyən yeni tikilmiş tribunaya baxa-baxa Arif Heydərovun büstünün önünə yaxınlaşdım.

Haşiyə: Arif Nəzər oğlu Heydərov 1926-cı ilin 28 iyununda doğulmuşdur. 1978-ci ilin 29 iyununda Bakıda həlak olmuşdur. 1944-45-ci illərdə İkinci Dünya müharibəsində fəal iştirak etmişdir. Berlinə hücüm əməliyyatında xüsusilə fəqlənmişdir. Böyük ömür yolu keçən və bu gün yaddaşlarda səmimi insan kimi yaşayan Arif Heydərov 1970-1978-ci illərdə Azərbaycanın daxili işlər naziri olmuşdur.

Saat yeddini göstərəndə, hər cür texniki və məişət avadanlıqları ilə təmin olunmuş, yeni tikilmiş 180 yerlik dördmərtəbəli yataqxananın işıqları yananda bildim ki, Məktəbin şəxsi heyəti yuxudan qalxıb. Bu mənzərə mənə bir anlıq hərbi xidmətdə olduğum günləri xatırlatdı. Məktəbin şəxsi heyətlə iş üzrə köməkçisi Cənnət Şeydayevin səsi yuxarı mərtəbədən gəlirdi. Hal-əhval tutub görüşdük və maraqlı mənzərədən təsirləndiyimi deyəndə,- biz daha bunlara öyrəşmişik,- dedi həmkarım. Diş pastası və diş fırçası ilə "silahlanmış" dinləyicilərin vaxtında və cəld şəkildə pilləkənlərdən enərək öz otaqlarına qaçması ondan xəbər verirdi ki, yuyunmaq üçün verilən vaxt bitmək üzrədir və davamiyyəti yoxlamaq üçün sırada olmaq lazımdır. Davamiyyət yoxlanıldıqdan sonra hamı bir nəfər kimi sıra meydanına düzüldü və "bir-iki" sədaları ətrafı bürüdü.

Qeyd: Ulu öndərimiz Heydər Əliyevin gözəl bir fikri var. O, deyirdi: "Biz idmanı ümummilli hərakata çevirməliyik". Bu gün Azərbaycanda idman çox sürətlə inkişaf edir. Demək olar ki, bütün regionlarda idman komleksləri tikilib və gənclərin ixtiyarına verilib. Məqsəd isə gənclərin pis vərdişlərdən uzaq olması və cəmiyyətə, xalqa, dövlətə fayda verən bir vətəndaş kimi formalaşmasıdır.

Daxili işlər orqanlarında xidmət edən hər bir əməkdaş idmana böyük maraq göstərməli və idmanı peşəsinin ayrılmaz hissəsi bilməlidir. Yenə də ulu öndərimizin fikrinə üz tuturq: "Məmnunam ki, gənclərimiz və ümumiyyətlə, cəmiyyətdə yaşayan insanlar idmana, bədən tərbiyəsinə maraq, həvəs göstərirlər, idmanla məşğul olurlar. Beləliklə, hər kəs öz sağlamlığını möhkəmləndirir. Bunların hamısı birlikdə Azərbaycanda cəmiyyətin, kütlənin sağlam olması üçün yaxşı imkan yaradır"...

"Sağlam bədəndə sağlam ruh olar",- deyib mən də turnikə çıxdım. Məktəbin "Atəş, fiziki hazırlıq və sıra hazırlığı silsiləsi"nin rəisi, polis mayoru Anar Nağıyev zarafatla: qardaş, qocalmısan desə də 15- dəfə dartınıb yerə düşdüm və 20, 25, 30 dəfə dartınan dinləyicilərlə -Məmməd Quliyevlə, Vasif Muradovla, Natiq Nuriyevlə Elcan İsmayılıovla, Nicat Nəcəfovla səmimi söhbətə başladım. Dincəlməklərindən istifadə edib paqondaşlarıma belə bir sual ünvanlayıram: Niyə məhz polisi seçdiniz, bu peşənin ki, ağırlığını, məsuliyyətini yaxşı bilirsiniz? Biri-birinin üzünə baxıb sualı hansı məqsədlə verməyimdən hali olduqdan sonra Nicat Nəcəfov dilləndi: "Kiçik yaşlarımdan bu peşəyə həvəsim vardı. Hətta məktəbdə oxuduğum illərdə polis həyatı ilə bağlı olan səhnəciklərdə oynamağım mənə bu peşəni sevdirdi. Azərbaycan Polisi böyük tarixi yol keçib və bu gün cəmiyyətdə hökm sürən sabitliyə görə biz polisə borcluyuq. Bəli, çətin peşədir, ancaq onu da bilirəm ki, milllətə, xalqa xidmət etmək üçün ən şərəfli peşələrdən biridir".

Artıq idmana ayrılan vaxtın bitdiyini və yuyunmaq üçün yerlərə əmrini verən polis mayoru Anar Nağıyev təkcə DİN-də keçirilən idman yarışlarında deyil, respublika və dünya səviyyəli yarışlarda da məktəbin dinləyicilərinin böyük uğurlara imza atdıqlarını ürəklə qeyd etdi. Bildirdi ki, IV kurs, II tağım dinləyicisi, polis sıravisi Qocayev Asim Əbülfət oğlu cüdo üzrə qarşıdan gələn dünya çempionatına hazırlaşır və ümidvarıq ki, yüksək nəticə ilə təkcə bizləri yox, bütün xalqımızı sevindirəcəkdir.

Saat 7:55-dir. Tikintisinə keçən il başlanılmış və bu yaxınlarda nazir müavini, polis general-leytenantı Oruc Zalovun iştirakı ilə açılışı olan 250 nəfərlik, müasir görünüşü ilə könül oxşayan yeməkxananın qarşısında dinləyicilər sıra ilə səhər yeməyinə düzülüb. Yeməkxana ilə tanış olmaq üçün içəri keçmək istədiyimi bildirdim. Polis polkovnik-leytenantı Cənnət Şeydayev sözümü yerə salmadı. Birlikdə yeməkxanaya daxil olduq. Sözün düzü mənim yeməkxanaya girməkdə əsas məqsədim burda yaradılmış şəraitlə tanış olmaq və dinləyicilərə verilən səhər yeməyini öz gözlərimlə görmək idi. Səmimiyyətimə inansanız deyə bilərəm ki, yaradılan şərait deyilən kimidir və dinləyicilərə səhər yeməyi üçün nə lazımdırsa o da verilir. Yeməkxanada çalışan mülki şəxslər, yəni qadınlar burda hər bir dinləyiciyə öz övladı kimi baxır və onlara xüsusi qayğı ilə yanaşırlar. Qab-qacaq xüsusi qabyuyan aparat vasitəsilə yuyulur, gigenik qaydalara riayət olunur. Yeməkxanada soyuducu kamera, ət və balığın, meyvə-tərəvəzin, inventarların və bir də çörəyin saxlanması üçün ayrılmış otaqlar var. Bura xüsusi havalandırma sistemi ilə təchiz olunmuş və ən müasir avadanlıqlar quraşdırılmışdır.

Ən məsuliyyətli an

Hərbi xidmətdə olanlar bilir ki, səhər sıra baxışı xidmətin gözüdür. Ona görə də hər kəs çalışır ki, səhər baxışına yaxşı hazırlaşsın ki, ona heç bir irad tutulmasın.

Saat 8:30. Məktəbin şəxsi heyəti səhər baxşı üçün sıra meydanına düzülüb. Rəis müavini, polis polkovnik-leytenantı Çərkəz Hüseynov şəxsi heyətin səhər baxışına hazır olması, onların say tərkibi barədə rəisə raport verdikdən sonra rəis şəxsi heyəti salamladı. Gün ərzində görülən işlərdən, dinləyicilərin keçirilən dərslərə münasibətindən və davamiyyətindən söz açan rəis bildirdi ki, hər bir dinləyici bu imkandan, yaradılmış şəraitdən maksimum yararlanmalıdır ki, xidmətə başladığı zaman hər hansı bir çətinliklə rastlaşmasın. Çünki burada öyrədilən hüquqi biliklərlə yanaşı, keçirilən təlimlər, əlbəyaxa döyüş fəndləri onların hər zaman karına gələcəkdir. Onu da qeyd edim ki, rəis üzünü siqaret çəkənlərə tutub sağlamlıqlarının qeydinə qalmağı, onlara siqaretdən uzaq olmağı dönə-dönə tapşırdı. Məktəbdə təmizlik işlərinə dinləyicilərin ayrılması da diqqətdən kənarda qalmadı. Dəyişkən heyət öz yerlərini tutduqdan sonra daimi heyət tribuna önünə gəldi və rəis onlara növbəti tapşırıqlarını və göstərişlərini verdi. Qarşıdan gələn imtahanlara və andiçmə gününə şəxsi heyətin hazırlanması üçün bütün güclərini səfərbər etmələrini komandir-müəllim heyətinin nəzərinə çatdıran rəis bildirdi ki, həmişə olduğu kimi imtahanda və andiçmə mərasimində nazir müavinlərinin iştirakı gözləniləndir.

Mənimçün ən diqqətçəkən məqamlardan biri də rəisin müəllimlərin dərsə hazırlaşmaq üçün istifadə etdikləri qeyd dəftərlərini, plan-konspektləri və s. yoxlaması idi. (Komandir- müəllim heyətinin geyim formasını və səhər baxışına hazır olmalarını polis polkovniki Ramiz Abdullayevin şəxsən yoxlaması nəzərimdən qaçmadı).

Daha sonra şəxsi heyət baraban sədaları altında tribuna önündən keçdi. Şəxsi heyətin keçidi də rəis tərəfindən birmənalı qarşılanmadı və o, sıra keçidi zamanı bəzi yanlışlıqların olduğunu bildirdi, kurs rəislərinə göstəriş verdi ki, iradlar vaxtında aradan qaldırılsın.

Saat 8:50. Kurs rəisləri öz tağmlarını dərsə hazırlayır, onlara tapşırıqlarını verirlər. On dəqiqədən sonra dərs başlayır. Məktəbin həyətində heç kim gözə dəymir. Keçirilən dərslərlə tanış olmaq üçün Kadrlar Qrupunun Baş inspektoru, polis mayoru Cəmşid Sadıqov ilə birlikdə dərslər keçirilən auditoriyalara baş çəkirik. Kompyuter otağında tamam fərqli bir mənzərə ilə rastlaşırıq. Dinləyicilər "Kompyuter biliklərinin əsasları fənni"ni tədris edən polis mayoru Rəşid İsmayılovun onlara ünvanladığı suallara yerli-yataqlı cavab verirdilər. Maraq üçün onlardan birinə yaxınlaşıb kompyuterin müasir dünyada rolu ilə bağlı sual ünvanladım və dinləyici maraqlı bir cavab verdi. O, dedi: "Bu gün hər birimiz informasiya məkanına daxil olmaq üçün müasir texnologiyaları, o cümlədən kompyuteri gözəl bilməliyik. Çünki indi həm də informasiya müharibəsi gedir. Cinayətkarlar daha ağıllı və bacarıqlıdırlar. Onlar köhəlmiş üsüllardan imtina edib kibercinayətkarlığın son nailiyyətlərindən istifadə edərək asan yolla qazanc əldə edirlər. Bir də onu demək istəyirəm ki, bu gün Ermənistan Respublikasının qədim Azərbaycan torpaqları üzərində qurulmasını, 20 faiz torpağımızın ermənilər tərəfindən işğal olunması faktını həm də müasir texnologiyalar vasitəsilə dünyaya çatdırmalıyıq". Aldığım cavab məni qane etdi və ürəyimdə belə gənclərimizin olmasına sevindim.

"Xüsusi fənlər silsiləsi"nin rəisi, polis polkovnik-leytenantı Rizvan Hüseynovun dərsi isə daha maraqlı məqamlarla yadda qaldı. "Xüsusi hazırlıq" fənni yeni interaktiv təlim metodlarına uyğun aparılır, "Qalereya", "Zehni hücüm" və "Ziqzaq" üsulları tətbiq olunur. Bu üsulların həyata keçirilməsində əsas məqsəd dinləyiciyə verilmiş tapşırığı yerinə yetirərkən öz bilik və bacarığını tam olaraq sərgiləməyə imkan verməkdir. Bu kimi fənlər keçirilərkən hər bir mövzuya uyğun videofilmlər göstərlir. Bayır xidməti əməkdaşlarına vətəndaşlarla qanunun tələb etdiyi şəkildə ünsiyyət qurmağın bütün tələbləri öyrədilir.

Qeyd edim ki, "Ünsiyyət və etika" fənninin tədrisinə məktəbdə daha həsas yanaşılır. Bu fənni tədris edən polis polkovnik-leytenantı Şükür Həsənov deyir ki, xidmətimizin bel sütunu ünsiyyətdir. Çünki polis əməkdaşı hər zaman xalqın içindədir və ona vətəndaş tərəfindən bütün situasiyalarda müraciət oluna bilər. Bu baxımdan polis əməkdaşı nəzakəli olmalı, etik davranış kodeksinin və polis haqqında Azərbaycan Respublikası Qanununun bütün maddələrinə riayət etməlidir. Etik çərçivədən kənar bir ünsiyyət əlbəttə ki, heç kimin xoşuna gəlməz və bu da şübhəsiz ki, vətəndaşlar tərəfindən haqlı narazılıqlarla qarşılanar.

Kitab bizim dostumuzdur...

Burda kitabxana varmı deyəndə "Təhsil" şöbəsinin əməkdaşı, polis mayoru Babək Atakişiyev bığaltı gülümsədi və: Elə bir təhsil müəssisəsi varmı ki, orda kitabxana olmasın dedi. İstəyirsiniz gedək, tanış olun. Başımla razılığımı bildirdim. Bu da kitabxana,- Babək Atakişiyev dilləndi. Kitabxanaçı özünü təqdim etdi: Polis serjantı Rəşad Rüstəmov. Virtual kitabxanada dinləyicilər sakitcə oturub dərslərə hazırlaşırdılar. Qeyd edim ki, tədris olunan dərslərin nəzəri hissəsinin əksəriyyəti kopyuterlərin yaddaşında var və dinləyicilər buradan istifadə edirlər. Azərbaycan ədəbiyyatından kitablar azlıq təşkil etsə də kitabxanamızda 8 minə yaxın kitab var. Artıq burda sual verməyin yeri idi. Şair və yazıçılarımızdan kimləri tanıyırsınız? -deyəndə etraf edim ki, bir çoxları başlarını aşağı salsa da içərilərindən Fərman Kərimzadənin, İsmayıl Şıxlının və şeirlərini vətən torpağının hər daşına, qayasına, gülünə, çiçəyinə yazmış Məmməd Arazın adını çəkəndə sevindim. Ona görə sevindim ki, gələcəyin mübariz keşikçiləri təkcə peşəsinə uyğun biliklərə yiyələnmir, həm də vətənin torpağı qədər müqəddəs olan dilimizi, milli kimliyimizi bədii və tarixi əsərlər vasitəsilə oxuyub öyrənirlər.

Sağlamlığın keşiyində

Rəisin şəxsi heyətlə iş üzrə köməkçisi Cənnət Şeydayev Tibb məntəqəsinə baxmaq istəyib-istəmədiyimi deyəndə, -baxmaq pis olmazdı,- dedim. Özü xəstə olsa da (deyəsən güclü soyuqlamışdı) məntəqə rəisi, polis kapitanı Mübariz Əliyev məni məntəqə ilə tanış etdi və dinləyicilərin sağlamlıqlarının keşiyində ayıq-sayıq durduqlarını bildirdi. Ona Allahdan şəfa diləyib çıxdıq.

Saat 13:30-dur.

Məktəb rəisinin əmri ilə təsdiq edilmiş Gün bölgüsündə nahara hazırlaşmaq üçün vaxtdır. Həyət dinləyicilərlə doludur. Kimi biri-biri ilə söhbət edir, dərsdə keçirilən mövzu ilə bağlı fikir mübadiləsi aparır, kimi də müəllimlərin, xüsusilə də rəisin gözündən oğurlanıb xısın-xısın siqaret çəkir.

Artıq nahara az qalıb və səhər yeməyində olduğu kimi yenə də dinləyicilər sıra ilə düzülüblər. Həmişə olduğu kimi bu gün də biri-birindən dadlı təamlar süfrəni bəzəyəcəkdir. Həm də müsiqi sədaları altında yeməyin ayrı ləzzəti var. (Bunu da Cəmşid Sadıqov diqqətimə çatdırır).

Birinci xörək noxud şorbası, ikinci xörək makaron üstündə ət, tərəvəz salatı, kisel və çörəkdir. Çörək burada xüsusi aparat vasitəsilə kəsilmiş şəkildə verilir ki, israf olmasın. Dinləyicilərdən biri yeməklərə maraqla baxdığımı görüb məni də yeməyə davət edir, lakin Cəmşid müəllim rəisin məni birlikdə nahar etmək üçün gözlədiyini bildirir və həmkarımla sağollaşıram.

Budur, eyni təamlar bizim süfrəmizdədir. (Polis polkovniki Ramiz Abdullayev hərbi nizam-intzam görmüş, öz peşəsini dərindən bilən bir zabitdir və onun bu yanaşmasına da həsəd aparıram. Yəni, dinləyici nəyi yeyirsə, komandiri də ondan yeməlidir və bərabərlik hüququ pozulmamalıdır).

Yemək yeyə-yeyə məktəbin dünənindən, bu günündən və gələcəyindən söhbət açırıq. Ramiz müəllim görülən işlərin hələ qənaətbaxş olmadığını deyir və bildirir ki, dövlət başçımız cənab İlham Əliyevin və daxili işlər naziri, general-polkovnik cənab Ramil Usubovun etimadını doğrultmaq üçün daha böyük işlər görmək lazımdır. Göstərilən diqqət və qayğı da bizdən bunu tələb edir. Əsas məqsədimiz dinləyicilərin bilik səviyyəsinin yüksəldilməsi və peşəkarlıqlarının daha da artırılmasıdır. Hal-hazırda məktəbdə 561 nəfər dinləyici təhsil alır. Rayon qeydiyyatında olanlar istisna olmaqla, ailəli dinləyicilər evə buraxılır. Artıq oktyabr ayının 1-dən sıravi və kiçik rəis heyəti vəzifəsinə sənəd verən namizədlərin toplanmış sənədlərinin də şəxsi iş formasında qəbuluna başlanılmışdır. Polisə güclü axın var və bu da bu sistemə qəbulun şəffaflığından xəbər verir. Məktəbdə ali təhsillilərin təhsil müddəti 45, orta təhsillilərin təhsil müddəti isə 90 gündür.

Nahardan sonra

Nahardan sonra məktəbdə yenə də qızğın bir həyat başlayır. Saat 14:30-dan 15:00-kimi Şəxsi vaxtdır. Şəxsi vaxtdan sonra isə Müstəqil hazırlıq başlayır. Müstəqil hazırlıq adətən, sabahkı dərslərə hazırlıq üçün nəzərdə tutulub, ancaq kim istəsə əlavə kitablar oxuya, mütaliə ilə də məşğul ola bilr. 16:30-dan 17:00 kimi bütün tağımlar Sıra hazırlığına cəlb olunur. Hər bir kurs rəisi öz tağımı ilə məşğul olur.

Günün nizam qaydasına uyğun olaraq sıra hazırlığından sonra tağımlara təhkim olunmuş ərazilərin təmizlənməsi başlayır və bu proses saat 18:00-da bitir. Dəyişən heyətlə tərbiyəvi işin aparılması ən vacib şərtlərdən biridir. Məktəb rəhbərliyi başda olmaqla, bütün kurs rəisləri bu qaydaya ciddi yanaşır. ("Əzizim əzizdir, tərbiyəsi ondan da əzizdir" məsəli bu yerdə köməyimizə çatır). Məktəbdən kənarda yaşayan dinləyici heyəti evə buraxıldıqdan sonra şam yeməyinə hazırlıq başlayır. Yenə də dinləyicilər bir qayda olaraq tağımlarla, ən əsası da sakitliyi pozmadan yeməkxananın qarşısına düzülürlər. Şam yeməyinin ardınca yenə Şəxsi vaxt başlayır, ta 22:10-a kimi. Axşam gəzintisi saat 22:10-da başlayır. Adətən əsgərlikdə Axşam gəzintisinə hərbi hissəni tərk etməklə start veilirdi və guya "bacarıqlı əsgərlər" digərlərindən fərqli olaraq həmin vaxtı hardasa "daha xoş" keçirirdilər.

Saat 22:30. "Düzül, Düzlən, Farağat" komandasından bəllidir ki, Axşam yoxlanışıdır. Hər bir kurs rəisi öz tağımının şəxsi heyətinin sayını aparır və "rəis günü" olduğundan birbaşa rəisə raport verirlər (bu qayda bütün günlərdə belədir).

Artıq yatmaq vaxtıdır

Saat 23:00-dır. Hər şey qaydasındadır, bütün tağımların şəxsi heyəti yerindədir, heç bir problem qeydə alınmayıb və indi yatmaq olar. Tağımlara "yat" komandası verilir və yataqxananın işıqları sönür. Kadrlar Qrupunun Baş inspektoru, polis mayoru Cəmşid Sadıqov məndən məktəb haqqında gəldiyim qənaəti soruşur. "Görünən kəndə nə bələdçi",- deyib onunla və növbətçi ilə sağollaşıb ayrılıram.

Və son...

Onların adını unutduğumdan deyil, maraqlı olsun deyə yazının axırına saxladım. Məktəbin bərbəri Tərlan Hüseynov, dərzi Gülşən Babayeva dinləyicilərdən razılıqlarını bildirdilər.

Hafiz Təmirov,

polis baş leytenantı

P.S. Mən gördüklərimi bu kiçik yazıya sığdırmağa çalışdım. İnanıram ki, zaman gələcək ki, böyük tarixi ənənəsi olan və Arif Heydərovun adını daşıyan bu təlim-tərbiyə ocağının yetirmələrinin uğurlarından hələ çox yazacağıq. Sonda isə adını xatırlamadığım bir dahinin bu fikirlərini hamıyla bölüşürəm. "Çalış ki, hər günü həyatının son günü kimi yaşayasan. Və bir gün görəcəksən ki, sən qalibsən və hər şeydə haqlısan".

Ədalət.- 2011.- 11 oktyabr.- S.4.